भांगरभूंय | प्रतिनिधी
मोबायलाचो चड वापर जाल्ल्यान समाजीक जिणेचेरूय परिणाम जावपाक लागला.
आयचें हें यूग तंत्रगिन्यानाचें यूग अशें मानतात. संगणक, इंटरनेट, कृत्रीम बुध्दी आनी स्मार्टफोन हाका लागून संवसार खूब गतीन बदलत आसा. खास करून स्मार्टफोनान आमचे दीसपट्टें जिणेंत व्हडली क्रांती घडोवन हाडल्या. म्हायती मेळोवप, संवाद सादप, शिकप, वेवसाय करप आनी मनरिजवण करप – ह्यो सगल्यो गजाली आतां मोबायल फोनांतल्यान सहजपणान शक्य जाल्यात. पूण ह्या संवयीं वांगडाच मोबायल फोनाचो चड वापर जाल्ल्यान जायत्यो समस्या निर्माण जावंक लागल्यात. मोबायल फोनाचें वाडत वचपी वेसन, खास करून तरणाटे पिळगेंत आनी विद्यार्थ्यां मदीं गंभीर समस्या निर्माण करूंक लागल्या.
आयज आमकां सगल्यांच्या हातांत स्मार्टफोन दिसता. सकाळ सावन रातीं न्हीद मेरेन जायते लोक मोबायल फोनांत गुथिल्ले वरी आसतात. सोशल मिडिया, ऑनलायन गेम्स, व्हिडियो प्लॅटफॉर्म, गप्पा मारपी अॅप्स आनी सतत नाका जाल्ल्या नोटिफिकेशनांक लागून लोक मोबायल फोनाचेर खूब वेळ व्हगडायतात. जायते फावटीं ताचो वापर गरजे परस चड जाता आनी हाका लागून वेळ आपल्या हातांतल्यान केन्ना सुके रेवें भशेन निसरत वता आनी मनशाचे जिणे पद्दतीचेरूय वायट परिणाम करून वता ताचें भान लेगीत आमकां उरना.
विद्यार्थ्यांचे बाबतींत ही समस्या चडूच गंभीर आसा. मोबायलाचो योग्य वापर शिक्षणाच्या मळार उपेगी पडूं येता. ऑनलायन वर्ग, शिक्षणीक व्हिडियो, ई-पुस्तकां आनी म्हायती सोदपाची सोय, संकेतथळांक लागून ताचो विद्यार्थ्यांक व्हड फायदो जावंक शकता. पूण जायते विद्यार्थी अभ्यास करचे बदला खेळ, सोशल मिडिया वा मनरिजवणे खातीर मोबायल फोन चड वापरतात जाका लागून अभ्यासा कडेन आडनदर जाता आनी एकाग्रताय उणी जाता आनी ताकाच लागून तांच्या शिक्षणीक उदरगतीचेर परिणाम जाता.
मोबायल फोनाचो चड वापर केल्यार भलायकेचेरूय वायट परिणाम जावपाक लागल्यात. सेगीत स्क्रिनीचेर पळयल्यार दोळ्यांक ताण येता, तकली दुखता आनी न्हीद येना. जायत्या अभ्यासा प्रमाण मोबायल फोनाचो चड वापर केल्यार मानसीक ताण, चिंता, उदासीनताय अशे प्रस्न वाडपाची शक्यताय आसा. खास करून रातच्या वेळार मोबायल फोन वापरपाची संवय आसल्यार कुडीची सैमीक न्हीद-ताल खंडीत जाता. मोबायलाचो चड वापर जाल्ल्यान समाजीक जिणेचेरूय परिणाम जावपाक लागला. पयलीं कुटुंबांतले वांगडी एकठांय बसून संवाद सादताले, अणभव सांगताले. आयज मात जायत्या घरांनी सगलेच आपल्या मोबायलाचेर गुथून दिसतात. खरो वा प्रत्क्ष संवाद उणो जायत आसा. हाका लागून नात्यांत परकीपणाची शक्यताय वाडत आसा.
हाचे भायर सोशल मिडियान निर्माण केल्ल्या आभासी संवसाराचो परिणामूय म्हत्वाचो. सोशल मिडियाचेर लोक चड करून आपलें जिवीत खूब आकर्शक आनी परिपूर्ण अशें दाखयतात. हें पळोवन जायते तरणाटे स्वताची तुळा दुसऱ्यां कडेन करपाक लागतात. हाका लागून आत्मविस्वास उणो जावप, असंतोश आनी मानसीक ताण वाडप अशे अनेक प्रस्न उप्रासूंक शकतात.
पूण ह्या सगल्या समस्यांचो उपाय म्हळ्यार मोबायल फोन पुरायपणान सोडून दिवप न्हय. कारण तंत्रगिन्यान आधुनीक जिणेचो एक म्हत्वाचो वा अभिन्न भाग जाला. म्हत्वाचें म्हणल्यार मोबायल फोन मर्यादीत आनी योग्य रितीन वापरप. ते खातीर कांय गजाली लक्षांत दवरप गरजेचें. देखीक, दिसाच्या फक्त कांय वेळार सोशल मिडिया वापरप, अभ्यास करतना मोबायल फोन पयस दवरप, रातच्या वेळार न्हिदचे पयलीं (उण्यांत उणें एक वर) मोबायल फोनाचो वापर टाळप, थेट संवाद आनी भायल्या खेळांक प्राधान्य दिवप, ध्यान करप आदी…
पालकांचीय भुमिका हांगा खूब म्हत्वाची. पालकांनी आपल्या भुरग्यांक मोबायलाचो योग्य वापर कसो करचो तें समजावपाची गरज आसा. तशेंच मोबायल फोनाचो समतोल पद्दतीन वापर करून एक देख दिवपाची गरज आसा. शाळा आनी म्हाविद्यालयांनीय विद्यार्थ्यांक डिजिटल सुरक्षरते विशीं मार्गदर्शन करपाची गरज आसा. सरकारी आनी समाजीक संघटणांनीय ह्या विशयाचेर जागृताय निर्माण करपाची गरज आसा. डिजिटल तंत्रगिन्यानाच्या योग्य वापरा विशीं लोकां मदीं जागृताय निर्माण जाल्यार ही समस्या नियंत्रीत करूं येता.
मोबायल फोन आनी इंटरनेटाक लागून मनीस जातीक जायत्यो सुविधा मेळ्ळ्यात. पूण चडांत चड घेतिल्ली खंयचीय गजाल हानीकारक थारूंक शकता. देखूनच मोबायल फोन वापरतना धीर, शिस्त आनी जागृताय आनी स्वताचेर नियंत्रण दवरप गरजेचें आसता. आमी तंत्रगिन्यानाचें साधन म्हणून वापर केल्यार तें आमचे उदरगती खातीर उपेगी पडूं येता; पूण आमी ताचो गुलाम जाल्यार ताचो आमच्या जिविताचेर वायट परिणाम जावंक शकता. ताकाच लागून आयज सगल्यांनी स्वताक हो प्रस्न विचारप म्हत्वाचें- आमी आमचो मोबायल वापरतात काय आमचो मोबायल आमकां वापरता? ह्या प्रस्नाक प्रामाणीक जाप मेळ्ळ्यारच डिजिटल युगांत आमी समतोल आनी समृध्द जिवीत जगूंक शकतले.
स्वेद दिवकर
7020854216
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
