भांगरभूंय | प्रतिनिधी
टॅक्सी चालकांनी केलो खर विरोध
पणजी : पडणेंच्या मोपा विमानतळार टॅक्सी चालकांक ’पीकअप अँड ड्रॉप’खातीर जीएमआरान लागू केल्लें शुल्क मान्य नाशिल्ल्यान, हाका टॅक्सी चालकांनी खर विरोध सुरू केला. विरोध करपा खातीर कोलवाळे बुधवारा व्हडा संख्येन टॅक्सी चालक एकठांय आयले. संबंदीत अधिकारिणीन आमचे प्रस्न सोडोवचे अशी मागणी तांणी केली.
हे विशीं टॅक्सी चालकांनी म्हायती दितना सांगलें, टॅक्सी चालकांक जीएमआर ‘पीकअप अँड ड्रॉप’ खातीर २१० रुपया शुल्क घेतात आनी फकत २ मिनटां खातीर शुल्क घेतात. ड्रॉप करपाक आनी पीकअपा खातीर २ मिनटां खातीर शुल्क घेवप आमकां मान्य ना. संवसारांत खंयसरूय ड्रॉप करपा खातीर शुल्क घेनात. जाल्यार पिकअपा खातीर १० मिनटां उपरांत शुल्क घेवचें अशी आमची मागणी आसा. टॅक्सी चालकांक प्रवाशांक सोडपाक तेराशें ते मोपा चोवदाशें रुपया मेळटात. तांतले २१० रुपया जीएमआराक दिल्यार आमी कितें खावपाचें? असो प्रस्न टॅक्सी चालकांनी हाजीर केला. सध्या, हांगा जीएमआरची फकत दादागिरी सुरू आसा आनी ती आमकां अमानय आशिल्ल्याचें टॅक्सी चालकांनी सांगलें. हांगा मामलेदार आनी पुलीस आसात, तांचे वांगडा आमचे शिश्टमंडळ विमानतळ अधिकारिणीक मेळून प्रस्न विचारतलें अशें टॅक्सी चालकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
