भांगरभूंय | प्रतिनिधी
पेडणें: पेडणें म्हालांतल्या आंतरराष्ट्रीय मोपा विमानतळाक लागून पेडणें म्हालाची उदरगत जातली. सामान्यांक न्याय मेळटलो अशी पेडणेंच्या लोकांक अपेक्षा आशिल्ली. मात ह्या मनोहर आंतरराष्ट्रीय विमानतळाक लागून दर दिसा विंगड विंगड समस्यांक थळाव्यांक, शेतकारां, वेवसायिकांक तोंड दिवचें पडटा.
मोपा विमानतळावेलें उदक आसा तें सध्या दोंगरावेल्यान कासारवर्णे वाठारांत येवन व्हडा प्रमाणांत शेताचें लुकसाण करता. हाचेर आजूनय कसलेच उपाय करूंक ना. हें दोंगरांवेल्यान येवपी उदक एकेच वटेन वचनासतना चारूय वटांनी वता. हाका लागून एकेच सुवातेर लुकसाण जायना. सगल्या शेतांनी, बागायतींनी हें उदक घुसता. पोरूं घरांनीय उदक घुसपाचो प्रकार जाल्लो.
मोपा विमानतळा वेल्यान कासारवर्णेच्या दोंगरावेल्यान व्हांवपी उदक व्हाळांतल्यान आयिल्ल्यान ताची रुंदाय वाडून व्हाळा कुशीक आशिल्लीं झाडां कोसळपाक लागल्यांत. तशेंच पोशिल्ल्या आनी रानवटी जनावरांक आनी शेतकारां व्हाळा पलतडीं वचप शक्य जायनाशिल्ल्यान जनावरां गांवांनी भोंवपाक लागल्यांत. तशेंच सकयल्या वाठारांत उदका वांगडा फातर, शेकरो शेतांनी पावपाक लागिल्ल्यान शेतांय कांय वर्सांनी नश्ट जातलीं असो भंय शेतकार उदय महाले हांणी उक्तायला.
ह्या सगल्याचेर कितेंय उपाय काडपाक रान खातें, कृषी विभाग, जैवविविधतायेचे अधिकारी, उदकास्रोताचे अधिकारी, पी डब्ल्यू डी.चे अधिकारी आनी ग्रामपंचायतीन मेळून पेडणेंच्या उपजिल्लोधिकार्यान बसका घेवची. तशेंच उपाय म्हणून मोपा विमानतळावेल्यान व्हांवपी उदका खातीर राखणे वणट बांदची. अशें किरना जाल्यार शेतकारांक लुकसाण भरपाय दिवची. तशेंच थळावे आमदार प्रवीण आर्लेकार हांणी फुडाकार घेवन संबंदीत खात्याच्या अधिकार्यांची बसका घेवन हाचेर उपाय काडचो अशी मागणी शेतकारांनी आनी थळाव्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
