भांगरभूंय | प्रतिनिधी
मोपा विमानतळाचेर 90 टक्के, दाबोळी विमानतळाचेर 10 टक्के निर्गत
समीप नार्वेकार । भांगरभूंय
पणजीः गोंया सावन निर्गत करपात मोपा विमानतळ दाबोळे विमानतळा परस खूब फुडें आसा. अंदूंच्या अर्थीक वर्सांत दाबोळे विमानतळाचे तुळेंत मोपा विमानतळान 90 टक्के निर्गत भायल्या राज्यांनी केलां. तशेंच दाबोळेच्या तुळेंत मोपा विमानतळान अतिरिक्त 14 कोटीचो महसूल निर्गतींतल्यान मेळयलां. ही म्हायती शेतकी आनी प्रसंस्कृत उत्पन्न निर्गत उदरगत प्राधिकरण (एपीडा) हांणी दिल्या.
एपीडा हांणी जारी केल्ले आकडेवारी प्रमाण, अंदूंचे अर्थिक वर्स 2025-26त एप्रिल ते जुलय ह्या चार म्हयन्या मजगतीं राज्यांतल्या दोन विमानतळा वेल्यान 679 मेट्रीक टन इतली शेतकी आनी प्रक्रिया केल्ले अन्नाची भायल्या देशांत निर्गत करून 16 कोटी इतली येणावळ एकठांय केल्या. हातूंत मोपा विमानतळाचो 609 मेट्रीक टन आनी 15.12 कोटी इतलो निर्गतेत वांटो आसा जाल्यार दाबोळी विमानतळाचो फक्त 69.86 मेट्रीक टन आनी 1.58 कोटी महसूलांत वांटो आसा.
मोपा विमानतळा वेल्यान आनी दाबोळी विमानतळा वेल्यान दरेकी चार वस्तुंचीं निर्गत जाल्या. मोपा विमानतळा वेल्यान 21.21 मेट्रीक टन आंब्याची निर्गत जावन 46 लाख इतली येणावळ मेळयल्या, 558 मेट्रीक टन भाजयेची निर्गत करून 14.07 कोटी, 29.60 मेट्रीक टन हेर ताज्या फळांची निर्गत जावन 56 लाख आनी 130 किल गोड पदार्थांची निर्गत जावन 2 लाख इतली येणावळ जोडल्या.
जाल्यार दोबोळी विमानतळा वेल्यान 24.47 मेट्रीक टन आंब्याची निर्गत जावन 91 लाख येणावळ जोडल्या, 28.85 मेट्रीक टन भाजयेची निर्गत जावन 39 लाख, 15.85 हेर ताजी फळांची निर्गत करून 28 लाख आनी 28 मेट्रीक टन वखदी झाडां आनी वनस्पतींची निर्गत केल्या.
जाल्यार दाबोळे विमानतळावेल्यान फकत दोन देशांनी जाल्यार मोपा विमानतळावेल्यान आठ देशांनी निर्गत जाल्या. दाबोळे विमानतळा वेल्यान युएई देशांत 49.75 मेट्रीक टन निर्गत करून 1.24 कोटी महसूल एकठां केला जाल्यार बाहरेन देशांत 20.10 मेट्रीक टन निर्गत करून 35 लाख येणावळ मेळयल्या.
मोपा विमानतळा वेल्यान युके देशांत 488 मेट्रीक टन निर्गत करून 12.87 कोटी महसूल एकठंय केला, युएई देशांत 90.76 मेट्रीक टन निर्गत करून 1.46 कोटी महसूल, नेदरलेण्डांत 11.05 मेट्रीक टन निर्गत करून 46 लाख महसूल, इटलींत 10.46 मेट्रीक टन निर्गत करून 15 लाख महसूल, कतारांत 7.93 मेट्रीक टन निर्गत करून 14 लाख महसूल, जर्मनींत 500 किल निर्गत करून 1 लाख महसूल, मलेशियांत 130 किल निर्गत करून 2 लाख महसूल आनी ओमानांत 140 किल निर्गत करून 1 लाख महसूल एकठांय केला.
मोपा विमानतळ
म्हयनो निर्गत (मेट्रीक टन) मोल
एप्रिल – 21.64 58 लाख
मे – 21.31 46 लाख
जुन – 16.28 37 लाख
जुलय – 10.63 17 लाख
दाबोळी विमानतळ
म्हयनो निर्गत (मेट्रीक टन) मोल
एप्रिल – 215 5.35 कोटी
मे – 227 5.51 कोटी
जुन – 133 3.52 कोटी
जुलय – 34 74 लाख
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
