भांगरभूंय | प्रतिनिधी
प्रधानमंत्री कचेरे कडल्यान तारीख निश्चीत ना
पणजी : मोपा विमानतळाच्या उक्तावणाची तयारी पुराय जाल्या. विमानतळाचें 11 डिसेंबराक प्रधानमंत्री नरेंद्र मोदी हांचें हस्तुकीं उक्तावण जावपाची शक्यताय आसा. तरी 11 डिसेंबर हे तारखेक प्रधानमंत्री कचेरे कडल्यान निश्चिती मेळूंक ना. मुख्यमंत्री डॉ. प्रमोद सावंत हांणी ही म्हायती दिली.
मोपा विमानतळाचें बांदकाम पुराय जावन उक्ताणाची तयारी सुरू आसा. प्रधानमंत्री नरेंद्र मोदी हांचें हस्तुकीं विमानतळाचें डिसेंबरांत उक्तावण जातलें. विमानतळाचें उक्तावण गोंय मुक्तीदिसा 19 डिसेंबराक जातलें अशी चर्चा आशिल्ली. आदले मुख्यमंत्री मनोहर पर्रीकार हांचो 13 डिसेंबराक जल्मदीस. तांच्या जल्मदीसा निमतान विमानतळाचें उक्तावण जातलें असो अदमास आशिल्लो. तरी लेगीत मुख्यमंत्र्यांनी 11 डिसेंबराक उक्तावण जावपाची शक्यताय आशिल्ल्याचें सांगलां.
विमानतळाचें काम पुराय जाल्लें आसलें तरी नांवाचो वाद सुरूच आसा. भाऊसायब बांदोडकार, जॅक सिक्वेरा हांचें नांव विमानतळाक दिवपाची मागणी आसा. नांव दिवपाचे मागणे खातीर सभा तशेंच बसकांचें आयोजन सुरू आसा.
मोपा विमानतळाक गोंयचे पयले मुख्यमंत्री सर्गेस्त भाऊसायब बांदोडकार हांचें नांव दिवचें अशें एक प्रकारचें चेपण सरकाराचेर वाडत आसा. सगल्यांत पयलीं भाऊसायब बांदोडकाराच्या नांवाची मागणी गोवा सुरक्षा मंचान केल्ली. हाचे उपरांत पेडण्यां भाऊसायब बांदोडकार प्रेमी नागरीक समितीची बसका जाली. ही बसका पेडण्यां जाली. हे बसकेंत भाऊंच्या नांवाची मागणी जाली. हाचे उपरांत मोरजी पंचायतीची ग्रामसभा जाली. ग्रामसभेंत भाऊंच्या नांवाची मागणी करपी थाराव संमत जालो.
महाराष्ट्रवादी गोमंतक पक्षाच्या केंद्रीय समितीन विमानतळाक भाऊसायबाचें नांव दिवचें अशी मागणी जाली. हे मागणेचो थाराव बसकेंत संमत जालो. ह्या थारावाची प्रत प्रधानमंत्री नरेंद्र मोदी, केंद्रीय हवाई येरादारी मंत्री ज्योतिरादित्य सिंदिया, भाजपाचे राष्ट्रीय अध्यक्ष जे. पी. नड्डा तशेंच मुख्यमंत्री डॉ. प्रमोद सावंत हांकां धाडून दिल्यात.
भाऊसायब बांदोडकार हे गोंयचे पयले मुख्यमंत्री आशिल्ले. मुख्यमंत्रीपदाच्या तांच्या कार्यकाळांत मुळाव्या सुविधांची उबारणी जाली. भाऊसायब हे भोवजन समाजाचे फुडारी आशिल्ले. ज्या म्हालांत मोपा विमानतळ जाता, त्या म्हाला खातीर भाऊसायबांनी बरोच वावर केला. भाऊसायबांच्या कार्याची याद उरपा सयत तांचे प्रती आदराची भावना समर्पीत करपा खातीर मोपा विमानतळाक भाऊसायबाचें नांव दिवप योग्य थारतलें अशें मगोन थारावांत म्हणलां.
मोपा विमानतळाचें नांव केंद्रीय नागरी उड्डाण मंत्रालय थारायतलें. राज्य सरकार नांव थारावंक शकना, अशें मुख्यमंत्री डॉ. प्रमोद सावंत हांणी हाचे पयलींच स्पश्ट केलां.
मोपा विमानतळाचें सगलें काम पुराय जालां. अॅरलायन कंपनींनी विमानांचें बुकींग करपाक सुरवात केल्या. मोपा विमानतळाक आदले मुख्यमंत्री आनी भाजपाचे फुडारी मनोहर पर्रीकार हांचें नांव दिवपाचो प्रस्ताव आशिल्लो. हे विशीं कोणेंच जाहीर उलोवप मात करूंक ना. हो विचार फुडें आयिल्लो आसतनाच गोवा सुरक्षा मंचाचे प्रा. सुभाष वेलिंगकार हांणी भाऊसायबाच्या नांवाची मागणी केली. हाचे उपरांत ही मागणी सेगीत जावपाक लागली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
