भांगरभूंय | प्रतिनिधी
केंद्रांतल्या राष्ट्रीय लोकशाय आघाडी सरकारान काल, पयरूच तिसऱ्या सरकाराचे शंबर दीस पुराय केले. प्रधानमंत्री नरेंद्र मोदी हांच्या फुडारपणा खालच्या सरकाराक अजून सुमार साडेचार वर्सांचो प्रवास करपाचो आसा. ते खातीर ही वाटचाल वयले वयर दिसता तितली सोंपी ना हें निश्चीत. तिसऱ्या सरकारांतले पयले शंबर दीस पुराय करतनाच केंद्रान ‘वन नेशन वन इलेक्शन’ च्या प्रस्तावाक मंजुरी दिवन आपलो फुडलो मार्ग अदीक बिकट करून दवरिल्लो आसलो तरी प्रधानमंत्री मोदी आनी तांचे सरकार हाचेर तितलें ठाम आशिल्ल्याचें दिसता. लोकसभेंत सुमार दुपेटीन वाडिल्ल्या विरोधी आघाडीच्या वांगड्यांचो विचार करीत जाल्यार एकठांय वेंचणुको घेवपाचें काम तडीक व्हरप हें सरकारा खातीर एक आव्हानच आसतलें. ‘वन नेशन वन इलेक्शन’ प्रस्तावा बगर सरकारा मुखार अजून खूबशीं आव्हानां फुडारांत उबीं रावतलीं, आनी ताका लागून प्रधानमंत्री मोदी हांचे खातीर उरिल्लो साडेचार वर्सांचो काळ तसो सोंपो नासतलो. पयल्या शंबर दिसांत वक्फ बोर्डाचे क्लिश्ट अशा प्रकरणांत मार्गाक लावपाचें आव्हान सरकारान स्विकारलां, आनी थंय लेगीत सरकार फाटीं घेवपाचे मनस्थितींत ना. खूब काळ आडकून पडिल्लें जनगणनेचें कामूय सरकाराक हातांत घेवपाचें आसा. आतां जाती जनगणनेच्या विरोधकांनी दिल्ल्या आव्हानाकूय सरकार कशें सामकार वता हें पळोवपाचें आसा.
2026 उपरांत जावपी जनगणेने उपरांत लोकसभा मतदारसंघांची फेररचणूक करपाची तरतूद कायद्यांत केल्ली आशिल्ल्यान लोकसभेच्यो सुवातोय 2029 चे वेंचणुकेंत वाडूंक शकतल्यो. आनी तशें जायत जाल्यार प्रधानमंत्री नरेंद्र मोदी हांच्या सरकारा मुखार तेंवूय एक व्हड आव्हान आसतलें. विरोधकांनी आपल्या वाडिल्ल्या वांगड्यांच्या बळाच्या आदाराचेर सरकाराचेर केन्ना नाशिल्लें तें चेपण घालून तांकां फाटीं धुकलपा खातीर तंत्र आपणायिल्लें आसलें तरी ह्या चेपणाक नरेंद्र मोदी बळी पडटले अशें मात दिसून येना.
सरकाराचे शंबर दीस पुराय जातकच प्रधानमंत्री नरेंद्र मोदी जे तरेन विरोधकांचेर तुटून पडले तें पळयत जाल्यार फुडल्या साडेचार वर्सांत आपलो अजेंडाच तांणी सेट केल्ल्याचें दिसून येता. ‘वन नेशन वन इलेक्शन’ चो प्रस्ताव मंजूर करून जाल्यार सरकारान विरोधकांक अजापाचो जबरदस्त धक्को दिला. तातूंतल्यानूच सरकारान पुराय तरेन विचार करून रणनिती आंखिल्ली दिसता. लोकसभा आनी विधानसभा वेंचणुको एकाच वेळार घेवपाच्या मार्गांत सरकाराक खूबश्या अडचणींक तोंड दिवचें पडटलें हें तर स्पश्ट आसा. पूण अशा अडचणींतल्यान मार्ग काडप हीच मोदी सरकाराची बलस्थानां आसात. वक्फ बोर्ड कायद्यांत दुरुस्ती सुचोवपी विधेयक संसदेच्या जोड समिती कडेन (जेपीसी) विचारार्थ सोंपोवपाचो सरकाराचो निर्णय हो विरोधी इंडी आघाडीक आपलें जैत दिसता आसलें तरी वास्तव मात वेगळेंच आसा आनी विरोधकां खातीर ती गुगली थारची.
