भांगरभूंय | प्रतिनिधी
यूके, उजबेकीस्तानांतल्यान आयले 21 हजार पर्यटक
भांगरभूंय । प्रतिनिधी
पणजीः मोपा मनोहर आंतरराष्ट्रीय विमानतळार चार्टड विमानांनी सुरवेक चड पसंती दिवंक ना. फक्त दोनूच देशांतल्यान 87 चार्टड देंवल्यांत, तातूंत यूके आनी उजबेकीस्तानाचो आस्पाव आसा. तातूंतलें उजबेकीस्तानाचें फक्त एकूच विमान आसा, अशी म्हायती नागरी उड्डाण मंत्री डॉ. प्रमोद सावंत हांणी लेखी जापेंत दिल्या.
गोंयांत 2020 ते आतां मेरेन कितलीं चार्टड विमानां आयल्यांत हाचे तपशील मडगांवचे आमदार दिगंबर कामत हांणी मागिल्ले. हाचेर जाप दितना नागरी उड्डाण मंत्र्यान विधानसभेच्या पटलार सांगलें, मोपा विमानतळाचेर देशी विमानां 5 जानेवारी 2023 ह्या दिसा देंवपाक सुरवात जाली, जाल्यार आंतरराष्ट्रीय विमानां 21 जुलय 2023 ह्या दिसाच्यान देंवपाक लागलीं.
जानेवारी 2023 ते मे 2024 मेरेन मोपा आंतरराष्ट्रीय विमानतळाचेर 87 चार्टड विमानां देंवलीं. तातूंतल्यान सुमार 21,616 पर्यटक गोंयांत आयले. यूके देशांतल्यान सुमार 85 चार्टड विमानां देवल्यात जाल्यार उजबेकीस्तानांतल्यान एकूच चार्टड गोंयांत आयलां.
यूकेच्या 84 चार्टड विमानांतल्यान 21,099 इतले पर्यटक गोंया आयिल्ले. नोव्हेंबर 2023 त 15 विमानांतल्यान 3,778 पर्यटक, डिसेंबरांत 18 विमानांतल्यान 4,992 पर्यटक, जानेनारी 2024 त 8 विमानांतल्यान 5,117 पर्यटक, फेब्रुवारींत 19 विमानांतल्यान 4,531 पर्यटक आनी मार्चांत 14 विमांनातल्यान 2,681 पर्यटक मोपा विमानतळाचेर देंविल्ले. जाल्यार 2023 त डिसेंबरांत फक्त एकूच चार्टड विमान उजबेकीस्तानांतल्यान देंविल्लें. तातूंतल्यान 62 पर्यटक गोंयांत आयिल्ले.
दाबोळी अंतरराष्ट्रीय विमानतळाचेर कितलीं चार्टड विमानां आयल्यात हाची म्हायती ना. हो विमानतळ भारतीय विमानतळ प्राधिकरण चलयता, ताका लागून दाबोळी विमानतळाची हे विशींची म्हायती नागरी उड्डाण संचालनालया कडेन ना, अशी म्हायती मंत्र्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
