भांगरभूंय | प्रतिनिधी
वास्को : मोबायल पासपोर्ट सेवा लोकांच्या दारा मेरेन आयिल्ल्यान सर्वसामान्यांची गैरसोय पयस जावपाक मजत जातली. लोकांनी हे सेवेचो लाव घेवचो, असो गोंयांतले अनिवासी भारतीय वेव्हार आयुक्त आनी आदले खासदार अॅड. नरेंद्र सावयकार हांणी उलो मारलो.
मंगळारा 12 ऑगस्टाक मोबायल पासपोर्ट सेवा व्हॅनीचें उक्तावण केले उपरांत अॅड. सावयकार उलयताले. ह्या वेळार वास्कोचे आमदार कृष्णा साळकार, मुरगांवचे आमदार संकल्प आमोणकार, नगराध्यक्ष गिरीश बोरकार, नगरसेवक यतीन कामुर्लेंकार, नगरसेवक दीपक नायक, नगरसेवक नारायण बोरकार, नगरसेवक अमेय चोपडेंकार, नगरसेविका श्रद्धा महाले, पासपोर्ट विभागाचे निजो वर्गीस तशेंच हेर अधिकारी हाजीर आशिल्ले.
ही व्हॅन सेवा विदेश मंत्रालयाच्या अखत्यारींतल्या गोंय पासपोर्ट सेवा सोंपी आनी लोकांक फायद्याची जावची हे खातीर हातांत घेतिल्लो उपक्रम आसा. उक्तावणा वेळार 20 जाणांनी पासपोर्टा खातीर नांव नोंदणी केल्ली. तातूंत 91 वर्सां पिरायेचे बायलेचो आस्पाव आशिल्लो. हे सुविधेक लागून जे जाण्टे बायलेक पणजे वचपा खातीर धांवपळ करची पडली ना. सगळ्यो सुविधा सुवातेचेरूच मेळ्ळ्यो, अशें अॅड. सावयकार हांणी सांगलें. ही सेवा बेगिनूच गांवागांवांनी मेळटली. ताका लागून लोकांच्या दारा मेरेन सेवा उपलब्ध जातली, अशेंय तांणी सांगलें.
आमदार आमोणकार हांणी सांगलें, डबल इंजीन सरकार सर्वसामान्यां खातीर आसा. हे सेवाक लागून सर्वसामान्यांची पासपोर्टा खातीर जावपी गैरसोय पयस जावपाक मजत जातली. हे सेवेचो लोकांनी लाव घेवचो.
आमदार साळकार हांणी सांगलें, आमचें डबल इंजीन सरकार जें सांगतां, ते करून दाखयता. हे सेवेक लागून तें सिद्ध जालां. दरेक सुविधा सर्वसामान्यां मेरेन पालोवपाचो आमचो यत्न आसता, अशें तांणी स्पश्ट केलें. हे व्हॅनीक लागून सर्वसामान्यांक कसलो फायदो जातलो, ताची म्हायती वर्गीस हांणी दिली. पासपोर्ट मेळोवचे खातीर लोकांक ताटकळत रावचें पडचें न्हय, हे खातीर हे व्हॅनीचो उपेग करतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