मोदी सरकारा कडल्यान आयिल्ल्या खंयच्याय प्रस्तावा कडेन सकारात्मक नदरेंतल्यान पळोवप विरोधकां खातीर सद्या वर्ज्य आशिल्ल्याचें चित्र सद्या दिसता. अशे फाटभुंयेर सरकार उरिल्ल्या काळांत आपलो अजेंडा मुखार कसो व्हरतलें हो प्रस्नूच आसलो. देशहिताच्या खूबश्या प्रस्तावांचेर सहमती घडोवन हाडपाची जिद्द सरकार बाळगून आसा. लोकसभे खातीर फुडली वेंचणूक वाडीव सुवातां खातीर जावंक शकतली असोय अदमास आसा. 2002 च्या परिसीमन कायद्यान 2026 मेरेन लोकसभेच्यो सुवातो वाडोवपाक बंदी आसा. कायद्यांत स्पश्ट म्हणलां की 2026 उपरांत करतल्या जनगणनेच्या आदाराचेर मतदारसंघाची फेररचणूक करूं येतली. तशेें जाल्यार लोकसभा मतदारसंघाच्या फेररचणुकेचेंय मोटें आव्हान सरकारा मुखार आसतलें. आदीं 2027 वर्सा जनगणना, त्या आदाराचेर मतदारसंघाची पुनर्रचणूक आनी उपरांत एकठांय म्हणल्यार विधानसभा आनी लोकसभा हांची वेंचणूक घेवप अशी आव्हानांची माळूच सरकारा मुखार उबी आसा. 2021 वर्सा जावपी जनगणना कोरोनाच्या म्हामारीक लागून जावंक शकली ना, आनी 2027 वर्सा ती जावंक शकता. ताकाच लागून 2029 मेरेन मतदारसंघ फेरचणुकेचो मार्ग सुकर जातलो. हाचे आदीं ज्या निकशांचेर लोकसभेतल्या सुवातांची संख्या निश्चीत केली तेच निकश लायल्यार 2027 चे जनगणे उपरांत लोकसभेंतल्या सुवातांची संख्या दोनशे-अडेचशेन वाडूंक शकता असोय अदमास बांदतात. वाडीव सुवातां मदीं एक तृतियांश सुवातो अर्थांतूच नारी शक्ती वंदन अधिसुचोवणेचेर बायलां खातीर आरक्षीत आसतलो आनी सरकाराक त्या आघाडीचेर काम करचें पडटलें.
विरोधी इंडी आघाडी प्रधानमंत्री नरेंद्र मोदी हांकां चारूय वटांनी घेरपाचो यत्न करीत आसतना ते विचलीत जायनासतना सरकार ‘वन नेशन वन इलेक्शन’ चो शिवधोनू उबारपाचें आव्हान स्विकारीत अशें दिसूंक नाशिल्लें. पूण थंय लेगीत मोदी हांणी देशाक धक्कोच दिलो. ‘बॅलेट इज स्ट्राँगर देन बुलेट’ अशें म्हणटात. प्रधानमंत्री नरेंद्र मोदी हांकां हातूंतल्यान घडये तेंच सिद्ध करपाचें आसत. आदले राष्ट्रपती रामनाथ कोविंद हांचे अध्यक्षताये खाला उच्च समितीचो अहवाल स्विकारप म्हणल्यारच एकठांय वेंचणुको घेवपाचो सरकाराचो इरादो तातूंतल्यान स्पश्टपणान दिसून येता. ‘वन नेशन वन इलेक्शन’ ही संकल्पना तशी देशाक नवी नाच. पूण आयच्या विरोधकांक तातूंत सरकाराचो वेगळोच डाव आशिल्ल्याचो वास येता. प्रत्यक्षांत तशेंच कांयच ना हाची कल्पना आसून लेगीत भाजपाक ताचो राजकी फायदो मेळचो न्हय हे खातिरूच विरोधकांचो खटाटोप आसा. हातूंत कसलोच दुबाव ना. एक राष्ट्र एक वेंचणूक प्रस्तावाचे बाबतींत विरोधकांनी जो भ्रम निर्माण केला तो पयस करपाचें खूब मोटेंे आव्हान लेगीत सरकारा मुखार आसा. देशांत वर्सभर कायम वेंचणुकांचें जें दुश्टचक्र फाटल्या तीन चार दसकां परस चड काळ चालू आसा. त्या चक्रांतल्यान देशाक भायर काडप इतलेंच सरकाराचो ह्या प्रस्तावाची अंमलबजावणी करपा फाटलो प्रामाणीक हेत आसा हें न्हयकारूं येना. तातूंतल्यान देशाचो विकासदरूय वाडटलो आनी दाव्यातूय अतिशयोक्ती ना. पांच वर्सांतल्यान एकदांच मतदानाक वचप ही कल्पनाच कितली बरी दिसता. आतां सरकारान ही सगलीं आव्हानां तर स्विकारल्यांतूच. तातूंत तांकां कितले मेरेन येस येतलें हें फुडारांत कळटलेंच.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
