भांगरभूंय | प्रतिनिधी
पणजी : मोपा विमानतळ पुलीस स्टेशनांत मोपा विमानतळार परवानगे बगर प्रवासी येरादारी करतना उबर टॅक्सी सेवे कडेन संबंदीत चालक आनी वेवस्थापना आड गुन्यांव नोंद केलो. कागाळदार वास्कोचे सहाय्यक परिवहन संचालकांनी दिल्ले म्हायती प्रमाण, चालक देवेंद्र सातार्डेंकार हांणी जीए-०६-टी-८७२३ ह्या वाहनांतल्यान उबर मोबायल ऍपावरवीं प्रवाशांक टॅक्सी सेवा दिवपाचें काम केलें. हें सगलें राज्य परिवहन परवानो आनी हेर खंयचेच परवानगे बगर जाल्ल्याचें तांणी नमूद केलें. असल्या बेकायदेशीर येरादारीक लागून गोंय येरादारी कायदे मोडप जाता. तशेंच प्रवाशांचे सुरक्षेक धोको निर्माण जाता आनी राज्य सरकाराच्या महसुलाचें लुकसाण जाता.
ह्या प्रकरणांत गुन्यांव दाखल केला. ६ ऑगस्टाकूय मोपा विमानतळार असोच प्रकार उक्तडार आयिल्लो. वागातोर-कायसुव टॅक्सी ऑपरेटर संघटणेच्या टॅक्सी चालकांनी बुधवारा मोपा पुलीस स्टेशनांत सोमनाथ कोरगांवकार (वास्को) ह्या उबर कडेन संबंदीत टॅक्सी चालकाक मोपा विमानतळार सेवा दितना धरिल्लो.
ह्या प्रकरणाची आयज विधानसभेंतूय नोंद घेतली. आमदार व्हेझी व्हिएगस हांणी हो मुद्दो हजर करून कोलवेचे अशेच एके घडणुकेचो उल्लेख केलो. परवानगी नासतना उबर सेवा दिवपी चालकाक काल थळाव्यांनी धरिल्लो. हाचेर मुख्यमंत्र्यांनी योग्य ती कारवाय करपाचें आस्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
