भांगरभूंय | प्रतिनिधी
सादारणपणान वेसन म्हळ्यार एखाद्र्या पदार्थाची वा वागणुकेची खर इत्सा अशें म्हणूं येता. सादारणपणान ताका वेसन म्हणूं येता. परत परत कितेंय करपाची इत्सा आसप आनी ताचे अधीन जावप. ह्यो सगल्यो प्रक्रिया वेसन ह्या माथाळ्या खाला येतात. मेंदवान मनशाच्या मनाक दिल्ले आज्ञे प्रमाण मनीस आपले अवयव शारिरीक कार्यांत घालता. तातूंत पयलीं दोळे, मागीर मन एका वस्तू कडेन धांवता आनी हात-पांय त्या वस्तू कडेन वळटात. पूण हे संवयचें पयलें कारण म्हळ्यार मन. मन नियंत्रण म्हणल्यार बरें नियंत्रण, पूण मनाचेर परिणाम करपी पयली भायली गजाल… आनी एकदां हें मन नियंत्रण सोडून गेले उपरांत तें जायत्या गजालींच्या अधीन जाता. मागीर वेसन तयार जावंक लागता. वेसनाचे जायते प्रकार आसात. ताका सोरो पियेवप, धुम्रपान, आनी सेगीत खरेदी करप अशेंय म्हणूं येता, ह्या वेसनाचीं जायतीं कारणां आमकां दिसतात. तातूंतलें पयलें म्हळ्यार डिप्रेशन. ह्या उदासीनतायेक लागून मनशाक आपलें मन खंय तरी व्यस्त दवरपाची इत्सा आसता. देखून हे खातीर मनशाक वेसन वा सोऱ्याचें वेसन लागता. दुसरें म्हणल्यार अपेस. ह्या अपेसाक लागून घुंवळे वखदांचेंय कांय जणांक वेसन लागता. तिसरें, मोगाच्या मोडणाक लागून भुरग्यांक ड्रग्साचें वेसन लागलां हें आमी पळयतात. तेच प्रमाण चवथें कारण म्हळ्यार उत्सव. देखीक- एकतिसावो वाडदीस आनी इश्टाचो वाडदीस ह्या निमतान तरणाटे सुरवेक बियर पियेवपाचो यत्न करतात आनी ल्हवू ल्हवू ह्या वेसनान कास्ताचे बेबदे जातता. अशे तरेन मनशाक वेसन लागता.
सुखा खातीर वा वेदने खातीर मेजवानी आनी पियेवप एक दीस वेसनांत रुपांतरीत जाता. आनी जेन्ना मनशाक ताचें पुरायपणान वेसन लागता तेन्ना मन ताका परतून परतून एकूच वस्त सेवन करपाची वा पियेवपाची इत्सा निर्माण करता. एके खाशेले पिरायेचेर सादारण किशोरावस्थेचे चले-चलयो वेसनांत पडटात. जाल्यार कांय जाण वीस-पंचवीस वर्सांत वेसन करतात. ह्या वेसनांतल्या लोकांची स्थिती सुदारपा खातीर संवसारभर समुपदेशन केंद्रां स्थापन केल्यांत. समुपदेशन केंद्रां, आध्यात्मीक केंद्रां, संस्कार शिबिरां, वेसन मुक्त केंद्रां आनी धर्मार्थ संस्था हे खातीर यत्न करतात. केंद्रांत प्रवेश घेतिल्लो मनीस, आत्मशिस्तींतल्यान वा मनाचेर नियंत्रण दवरून, ध्येयांत बदल करून ते स्वताक सुदारता आनी आपलें वेसन सोडून दिता.
पूण संवसारभर दरेका घरांत जें वेसन लागलां तें म्हळ्यार मोबायल फोनाचें.. हेर वेसनांक वेसन जावपाची विशिश्ट पिराय आसता. पूण हें मोबायल फोनाचें वेसन सामकें विचित्र आसा की ताका शेवट ना. सामकी ल्हान पिरायेचीं भुरगीं म्हळ्यार एक ते देड वर्सां पिरायेचीं भुरगीं मोबायलाचें वेसन आशिल्लीं आमी पळयतात. व्हिडियो पळयले बगर तीं जेवनात. हेर वेसनांक तो मनीस स्वता जापसालदार आसता, पूण देड ते दोन वर्सां पिरायेच्या भुरग्यांक मोबायलाचें वेसन जावपाची जापसालदारकी तांच्या आवय-बापायची आसता. म्हणल्यार ह्या वेसनाक पिराय ना आनी ल्हान भुरग्यांक मोबायलाचें वेसन करपाची जापसालदारकी पालकांची आसता. भुरगीं व्हड जातात तशीं तातूंत खेळ आनी रील पळयले उपरांत तीं पुरायपणान मोबायलाचेर आदारून आशिल्लीं दिसतात. ते भायर खेळपाक लेगीत वचनात, भायले खेळ खेळनात. घरांत बसून भुरगीं मोटवे आनी कंटाळवाणी जावपाक लागल्यात अशें दिसता. हाका लागून भुरगीं हट्टी जावपाक लागल्यात.
