भांगरभूंय | प्रतिनिधी
आमदार व्हेन्झी व्हिएगसः फुडारांत विचार करून मतदान करचें
भांगरभूंय । प्रतिनिधी
मडगांवः मोपा विमानतळ जायत सावन दक्षीण गोंयांतल्या पर्टयनाचेर परिणाम जाला. दक्षीण गोंयांत पर्यटक आदले वरी येतना दिसनात. दर्यादेग वाठारांतलो आपूण आमदार आनी आपल्याक हाची कल्पना आयल्या. शॅक्स, रॅस्टोरंण्टांनी सप्तकाचे अखेरेक गर्दी आसतली, आतां तशी स्थिती ना, अशें आमदार व्हेन्झी व्हिएगस हांणी सांगलें.
दाबोली विमानतळा वयली विमान सेवा मोपा वयल्यान सुरू जाल्या, ते विशीं उलयतना आमदार व्हिएगस हांणी ताचो परिणाम फुडारांत आनीक खर जातलो, अशी भिरांत उक्तायली. बाणावली दर्यादेग वाठाराचो विचार केलो जाल्यार शॅक्स, रेस्टॉरंण्ट आनी हॉटेलांनी फक्त 40 टक्के मेजां, कुडी भरिल्ल्यो दिसतात. दक्षीण गोंयांत हे आदीं मार्चांत दर सप्तकाचे अखेरेक पर्यटन मोसम सुरू जाल्ल्याचें दिसतालें. तशें आतां दिसना. पर्यटकांची संख्या उणी जाल्या. दरवर्सा पर्यटकांची संख्या उणी जायत आसा. हे आदीं सप्टेंबरांत सुरू जावपी शॅक्स डिसेंबर मेरेन सुरू करिनात. ताका लागून आनीक लुकसाण जाता. ते खातीर पर्यटन खात्यान मे म्हयन्याच्यान शॅक्स वाटपाची प्रक्रिया सुरू करून ऑगस्ट मेरेन शॅक्सांचें वांटप करचें, अशी मागणी आमदार व्हिएगस हांणी सांगलें. गोंय सरकार दाबोळी विमानतळ बंद जावचो ना, अशें सांगता, पूण दाबोली विमानतळा वयल्यो विमान कंपनीं कडल्यान थंयची सेवा बंद करून मोपा विमानतळा वयल्यान सेवा सुरू करतात. मोपा विमानतळा वयलें हाताळणी शुल्क उणे आसा, दाबोळीचें चड आसा. हे खातीर मोपा विमानतळा वयल्यान सेवा दिवपी विमान कंपनींक लेगीत सोपेंपण मेळटलें. गोंय सरकार दाबोळी विमानतळ बंद करचो नात, अशें सांगतात खरें, पूण केंद्रा कडल्यान ते खातीर कसलीच उपाय येवजण जातना दिसना. कतार अॅरवेजाची सेवा बंद जावप ही सुरवात आसा. दाबोली बंद जावचो ना हाची खात्री गोंय सरकारा कडल्यान दिनात. दोनूय विमानतळ सुरू उरचे हे खातीर भाजप सरकारान सत्तेंतल्यान भायर सरपाची गरज आसा. हे खातीर लोकांनी फुडल्या वेंचणुकांनी विचार करून मतदान करपाची गरज आसा, अशें व्हिएगस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
