भांगरभूंय | प्रतिनिधी
बालाघाट, खबरां संस्था: स्मार्टफोन ही सध्या काळाची गरज जावन पडल्या. मात ल्हान भुरग्यां खातीर ह्या स्मार्टफोनाचो अती वापर धोको निर्माण करपाक शकता. हाका लागूनच पालक जायते फावट भुरग्यांक स्मार्टफोन पसून पयस रावपाचो सल्लो दितना दिसतात. मात मध्यप्रदेशाच्या बालाघाटांत पुताक अशें सांगप एके आवयक म्हारग पडलें.
मध्यप्रदेशांत मोबायल वापरपा वयल्यान एका भुरग्यान स्वताच्या आवय-बापायचेर रॉडन हल्लो करपाची घडणूक मुखार आयल्या. ह्या हल्ल्यांत त्या भुरग्याचे आवयक मरण आयलें. जाल्यार ताच्या बापायचेर हॉस्पिटलांत उपचार चालू आसात. ही घडणूक ५ मार्चाक घडली.
सत्यम नांवाच्या भुरग्याक ताच्या बापायन मोबायल फोन पळोवपाचें आडायिल्ल्यान तांणी रागान लोखणाचो रॉड बापायचे तकलेर मारलो. उपरांत त्या भुरग्याची आवय वाद मिटोवपा खातीर आयली तेन्ना ताणें तिचेरुय रॉड मारलो. उपचारा वेळार तिका मरण आयलें. उपरांत त्या भुरग्यानूच फोन करून पुलिसांक हे विशीं म्हायती दिली. पुलिसांनी येवन ताका ताब्यांत घेतलो. त्या भुरग्याच्या बापायचीय भलायकी हुस्क्याची आसा.
शेजार्यांनी सांगलें, सत्यम कोणाच कडेन उलयनाशिल्लो. तो नीटचे कोचिंगा खातीर कोटा हांगा गेल्लो. मात चार म्हयन्यांनी परतलो. पुलिसांनी हे विशीं चवकशी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
