मोपा केजी सुरू करपाक थळाव्यांचो विरोध

भांगरभूंय | प्रतिनिधी

पोरणी शाळा नुतनीकरणाची मान्यताय रद्द करपाची मागणी

पणजी: मोपा, पेडण्यां पोरणी आनी मोडूंक पाविल्ले शाळेचे इमारतींत पूर्व मुळावें विद्यालय (केजी) सुरू करपाक थळाव्या लोकांनी खर विरोध केला. ह्या इमारतीच्या नुतनीकरणा खातीर दिल्ली परवानगी रोखड्या रोखडी रद्द करून पालक शिक्षक संघाचेर मर्यादा हुपिल्ले खातीर गरजेची ती कारवाय करची अशी मागणी थळाव्या लोकांनी शिक्षण खात्या कडेन केल्या.

शिक्षण खात्याच्या जिल्हो सहाय्यक शिक्षण निरिक्षकां सयत शिक्षण खात्याचे प्रशासकी संचालक, सरकारी मुळावी आनी उच्च विद्यालयाचे मुख्याध्यापक, थळावे आमदार आनी सरपंच हांकां निवेदनाच्यो प्रती धाडून दिल्यात.

हालींच शाळेच्या पालक शिक्षक संघान तशेंच शाळा वेवस्थापन समितीन पेडणें म्हालाच्या विभागीय शिक्षण निरिक्षकांक (एडीईआय) पत्र सादर करून इमारत नुतनीकरणाची मागणी केल्ली. ते प्रमाण फाटल्या 10 जून दिसा शिक्षण खात्याच्यो प्रशासकी संचालक वर्षा नायक हांणी सर्वे क्रमांक 12/0 मदली मोपा सरकारी विद्यालयाचे पोरणे इमारतींत केजी वर्ग सुरू करून ही शाळा उपेगांत हाडपा खातीर इमारतीच्या नुतनीकरणाच्या कामाक परवानगी दिल्ली.

पूण हे इमारतींत केजीचे वर्ग सुरू करपा विशीं पालक शिक्षक संघ वा विद्यालयाच्या मुख्याध्यापकांनी ग्रामस्थांक विस्वासांत घेवंक नाशिल्ल्याचो दावो करून ह्या पूर्व प्राथमीक विद्यालयाक थळाव्या लोकांनी खर विरोध केला.

फाटल्या 50 वर्सां पयलीं सावन विद्यालयाची इमारत बंद आशिल्ली इमारतीचें पाखें मोडून फक्त वण्टी उब्यो आसात आनी त्यो जीर्ण जाल्यात. गांवांतल्या भुरग्यांक शिक्षण मेळचें हे खातीर आदले मुख्यमंत्री सर्गेस्त भाऊसायब बांदोडकार हांकां सांतेरी माऊली देवस्थानान ही सुवात दिल्ली.

रावनाथ भाटले अशें ह्या सुवातेचें नांव आसून ताची विक्री वा दानपत्र सरकार वा शिक्षण खात्याच्या नावांन केल्लें नासून ही जमीन देवस्थानाच्या मालकीची आसा. शाळेची ही सुवात रानांतली आसून हांगा रानवटी जनावरांचो वावर आनी खणीचे फोंड आशिल्ल्यान भुरग्यांचे सुरक्षे खातीर लोकांनी ही शाळा बंद करपाची मागणी करून गांवांत दुसरी कडेन जमीन घेवन नवी शाळा बांदिल्ली.

हे नवे शाळेंत फाटलीं 50 वर्सां शिक्षणाचे वर्ग सुरू आसात. तशेंच हे शाळे सयत आंगणवाडीची गुणवत्ताय बरी आसा. तरी लेगीत केजी सुरू करून आवयभाशेंतल्यान मेळपी शिक्षणा पसून पालक शिक्षक संघ भुरग्यांक पयस करूंक पळयता. गांवांत आंगणवाडी आसतना ही केजी कित्या खातीर असो प्रस्नूय थळाव्या लोकांनी उप्रासायला. शाळेच्या मुख्याध्यापकां कडेन हाचें स्पश्टीकरण मागलां. पूण तांणी ते दिवपाचें टाळ्ळें.

ह्या एकंदर स्थिती प्रमाण शाळेच्या पोरण्या इमारतींत केजी वर्ग सुरू करपा खातीर शाळेचें नुतनीकरण करपा खातीर दिल्ली मान्यताय येता त्या 15 दिसां भितर रद्द करची. तशेंच आपली मर्यादा हुपिल्ले खातीर शिक्षण खात्यान पालक शिक्षक संघाचेर कारवा करची, नाजाल्यार थळाव्या लोकांक आंदोलनाचो मार्ग आपणावचो पडटलो अशी शिटकावणी ह्या निवेदनांतल्यान दिल्या.