भांगरभूंय | प्रतिनिधी
नवी दिल्ली, खबरां संस्था : मोदी सरकार सत्तेर आयले उपरांत फाटल्या णव वर्सांत देशांतल्या थेट कर वसुलींत (Direct Tax Collections) १६० टक्क्यांनी वाड जाल्या हें आंकडेवारींतल्यान स्पश्ट जालां. २०२३- १४ वित्तीय वर्सा ६,३८,५९६ कोटी रुपया कर वसुली आशिल्ली. ते आतां २०२२- २३ ह्या अर्थीक वर्सा १६,६३,६८६ कोटी रुपया जाले. ह्या णव वर्साच्या काळांत वट्ट प्रत्यक्ष कर संकलनांत १७३.३१ टक्क्यांनी वाड जाल्या.
केंद्रीय प्रत्यक्ष कर मंडळान (CBDT) अर्थीक वर्स २०२२- २३ मेरेनचे कर वसुलीचो आंकडो जाहीर केला. २०१३- १४ त वट्ट प्रत्यक्ष कर संकलन ७,२१,६०४ कोटी रुपया आशिल्लें जें १७३.३१ टक्क्यांनी वाडून १९,७२,२४८ कोटी रुपया जालां.
सीबीडीटीन म्हणलें, २०१३- १४ त देशांत डायरेक्ट ते डीजीपी गुणोत्तर ५.६२ टक्के आशिल्लें, जें २०२२-२३त ६.११ टक्के जालां. २०१३- १४ ह्या वर्सा वट्ट ३.८० कोटी आयकर रिटर्न भरिल्लें, जातूंत १०४.९१ टक्क्यांनी वाड जावन ती ७.७८ कोटी रुपया जालें.
तशेंच ३१ डिसेंबर २०२३ मेरेन मुल्यांकन वर्स २०२३- २४ खातीर आयकर रिटर्न भरपी लोकांचो आंकडो ८.१८ कोटी जाला, जो फाटल्या वर्सा ७.५१ कोटी आशिल्लो. २०२३- २४ च्या मुल्यांकन वर्सा ९ टक्के चड आयकर रिटर्न भरले. आयकर विभागान करदात्यांक AIS आनी TIS ची सुविधा सुरू केल्या उपरांत करदात्यांचो आंकडो वाडलो.
सीबीडीटी प्रमाण, २०१३- १४ त वट्ट ५,२६,४४,४९६ कर दाते आशिल्ले जांचो आंकडो २०२२- २३ त ९,३७,७६,८६९ मेरेन वाडला. आकडेवारी प्रमाण, २०१३- १४ ह्या अर्थीक वर्सा संकलनाचो खर्च वट्ट संकलनाच्या ०.५७ टक्के आशिल्लो जो २- २२- २३ त ०.५१ टक्के जाला.
केंद्रीय अर्थमंत्री निर्मला सीतारमण १ फेब्रुवारीक अर्थसंकल्प जाहीर करतली. लोकसभा वेंचणुके पयलीं सादर जावपी ह्या अंतरीम अर्थसंकल्पांत करदात्यांक बरी बातमी मेळपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