बारा ते चवदा वर्सां पिरायेच्या भुरग्यांक मोबायल फोन हाताळपाक मेळना म्हणून आत्महत्या करतात. मोबायलाच्या वेसनाक लागून अशी भिरांकूळ परिस्थिती आमी पळयतात. सोळा ते पंचवीस वर्सां पिरायेचे तरणाटे, तरणाट्यो, बायलोय मोबायल फोनाचीं अधीन जातात अशें दिसून आयलां. वेगळ्या वेगळ्या अॅपा वरवीं ते रील तयार करतात. अश्लील रील करून समाजांत अनैतिकता पातळावपाचो वावर करतात. एका खाशेल्या पिरायेचीं भुरगीं तांकां आकर्शण आनी जिज्ञासेन वरांचीं वरां पळयतात. ते अभ्यासा कडेन आडनदर करतात. ते भायले खेळ खेळटना दिसनात. चार वण्टीं भितर ते व्हिडियो गेम खेळटात. खंय तरी मजा करपाक भायर सरतना स्वताचें चित्र कॅमेऱ्याचेर काडटात आनी तें स्टेटस म्हणून दवरतात. सेल्फी घेवपाच्या यत्नांत जायत्या तरणाट्यांनी आपलो जीव लेगीत व्हगडायला.
किदेंय जावं! अशा प्रकारच्या मोबायल फोनांत अशे जायते अॅप आसात. तातूंत तरणाटे आपले जिणेचीं जायतीं वरां फेसबूक, स्नॅपचॅट, इंस्टाग्राम, व्हिडियो एडिटरांचेर घालतात. अर्थांत, सोरो पियेवपी मनशा भशेन ते वराचीं वरां मोबायलांत बुडून गेल्ले दिसतात.
तज्ञांच्या म्हणण्या प्रमाण मोबायलाचें वेसन आशिल्ल्यांक ल्हान पिराये सावन भुरग्यांचो आंकडो नेटान वाडत आसा. सर्वेक्षणां प्रमाण शंबरांतले चाळीस ते पंचाळीस टक्के भुरग्यांक मोबायलाचें वेसन आसा. मोबायल फोनाक लागून तरणाट्यां मदीं मानसीक दुयेंसांचो आंकडो दुपेटीन वाडला. मोबायलाचो सेगीत वापर केल्ल्यान दोळ्यांचो त्रास, चड वेळ एकाच सुवातेर बसून मोबायल फोनाचेर नदर मारपाक लागून मानेक त्रास जावप, आनी सेगीत बसून उरिल्ल्यान फाटीक त्रास जावप हें दिसून येता. तेच बरोबर कुटुंबीक संबंदांत गैरसमज आनी मतभेद दिसतात.
सद्याच्या काळांत हे पिळगेक धरून दवरपी हें मोबायल वेसन हेर वेसनां परस चड घाताचें आसा. मोबायलाच्या वेसनान अश्लील व्हिडियो, चित्र-विचित्र रील फक्त भुरगीं आनी तरणाटेच न्हय तर जाण्ट्या लोकांकय आकर्शीत करतात. आतां सगले कडेन इंटरनॅटाची सुविधा आशिल्ल्यान लोकांक ती रात दीस पळोवंक मेळटा. प्रोफेशनल कॅमेऱ्यांत जें मेगा पिक्सेल आशिल्लें तें आतां मोबायल कॅमेऱ्यांत दिसता. फक्त तरणाटेच न्हय तर जाण्टेय आतां फिल्टर वापरून, क्रॉप करून, कॅमेऱ्यांत एडीट करून आनी तोंडा वयले काळे दाग खिणाक मिटोवन स्वताक सोबीत करपाचो यत्न करतात.
ह्या काळांत पुराय संवसार ह्या मोबायल फोनाचेर मोहीत जाला. ताका लागून जायत्या जाणांक आपलो जीव व्हगडावचो पडला. जायते जाण एकटे आनी उदास जाल्ले दिसतात. जशें वेसन केंद्रां, सल्लागार केंद्रां, समुपदेशन केंद्रां स्थापन केल्यांत, तशें सोरो, सिगरेट, बीडी हांच्या वेसनांतल्यान त्रास सोंसपी लोकांक तांचे पसून सुटका मेळोवपाक वा वेसनांतल्यान भायर काडपाक मजत करपाक मजत केल्या. तेच प्रमाण फुडल्या काळांत मोबायल वेसन केंद्रां उबारचीं पडटलीं अशें म्हाका दिसता.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
