भांगरभूंय | प्रतिनिधी
मोपा विमानतळार पे-पार्कींग दर वाडिल्ल्यान टॅक्सी वेवसायिकांनी रस्त्याचेर देंवून केलो विरोध
पेडणें: मोपा विमानतळ सुरू जाले उपरांत सुशेग मेळटलो अशी व्हड अपेक्षा आशिल्ली. मात सरकाराकूय मोपा आंतरराष्ट्रीय विमानतळ चलोवपी जीएमआर कंपनी सरकाराक भियेना. आतां टॅक्सी वेवसायिकांचेरूय जीएमआर कंपनी अन्याय करता असो दावो शिव ओरिअर्स टॅक्सी संघटणेन रस्त्यार येवन केलो.
आंतरराष्ट्रीय विमानतळार टॅक्सी पार्कींग दर वाडोवपाचोा निर्णय कंपनीन घेतला. त्या प्रकाराचो आमी खर निशेध करता. सरकारान आमकां न्याय दिवचो, अशी मागणी टॅक्सी वेवसायिकांनी मागणी केल्या
टॅक्सी वेवसायीक संघटणेन ह्या वेळार उलयतना सांगलें, जीएमआर कंपनीचे अधिकारी आनी मुख्यमंत्री डॉक्टर प्रमोद सावंत हांची टॅक्सी वेवसायीक संघटणे कडेन जोड बसका जाल्ली. ते बसकेंत टॅक्सी वेवसायीकांचो कसलोच दर वाडयतना तांकां विस्वासांत घेतले, अशें नमूद केल्लें. तशे तरेचो लेखी अहवालूय आसा. पंचायत, आमदार, टॅक्सी वेवसायीक, संघटणेचे पदाधिकारी, जीएमआर कंपनीचे अधिकारी हांची जोड बसका घेवन, तांकां विस्वासांत घेवन जें कितें दर वाडोवपाचें आसतलें ते वाडोवपाचो निर्णय घेतले. अशे थारिल्लें. मात जीएमआर कंपनीन हांतल्या कोणाकूच विस्वासांत घेनासतना दर अचकीत वाडयल्यात.
८० रुपया आशिल्लें वाडोवन २०० रुपयांनी केलें पार्कींग
जीएमआर कंपनीन टॅक्सी वेवसायीकांचेर अन्याय करपाचे नदरेंतल्यान ८० रुपया पार्कींग फी आशिल्ले सरळ दोनशें रुपया पार्कींग करून आमचेर अन्याय केला. हें दर जर नियंत्रणांत येवंक ना, जाल्यार जितले आमी शांत आसात. तितलेच वेळ आयल्यार अशांत जातले, अशी शिटकावणी टॅक्सी वेवसायीक संघटणेन रस्त्यार येवन दिली.
जीएमआर कंपनीची मनमानी दिसानदीस वाडतूच आसा. सरकाराकूय विस्वासांत घेनासतना वा कोणाकूच विस्वासांत घेनासतना जी एम आर कंपनी हें दर कित्याक वाडयता? असो प्रस्न टॅक्सी वेवसायीक तुळसकार हांणी केलो.
विमानतळूच आमकां नाका
मोपा विमानतळ कंपनीन, थळाव्यांच्यो जांच्यो जमनी गेल्यात, तांकां आजूनय मोबदलो दिवंक ना. टॅक्सी वेवसायिकांचे प्रस्न सोडयना. जर हें सगलें अशेंच चालूच उरलें आनी जर आमचेर अन्याय जायत रावल्यार आमी पुराय पेडणेंच्या टॅक्सी भावांक उलो घालतले. जर आमकां विमानतळाचेर न्याय मेळना जाल्यार आमकां तो विमानतळूच नाका. तो बंद उडोवचो, अशी मागणी ह्या वेळार वेवसायिकांनी केली.
२०% लेगीत थळावे कामाक नात
मोपा विमानतळार २०% लेगीत थळावे कामाक नात. फकत हिंदी उलोवपी भायलेच लोक कामाक आसात. सगले तरेचे वेवसायूय तेच करतात. असो दावो टॅक्सी वेवसायीकांनी केला. फाल्यां मोपा विमानतळार जर कायदो सुवेवस्था इबाडल्यार हाका पुरायेन जापसालदार जीएमआर कंपनी आसतली, असो दावो ह्या वेळार वेवसायीकांनी केला. ताचे परस सरकारान हातूंत हस्तक्षेप करून आमकां न्याय दिवचो. ना जाल्यार आमी फुडलें पावल उबारतले, अशी शिटकावणी ह्या वेळार वेवसायिकांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
