भांगरभूंय | प्रतिनिधी
कळंगूट पुलिशेची कामगिरी; चार जाणांक अटक
भांगरभूंय । प्रतिनिधी
म्हापशें: कळंगूट आनी कांदोळे दर्यादेगेर पर्यटकांचे मोबायल फोन आनी हेर वस्तू चोरपी टोळी कळंगूट पुलिसांनी धरली. ह्या प्रकरणांत चार दुबावितांक अटक केल्या. तांचे कडल्यान आठ मोबायल आनी एक कॅमेरा मेळून 2.50 लाखांचो म्हाल जप्त केलो.
दुबावीत महेश सुरेश तुपकार (रा. आराडी पर्रा), रहीदूल लतीफ मोंडल (रा. आगरवाडो कळंगूट आनी मूळ पश्चीम बंगाल), मायरन मॅथ्यू व्हिएगस (रा. गल्लवाडो ताळगांव) आनी राजू राठोड (रा. नागवें आनी मूळ गदग कर्नाटक) हांचो अटक केल्ल्यां मदीं आस्पाव आसा.
27 नेव्हेंबराक मध्यानरातीर कळंगूट दर्यादेगेर न्हिदिल्ले फिर्यादी रोहन मिनेझीस (बंगळूर) ह्या पर्यटकाचो 80 हजारांचो आयफोन 14 हो मोबायल फोन चोरयेक गेल्लो.
हे चोरयेचो तपास करचे खातीर कळंगूट पुलिसांनी खाशेले पंगड तयार केल्ले. गरजेची म्हायती एकठांय केले उपरांत शुक्रारा पुलिसांनी दुबावीत महेश तुपकार आनी जहिदूल मोंडल ह्या नांवाडग्या चोरांक ताब्यांत घेतले. चवकशे वेळार दुबावितांनी आपलो गुन्यांव मानून घेतलो आनी फिर्यादीचो चोरील्लो मोबायल दोगा सांगात्यांक दिल्ल्याची म्हायती दिली.
ते प्रमाण पुलिसांनी दुबावीत मायरन व्हिएगस आनी राजू राठोड हांकां ताब्यांत घेवन अटक केली. पुलीस निरिक्षक दत्तगुरू सावंत हांच्या मार्गदर्शना खाला हवालदार विशाल गांवस, सतीश गावस, विद्यानंद आमोणकार, कॉन्स्टेबल अमीर गाड, विजय नायक, प्रवीण चोडणकार, गणपत तिळोजी, गौरव चोडणकार, प्रितेश किनळेंकार आनी मनोज शिंदे ह्या पंगडान ही कारवाय केली. ह्या प्रकरणाचो फुडलो तपास सुरू आसा.
पासकोडा बगरूय आयफोन जाता अनलॉक
पासकोडा बगर आयफोन अनलॉक करपाक मेळना, अशी खूब जाणांची समजूत आसा. दुबावीत मायरन व्हिएगस हो आयटी तज्ञ न्हय, पूण अॅप आनी कुशळटायेच्या बळाचेर तो कांय मिण्टां भितर आयफोन अनलॉक करपाक शकता. दुबावीत महेश तुपकार आनी रहिदूल मोंडल हो दोगूय दर्यादेगेर न्हिदिल्ल्या पर्यटांचे फोन चोरून ते मायरन हाचे कडेन दिवन ते अनलॉक करून घेताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
