भांगरभूंय | प्रतिनिधी
पेडणें: आगोंदा दर्यादेग वाठारांत व्हडा प्रमाणांत कांसव येवन तांतयां घालतात. मोरजी, आश्वें, मांद्रें दर्यादेगेरूय कांसवांनी हजारांनी तांतयां घाल्यांत. पिलांक दर्यांत सोडपाचें काम रान विभागान केलां. मात कांय कडेन कांसव संवर्धन मोहिमेक आडखळ निर्माण करपाचें काम शॅक वेवसायीक करतात. लायटीचो उजवाड, आवाजाचें प्रदुशण हाका लागून कांसवांक त्रास जावपाक लागला.
आगोंदा दर्यादेगेवेलीं कांय शॅकां, रेस्टोरंटां बंद करपाचो आदेश उच्च न्यायालयान दिले उपरांत मोरजी, आश्वें, हरमल ह्या दर्यादेग वाठारांतल्या रिसॉर्ट वेवसायीकांचेर चेंपण आयलां. आतां तांचेरूय कारवाय जातली काय? हाचे कडेन सगल्यांचें लक्ष आसा.
सरकार पर्यटन हंगामांत मोरजी, आश्वें, मांद्रेंच्या सरकारी जमनींत शॅकां उबारपाक परवाने दिता. तांकां नेम, अटी पाळच्यो पडटात. रातच्या वेळार कॅण्डल लॅम्प दवरून वेवसाय करचो पडटा. मात खाजगी जमनीर रेस्टोरंटां आसात तीं मात सकाळ मेरेन चकचकीत लायटीचो वापर करतात. तशेंच कांय खाजगी रॅस्टोरंटांनी पार्टीचें आयोजन केल्ल्यान आवाजाचेंय प्रदुशण जाता.
फाटलीं दोन वर्सां सावन आवाजाचें, लायटीच्या उजवाडांत लेगीत कांसवांनी येवन हांगा तांतयां घाल्यांत. फाटल्या वर्सा दर्यांतल्या १३२ कांसवांनी तांतयां घाल्यांत. अंदूं मार्च मेरेन १५२ कांसवांनी तांतयां घाल्यांत. हो आंकडो दोनश पार वतलो अशी शक्यताय रान खात्याच्या अधिकार्यान उक्तायल्या. खाजगी जमनींत आवाज आनी लायटीचें प्रदुशण जावपा वांगडा ह्या वाठारांत जायत्यो बोटी पार्क केल्ल्यो पळोवपाक मेळटात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
