भांगरभूंय | प्रतिनिधी
सुदीप ताम्हणकारः कांय दिसांनीच अधिसुचीत, अपप्रचार करपाचें बंद करपाचो उलो
भांगरभूंय । प्रतिनिधी
पेडणें: मोपा विमानतळार टॅक्सी स्टॅण्ड अधिसुचीत करचे खातीर मुख्यमंत्री, पेडणेंचे आमदार हांणी विवीध खात्याचे तशेंच येरादारी अधिकारी हांची बसका घेतल्या. ते बसकेंत मुख्यमंत्री आनी आमदारान टॅक्सी स्टॅण्डाचेर उपाय काडला. पूण पेडणेंच्यो कांय संघटणां ताका खो घालपाचो यत्न करतात आनी मोपा टॅक्सी स्टॅण्डा विशीं अपप्रकार करतात. तांणी तो बंद करचो, असो उलो टॅक्सी असोसिएशनाचे फुडारी सुदीप ताम्हणकार हांणी मारला. ताम्हणकार बुधवारा पत्रकार परिशदेंत उलयताले. ह्या वेळार तांचे वांगडा 19 टॅक्सी वेवसायीक हाजीर आशिल्ले.
मोपा विमानतळार पेडणेंच्या टॅक्सी वेवसायिकां खातीर हक्काचो टॅक्सी स्टॅण्ड अधिसुचीत जावचो हे खातीर फाटल्या कितल्याशाच म्हयन्यां सावन आमी यत्न करतात. ह्या टॅक्सी स्टॅण्डा खातीर सरकारान मंजुरी दिवन फुडाकार घेतला. पूण पेडणेंच्यो कांय संघटणां अपप्रचार करून तातूंत फूट घालपाचो यत्न करतात. मोपा विमानतळ वाठारांतल्या गांवांतल्या मर्यादीत लोकांकूच मोपा विमानतळा वयल्या टॅक्सी स्टॅण्डाचो लाव जातलो, अशें सांगून त्यो दिशाभूल करतात. येरादारी कायद्याच्या नेमा प्रमाण पेडणें म्हाला खातीर हो टॅक्सी स्टॅण्ड मेळटलो. ताका लागून आपूण पेडणेंच्या टॅक्सी वेवसायिकांनी पीसीपीओ फॉर्म येरादारी खात्या कडेन भरचो अशें मागतां. कारण हो फॉर्म भरले उपरांतूच तांकां प्राधान्यक्रमान थंय वेवसाय करपाची संद मेळटली, अशें ताम्हणकार हांणी सांगलें.
मोपा विमानतळार पेडणें म्हालांतल्या टॅक्सी वेवसायिकांक हक्काचो टॅक्सी स्टॅणअड मेळटलो. सरकार दरबारांत आमदार आनी स्वता मुख्यमंत्र्यान हो प्रस्न सुटावो करपाचें आमकां उतर दिलां. ते नदरेन सरकारी अधिकारी कामाक लागल्यात. रोखडोच हो टॅक्सी स्टॅण्ड अधिसुचीत जातलो. टॅक्सी वेवसायाची कांयच म्हायती नाशिल्ले एके संघटणेचे प्रतिनिधी, अॅड. प्रसाद शहापूरकर तशेंच हे संघटणे कडेन कसलोच संबंद नाशिल्लें निवृत्त अधिकारी भास्कर नारुलकार चुकीची म्हायती दिवन दुसऱ्याची दिशाभूल करतात. टेम्पो वेवसायीक उदय महाले हांकांय टॅक्सी वेवसाया विशीं कांयच खबर ना. ताका लागून तांणी ह्या प्रस्नांत हस्तक्षेप करून लोकांची दिशाभूल करची न्हय, अशें ताम्हणकार हांणी सांगलें.
टॅक्सीकार भावांचो विशय आतां सुटपाक पावला. हाचें दुख्ख कांय जाणांक जालां. तांणी नाका जाल्लें सांगून अपप्रचार करचो न्हय, अशी कळकळीची मागणी ताम्हणकार हांणी केल्या.
हे पत्रकार परिशदेक असोसिएशनाचे पदाधिकारी रुपेश कुमरकार, राजू नर्से, प्रदीप पटेकार, उद्देश धावस्कार, विश्वास नागोजी, राहुल कोलवाडकार, सत्यवान गडेकार, प्रकाश आंबेडकार, संदेश आनी हेर टॅक्सीकार हाजीर आशिल्ले.
उमेश उमरालकार हांणी सांगलें, सुदीप ताम्हणकार हांच्या फुडारपणा खाला आयज टॅक्सीकार भाव फाटले कितलेशेच म्हयने मोपा विमानतळाचेर टॅक्सी स्टॅण्ड अधिसुचीत जावचो हे खातीर सरकार दरबारी यत्न करतात. मतदारसंघाचो आमदार ते खातीर यत्न करता. तांची मुख्यमंत्र्यां वांगडा बसका जाली. ते बसकेंत मोपा विमानतळार टॅक्सी स्टॅण्ड अधिसुचीत करपाचें आमदाराक ठोस आस्वासन दिलां आनी ते नदरेन कार्यवाही लेगीत सुरू जाल्या. ही कार्यवाही कांय टॅक्सीकारांक सोंसना. तांणी ह्या प्रकरणांत हस्तक्षेप करचो न्हय, असो उलो रुपेश कुमरलकार हांणी मारला. राजू नर्से हांणी सांगलें, टॅक्सी वेवसाया कडेन संबंदीत आशिल्ले आनी जाका ह्या वेवसायाचें ज्ञान आसा असो फुडारी सुदीप ताम्हणकार हांच्या फुडारपणा खाला फाटले कितलेशेच म्हयने पेडणें म्हालांतल्या टॅक्सीकार भावांच्या हिता खातीर यत्न करतात. तांणी सरकार दरबारांत हांणी हो विशय लावन धरिल्ल्यान ताचें फळ म्हूण कांय दिसांनी मोपा विमानतळार टॅक्सी स्टॅण्ड अधिसुचीत जातलो. हाका लागून पेडणेंच्या व्हड प्रमाणांत टॅक्सीकारांक रोजगाराच्यो संदी मेळटल्यो. मात जांकां टॅक्सी वेवसायाची मातूय म्हायती ना, मातूय अभ्यास ना अशे काय जाण हातूंत आडखळ हाडपाचो यत्न करतात. तांणी तशें करचे न्हय, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
