भांगरभूंय | प्रतिनिधी
पेडणें, प्रतिनिधी : मोरजी पंचायत वाठारांतल्या वयलो वाडो दोंगरार गंगा रेड्डी प्रकल्पांत जलसिंचन खात्याचे कसलेच तरेचे परवाने घेनासतना तेरा बेकायदेशीर बोरवेली उबारिल्ल्यो हे विशीं जलसिंचन खात्या कडेन कागाळ केले उपरांत २ तारखेर जलसिंचन खातें पेडणें विभागाचे अधिकारी अनिल परुळेकार आनी तांच्या पंगडान ह्यो तेराय बेकायदेशीर बोरवेली सील केल्यो.
वयल्या वाड्यावेल्या दोंगरार बिगर गोंयकारांनी जमीन विकत्यो घेतल्यात. थंय कांय प्रमाणांत परवाने घेवन जाल्यार थोड्यांनी बेकायदेशीर फार्म हावजां उबारपाक सुरवात केल्या. हे विशीं मोरजी ग्रामसभेंत नागरिकांनी बोवाळ केलो. मात हाचेर सरकारान आड नदर केल्ल्यान नागरिकांनी तिडक उक्तायिल्ली. गंगा रेड्डी फार्म हावजा विशीं नागरीक जायते फावट ग्रामसभेंत बोवाळ करतात. मात कोणूच आयकून घेवपाक तयार नासता. मोरजी पंचायतीच्या आदल्या मंडळान ह्या फार्म हावजाक परवाने दिवंक नाशिल्ले. मात पंचायतीच्या वेंचणुकां वेळार हे पंचायतीचेर प्रशासकीय अधिकार्यांची निवड जाले उपरांत प्रशासकीय अधिकार्यान बेगोबेग फार्म हावज आनी प्रकल्पाक परवाने दिवपाची प्रक्रिया सुरू केल्ले खातीर नागरिकांनी खर तिडक उक्तायल्या.
जलसिंचन अधिकारी अनिल परुळेकार हांणी ह्या वेळार म्हायती दितना सांगलें, ह्या वाठारांत वट्ट बेकायदेशीर तेरा बोरवेल उबारिल्ल्यो. त्यो बोरवेल सील करपाचें काम केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
