भांगरभूंय | प्रतिनिधी
पणजीः मनोहर आंतरराष्ट्रीय विमानतळ मोपा सुरू जायत सावन आतां मेरेन 84.44 लाख प्रवाशांनी यो – वच केलां. हातूंत 42.65 लाख प्रवासी विमानतळाचेर देंवल्यात जाल्यार 41.78 लाख प्रवासी विमानतळा वयल्यान दुसऱ्या थळार गेल्यात, अशी म्हायती नागरी उड्डाण खात्यान दिल्या.
विधानसभेंत विरोधी पक्ष फुडारी युरी आलेमांव हांणी विचारिल्ल्या प्रस्नाक नागरी उड्डाण मंत्री तशेंच मुख्यमंत्री डॉ. प्रमोद सावंत हांणी लेखी जाप दिल्या.
जानेवारी 2023 जेन्ना मोपा विमानतळ सुरू जालो तेन्ना सावन डिसेंबर 2024 मेरेन देशी विमानांतल्यान 41.04 लाख प्रवासी विमानतळाचेर देंवल्यात जाल्यार 40 लाख प्रवाशांनी मोपा विमानतळा वयल्यान दुसऱ्या थळाचेर प्रवास केला. जुलय 2023 ते डिसेंबर 2024 मेरेन 13.73 लाख प्रवासी आंतरराष्ट्रीय विमानांतल्यान मोपा विमानतळाचेर देंवल्यात आनी 12.73 लाख प्रवासी मोपा विमानतळा वयल्यान आंतरराष्ट्रीय थळांचेर गेल्यात.
नोव्हेंबर 2023 ते मार्च 2024 मेरेन 21,202 पर्यटक चार्टर विमानांतल्यान मोपा विमानतळाचेर देंवल्यात. जाल्यार ह्याच काळांत 20,845 पर्यटक चार्टर विमानांतल्यान परत गेल्यात. बाकीच्या दिसांनी चार्टर विमानां मोपा येवंक नात. जानेवारी 2023 ते मे 2024 मेरेन वेळापत्रक नाशिल्ल्या खाशेल्या विमानांतल्यान 3094 प्रवासी मोपा देंवल्यात जाल्यार ह्याच काळांत 1794 प्रवासी मोपा विमानतळा वयल्यान गेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
