भांगरभूंय | प्रतिनिधी
नव्या ऊसाच्या हंगामा खातीर एफआरपी वाडयली
नवी दिल्ली : खरीप पिकांच्या एमएसपीत वाड केले उपरांत मोदी सरकारान ऊस शेतकारांकय व्हड भेट दिल्या. प्रधानमंत्री नरेंद्र मोदी हांचे अध्यक्षते खाला जाल्ले मंत्रीमंडळ बसकेंत मोदी सरकारान फुडल्या हंगामा खातीर ऊसाचे रास्त दर वाडोवपाचो निर्णय घेतला. मंत्रीमंडळाच्या अर्थीक वेव्हार समितीन 2023-24 हंगामा खातीर ऊसाच्या एफआरपींत दर क्विंटलाक 10 रुपया वाडोवपाची घोशणा केल्या. नवी एफआरपी आतां दर क्विंटलाक 315 रुपया आसतली.
मंत्रीमंडळ बसकेंत घेतिल्ल्या निर्णयांची म्हायती दितना म्हायती आनी प्रसारण मंत्री अनुराग ठाकुर हांणी सांगलें, ऊस शेतकारांक ऊसाच्या एफआरपीक दर क्विंटला फाटल्यान 10 रुपया वाडोवपाचो निर्णय मोदी सरकारान घेतला. ऊसाचेर एफआरपी म्हळ्यार योग्य किंमत थारावन ऊस शेतकारांक तांच्या उत्पादनाची हमी रक्कम दितात.
ह्या निर्णयाचो लाव 5 कोटी ऊस शेतकारांक जातलो. हाचे वांगडाच ऊस कारखान्यांत आनी ताचे संबंदीत काम करपी 5 लाख कर्मचाऱ्यांकय ह्या निर्णयाचो फायदो जातलो. ऑक्टोबर म्हयन्या सावन ऊसाचो नवो हंगाम सुरू जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
