भांगरभूंय | प्रतिनिधी
अर्थीक गैरवेव्हारा खाला कोमुनिदादीची ईडी कडेन कागाळ
पणजी: वेवसायीक वापरा खातीर मोरंबी कोमुनिदादीची जमीन हडप करपाच्या प्रकाराची ईडीन चवकशी करची अशी मागणी करपी कागाळ मोरंबी कोमुनिदादीन केल्या. कोमुनिदादीचे अॅटर्नी ब्रायन गोन्साल्वीस हांणी अर्थीकक गैरवेव्हारा खाला ही कागाळ केल्या. गुन्यांव नोंद करून चवकशी करची अशी मागणी आसा.
मोरंबी ओ ग्रेंडची जमीन भालचंद्र वागळे, अमीत सुखटणकार, मुकेश शिरगांवकार, राजेश म्हड्डोळकार, रामदास नायक, अमीत पालेकार आनी विकम गोहार हांणी हडप केल्ल्याचें कागदपत्रां वेल्यान कळटा. ह्या प्रकरणांत कायदेशीर सल्लो घेवपाचो निर्णय कोमुनिदादीन घेतला.
पालमार दोन फिलीप पयले भाट ही जमीन 1851 वर्सा जुजे मारिया दी सिक्वेरा हांणी आफ्रामेंताचेर घेतिल्ली. मोरंबी कोमुनिदादीक तो शुल्क (रेंट) फारीक करतालो. महादेवाचे देवूळ आनी होली क्रॉस ऑफ सेंट सेबास्तियांव ही धर्मीक थळां जमनीचेर आशिल्लीं. जुजे मारिया दी सिक्वेरा उपरांत जमीन मारिया दीसा आनी तांच्या वारसदारांच्या ताब्यांत आयली. हाचे उपरांत 1942 वर्सा राजाराम दत्ताराम सिनाय वागळो आनी अनंत गोणु वागळो हांणी जुजे मारिया दीसाच्या वारसां कडल्यान पावर ऑफ अॅटर्नीच्या माध्यमांतल्यान जमीन विकती घेतली. अनंत गोणू वागळो हांच्या मरणा उपरांत भालचंद्र वागळे हांच्या नांवाचेर जमीन गेली.
जमनीचेर आशिल्ल्या माडांचो उल्लेख 1970 वर्साचे सर्वेंत करूंक ना. हाका लागून कुळाचीं नांवां कागदपत्रांचेर लागूंक नात. भालचंद्र वागळे हांचे नांव लागलें. कूळ तशेंच कोमुनिदादीचें नांव लागूंक ना.
जगन्नाथ नारायण चोपडेंकार हांची घरकान्न सुजाता चोपडेंकार हिणें कूळ कायद्या खाला तिसवाडी जोड मामलेदारां कडेन कूळ कायद्या खाला याचीका घाली. मोरंबी कोमुनिदादीक प्रतिवादी केलां. मोरंबी ओ ग्रेंडची जमीन भालचंद्र वागळे, अमीत सुखटणकार, मुकेश शिरगांवकार, राजेश म्हड्डोळकार, रामदास नायक, अमीत पालेकार आनी विकम गोहार हांणी हडप केल्ल्याचें कागदपत्रां वेल्यान कळटा.
बेकायदाे जमीन रुपांतरणाक लागून राज्याक बरेच अर्थीक लुकसाण जालां. हाची अर्थीक गैरवेव्हारा खाला चवकशी जावपाक जाय. ह्या जमनीचेर घरनिर्माण तशेंच वेवसायीक संकुलांक मेरशी पंचायतीन मान्यताय दिल्ल्याची म्हायती आरटीआय खाला मेळ्ळ्या. 22 फेब्रुवारी 2024 ह्या दिसा मेरशी पंचायतीन एनओसी दिल्या, अशें कोमुनिदादीच्या अॅटर्नीन कागाळेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
