भांगरभूंय | प्रतिनिधी
पेडणें : मोपा आंतरराष्ट्रीय विमानतळाच्या वाठारांत जाल्ल्या नव्या भूगर्भीय सोदाक लागून बांदकाम सुरक्षे विशीं हुस्को उक्तावपाक लागल्यात. विमानतळ वाठारांतल्या एका व्हड खाजगी हॉटेल बांदकामाचे सुवातेर खणपाचें काम चालू आसतना भुंयारा सारकी व्हड जमनी पोंदा पोकळी दिसली. हाका लागून जमनीची स्थिरता आनी दीर्घकालीन सुरक्षेचेर गंभीर प्रस्नचिन्न उपस्थीत जालां.
सुमार 250 कुडींचें आलिशान हॉटेल ह्या वाठारांत बांदतात. सरकारान हो जमनीचो वाठार सुमार 60 वर्सांच्या लिजाचेर खाजगी कंपनाक गिला. खणकाम चालू आसतना उजवाडाक आयिल्ली ही सैमीक पोकळी अधिकाऱ्यांक कळयनासतना गुपचूप भरपाचें काम चालू दवरपाचो यत्न जाला, असो आरोप थळाव्या लोकांनी केला.
ही घडणूक पयली न्हय. कांय वर्सां आदीं मोपाच्या प्रवासी टर्मिलन प्रकल्प इमारतीच्या बांदाकमा वेळार लेगीत अशीच एक व्हड पोकळी सांपडल्ली. मात त्या वेळार लेगीत कसलेंच भुगर्भीय परिक्षण करिनासतना ती पुरयली. नवी पोकळी ही आदले सुवाते पासून फक्त 500 ते 700 मिटर अंतराचेर आसा. पर्यावरणवादी गटांच्या म्हणण्या प्रमाण, दोनूय पोकळ्यो एका व्हड भुंयगत भुंयार प्रणालीचो भाग आसूं येतात. अश्या संकेता कडेन आडनगर करप म्हणल्यार हॉटेल प्रकल्पा सयत विमानतळाच्या कांय म्हत्वाच्या भागां खातीर फुडारांत धोको निर्माण जावं येता, अशीय भिरांत उक्तायतात.
2022 त खूबश्या समाजीक कार्यकर्त्यांनी गोंयांतल्या संबंदीत विभागांत लेखी सुचोवणी दिवन ह्या वाठारांत भुंयगत पोकळी आसपाची शक्यताय उक्तायल्ली. तरी लेगीत कसलेंच भुगर्भीय सर्व्हेक्षण करिनासतना प्रकल्पांचें काम चालूच दवरलां, असो आरोप करतात.
सध्या विमानतळ प्रशासन वा हॉटेल बांदतात ते कंपनी कडल्यान कसलीच अधिकृत प्रतिक्रिया येवंक ना. कंपनी गुंतवणुकीचें रक्षण करपाचेर अदीक भर दिता, असो आरोप थळाव्या लोकांनी केला. सध्या संबंदीत सुवाचेर चड खर देखरेखी खाला काम चालू आसा. ही घडणूक खऱ्या अर्थान तपासणीक चालना दितली काय परतून गुपचूप ही खबर लिपयतले, हें फुडल्या काळांत स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
