भांगरभूंय | प्रतिनिधी
कसलोय नवो सोद लागलो, काय मनशाची जीण ल्हव जाता. ताका थाकाय मेळटा. मात कांय सोद अशे आसतात, की ते मनीसजातीक फायद्याचे थारतात आनी लुकसाण करपीय. हालींच्या वर्सांनी विकसीत जायत गेल्लो एक सोद लोकांक खूब धोक्याचो थारपाक लागला. तो म्हणल्यार मोबायल फोन. ताचे फायदेय आसात. वायट, गुन्यांवकारी कामां खातीर ताचो वापर जाता, पूण बऱ्या कामां खातीरुय चड वेळ वापरल्यार तो जिणेचो सत्यानाश करपाक शकता. अमेरिकेंतल्या ‘सॅपियन लॅब्ज’ हे शास्त्रज्ञांचे एके एनजीओन हालींच केल्लें आपलें संशोधन जाहीर केलां. तांच्या मतान, जितले बेगीन ल्हान भुरगें स्मार्ट फोनाच्या संपर्कांत येता, तितलो ताका जाण्टो जातकच मानसीक भलायकेच्या समस्यांक तोंड दिवचें पडटा. तांणी 40 देशांनी 18 ते 24 वर्सां पिरायेच्या 27,969 लोकांचो डाटा एकठांय करून ताचो अभ्यास केला. कांय निश्कर्श काडल्यात. हातूंत भारतांतले चार हजार लोक आसात, हें विशेश. आमची लोकसंख्या 1 अब्ज 36 कोटी. म्हणटकच ह्या संशोधनांत कांय अर्थ ना, अशें कांय लोकांक दिसतलें, पूण शिता वयल्यान भाताची परिक्षा करूं येता.
भारतांत 1 अब्ज 10 कोटी मोबायल फोन कनेक्शनां आसात. म्हणल्यार लोकसंख्येच्या 77 टक्के म्हणू येता. अर्थांत भोवतेकां कडेन दोन ते चार कनेक्शनां आसात. हो आंकडो अंदूं मात्सो देंवला, अशें कांय संस्थांचें मत. ह्या फोनाचो सगल्यांत चड वापर जाता, तो सिनेमाचे ओटीटी, फेसबूक, ट्विटर, व्हाॅट्सअॅप, इन्स्टाग्राम, युट्यूब पळोवपाक. दिसाक वरभर सोशल मिडिया पळोवं येता. मात, कांय जाण चार ते सात वरां तातूंत बुडिल्ले आसतात. तातूंत आतां ल्हान भुरग्यांचो आसपाव जाला. ल्हान भुरगो रडलो जाल्यार ताका आवय- बापूय फोन दितात. केन्नाय तो निकतोच उलोवंक शिकिल्लो भुरगो स्वताच तो मागून घेता. ल्हान भुरग्यांनी मोबायल फोना वयले व्हिडियो पळयल्यार कितें जाता? दोतोरांच्या मतान, भुरगीं तणावा खाला उरतात. तांकां निर्शेवणी येवं शकता. तीं एकोडीं जातात. हेरां वांगडा जुळोवन घेवप तांकां जमना. घरांत कोणूय आयल्यार तीं पयस- पयस, ओगी रावतात. रोखडींत तिडकतात. दीसभर पिरपीर करतात. तिरकस उलयतात. पिराय वाडटकच तीं डिप्रेशनांत वचपाक शकतात.
दोतोर सांगतात, तें बरोबर. पालकांनी स्वताच्या घरांत पळयल्यार, ताका हेंच चित्र दिसतलें. भुरगीं ल्हान आस मेरेन व्हडलेशें कांय दिसना. जसजशीं तीं व्हडलीं जातात, तसो मोबायल फोनाचो तांचेर जाल्लो परिणाम दिसपाक लागता. स्मार्ट फोन वापरलो काय आपलो भुरगोय स्मार्ट जातलो, असो कोणाच्या मनांत गैरसमज आसा जाल्यार तांणी तो काडून उडोवचो. वयले एनजीओन आनीक एक गजाल सांगल्या, ती म्हणल्यार भुरग्यां मदीं आत्महत्येचे विचार येतात, भुरगेपणार भ्रमनिरास जातात. गुरवार आवय 9 म्हयन्यांच्या काळांत मोबायलूच घेवन बसली जाल्यार ताचो परिणाम जल्मूपी भुरग्याचेर जाता, अशें दिसून आयलां. तेन्ना पालकांनी हो गोमटेर बशिल्लो मोबायलाचो म्हारू वयलेचाराक घेवचो न्हय. ताचेर
उपाय काडचे.
30 वर्सां पयलीं भुरगीं सुटयांनी फिरपाक वतालीं, वेगवेगळे छंद पुराय करतालीं. वाचन करतालीं. नवी गजाल शिकतालीं. मैदानार खेळटालीं. सैमाच्या गोपांत रिगतालीं. आतां मुद्दाम तांकां थंय व्हरचें पडटा. आपूण जावन कोण वचनात. सगलीं घरांतल्या कोनश्यांनी मोबायल वेंगेंत घेवन पडिल्लीं आसतात. इसापनीती, पंचतंत्र, सपनां दाखोवपी, बोध दिवपी, नितळ मनरिजवण करपी पुस्तकां आयचीं कितलीं भुरगीं वाचतात? बरें मोबायलूच घेवया. कितलीं भुरगीं शाळे कडेन संबंदीत, व्यक्तीमत्व विकास, सामान्य ज्ञान हाचे वयलो मजकूर, व्हिडियो पळयतात? ट्यूशनां, पाठ्यपुस्तकां कडेन संबंदीत विशयांच्या ज्ञानाचो युट्यूब आनी इंटरनेट वेबसायटीचेर घसघसोच आसा. कितले जाण तातूंत न्हाल्यात? चडशे भुरगे कितें पळयतात, तर विनोदी, संगीत, जरा हटके…. व्हिडियो वा मॅची, सिनेमा. नाका जाल्लेंय पळयतात आसतले. आसूं. मोबायल फोन हें व्यसन इतलें भुरग्यांनी आनी पालकांनीय मतींत दवरचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
