भांगरभूंय | प्रतिनिधी
मोदी सरकारान जशें ‘स्वच्छ भारत’ अभियान सुरू केलां तशेंच भुरग्यां खातीर ‘मोबायल छोडो’ अभियान सुरू करून वाचनाची आवड निर्माण करपाक लागून गांवांगांवांनी उपक्रम चालीक लावचे.
पणजेंतल्या कांपाला वयल्या भाऊसाहेब बांदोडकार मैदानाचेर व्हडलो पुस्तक महोत्सव सुरू जाला. तो 8 फेब्रुवारी मेरेन आसतलो. सकाळीं 10 ते रातीं 8 असो ताचो वेळ.
गोंयांत इतलो व्हडलो पुस्तक महोत्सव घडये पयले खेप जाता. खूब तोखण्येची गजाल ही. आताच्या ह्या मोबायल फोनाच्या युगांत अशें पुस्तक महोत्सव घडोवन हाडप खूब गरजेचें. पयलीं भुरगो कितें कळ्ळेंना जाल्यार आवय -बापूय ना जाल्यार आजो-आजी वा ताचे परस वयान व्हड आशिल्ल्यां कडेन वचून विचारताले. आपलो दुबाव पयस करताले. प्रस्नाची जाप जाणून घेताले. आतां सगल्यां कडेन मोबायल फोन आसात. तो प्रस्न गुगल सर्चाचेर घालता आनी गुगल कितें सांगता तेंच बरोबर अशें धरून चलता. जाणकार मनशान तशें न्हय तें चुकलां अशें म्हणल्यार पसून ताचे परस तुका चड कळटा, असो उरफाटो प्रस्न करता.
एका वर्साचो ल्हान भुरगो पसून मोबायल फोन हाताळटा. आमी ताची तुस्त करतात. जी फुडें आमकांच म्हारग पडूं येता हें आमी पुराय विसरतात. पळोवपाक गेल्यार खंय तरी आमी मॉडर्न लायफ स्टायल आत्मसात करपाच्या नादात ही अधोगती करून घेतल्या, अशें म्हाका तरी दिसता. आमीच पुस्तकां वाचपाची सोडल्यांत तर आमचीं भुरगीं तरी कशीं वाचतलीं?
शिक्षण घेतात तेन्ना आमी अभ्यासा पुरतीं पुस्तकां वाचतालीं. जशें शिक्षण सोंपून नोकरी लागली आनी आमी वाचन सोडून मोबायल हातांत घेतलो. सकाळीं उठ सावन ते रातीं न्हिद म्हणसर मोबायल फोन हाताळटात. खास करून सोशल मिडिया. ताका लागून आमचो घरांत एकमेकां कडेन संवाद जायना. उलोवप, एकठांय बसून गजाली करप सगलें कमी जालां. उणें जालां म्हणचे परस सोंपलाच म्हणू येता. आदल्या तेंपार बल्कावांत घरांतले दादले, बायलो बसून उलयताल्यो. सांजवेळा च्या घेतकच उपरांत. घरांत सुटयेंत कोणूय येताले तेन्ना गजाली मारप जातालें. ल्हान भुरगीं खेळटालीं. आयज हें सगलें चित्रूच बदलून गेलां. सगले मोबायल घेवन बसतात. तातूंत टिव्हीय आसा. ह्या कारणाक लागून पुस्तकां वाचपाची आवड कमी जाल्या.
जशें जशे जग प्रगती करता तशी तशी नवी ‘टेक्नॉलॉजी’ येता. आता ई- बुक आयला, जो ऑनलायन वाचू येता. हातांत पुस्तक घेवून वाचप आणि मोबायलाचेर वाचप हातलो फरक समाजाक सांगपाक जाय. चड करून शाळा, कॉलेजींतल्या भुरग्याक सांगपाक जाय. पुस्तक आसलें जाल्यार केन्नाय काडून वाचूं येता. मोबायलावेलें वाचन हें थोड्या वेळा पुरतें आसता. मोबायल मोडलो काय सगलें सोंपलें. मागीर टेन्शन मोबायल फोन मोडलो. म्हजें सगळें तातूंत आशिल्लें. आतां कितें करपाचें म्हण मागीर रडपाचें. खरे म्हणल्यार भुरग्यां वांगडा पालकांकूय ताची जाणीव करून दिवपाक जाय. पालकांची एकमेकां कडेन सर्त आसता. तागेलो भुरगो ते शाळेंत वता, तागेल्या भुरग्या कडेन असो मोबायल आसा, तो अशें करता मागीर म्हज्याय भुरग्याक हांव तशेंच करूंक सोदता. अश्या विचारांक लागून आमी तांचो फुडार पेड्ड्यार करतात हें विसरतात. मोबायल फोन दीसभर पळोवन भुरग्यांचे दोळे पेड्डेर जाल्यात हें आमी विसरूंक फावना. खंयच्याय दोळ्यांच्या दोतोराक विचारात, तो तुमकां हेंच सांगतलो.
मोदी सरकारान जशें ‘स्वच्छ भारत’ अभियान सुरू केलां तशेंच भुरग्यां खातीर ‘मोबायल छोडो’ अभियान सुरू करून वाचनाची आवड निर्माण करपाक लागून गांवांगांवांनी उपक्रम चालीक लावचे. तशे पालकांनी पसून आपल्या भुरग्यांक घेवन ताका जे उपेगी पुस्तक आसा तें घेवन दिवचें आनी स्वता खातीरुय घेवचें. आपली शेणिल्ली पुस्तक वाचपाची सवय या निमतान परत सांबाळची. वाडदीस वा हेर कसलेय सुवाळे जातात. सर्ती जातात, थंय पसून एक पुस्तक इनाम म्हूण दिवचें.
सौ. स्नेहा नाडकर्णी
8668751471
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
