भांगरभूंय | प्रतिनिधी
सी टी रवीः पर्वरे शेतकारां कडेन मारल्यो मेकळेपणान गजाली
भांगरभूंय । खबरां मेज
पणजीः प्रधानमंत्री नरेंद्र मोदी हांच्या फुडारपणा खालच्या केंद्रांतल्या सरकारान 9 वर्सांच्या कार्यकाळांत लोककल्याणाक प्राधान्य दिवन देशाच्या हिताचो वावर केला, अशें भाजपाचे गोंय राज्य प्रभारी तशेंच कर्नाटकाचे आदले मंत्री सी टी रवी हांणी सांगलें.
भाजपाच्या संपर्क से समर्थन मोहिमेंत वांटो घेतिल्ले सी टी रवी पर्वरेच्या सुकूर पंचायत वाठारांतल्या श्री वेताळ महारुद्र संस्थाना लागसार आयोजीत शेतकारांचे बसकेंत उलयताले. तांचे वांगडा पर्यटन मंत्री रोहन खंवटे, अशोक खंवटे, भाजपा प्रदेशाध्यक्ष सदानंद तानावडे, पर्वरी मंडळ अध्यक्ष किशोर अस्नोडकार तशेंच सरपंच, पंच आनी जिल्हो पंचायत वांगडी हाजीर आशिल्ले.
केंद्रांतलें मोदी सरकार सदांच लोकांच्या कल्याणा खातीर वावुरलें. दरेका मळार भारताक आत्मनिर्भर करपाच्या उद्देशान वावुरपी सरकारान स्टार्ट अपच्या माध्यमांतल्यान उद्देग मळाक घटसाण दिली. कृशीप्रधान भारतांतल्या शेतकारांच्या उदरगतीच्या येवजण्यांक प्राधान्य दिलें. भलायकी मळाचेर लोकांक भलायकी विम्याचें सुरक्षा कवच उपलब्ध करून दिलें. पर्यटन उदरगतीच्यो येवजण्यो आंखतना, देखो अपना देश संकल्पने खाला देशी पर्यटन उदरगतीक म्हत्व दिलें, अशें सी टी रवी हांणी सांगलें.
रवी हांणी पर्वरी मतदारसंघांतल्या साई मंदीर, वेताळ महारुद्र देवस्थानाक भेट दिली. साई मंदिराचे पदाधिकारी सेल्वराज गौंडर, वेताळ महारुद्राचे अध्यक्ष आनी आदले उपसभापती उल्हास अस्नोडकार हांणी रवी हांचे सयत मंत्री खंवटे, आनी प्रदेशाध्यक्ष तानावडे हांकां येवकार दिलो.
पर्वरी मतदारसंघांतल्या कांय मानेस्तांच्यो लेगीत रवी हांणी मंत्री खंवटे, तानावडे आनी हेर पक्ष पदाधिकारी हांचे सयत वैयक्तीक भेटी घेतल्यो. ह्या वेळार तांणी विवीध मळा वयल्या मानेस्तां कडेन संवाद सादलो आनी मोदी सरकाराच्या वावराची म्हायती पुस्तिका तांकां भेटयली.
पीएनटी वसणूक, सुकूर पंचायत वाठारांतल्या कांय मानेस्तांक ते मेळ्ळे. तातूंत अॅड. जगन्नाथ मुळगांवकार, बालरोग तज्ञ डॉ. सिडनी पिंटो, अब्राहीम आगा हांचो आस्पाव आशिल्लो.
गांवांतल्या आपमजत गटांच्या वांगड्यांचे बसकेंतूय रवी हांणी मार्गदर्शन केलें. ह्या वेळार मंत्री खंवटे हांणी मोदी सरकाराच्या वावराची तुस्त केली. णव वर्सांच्या पर्जळीत कामगिरीक लागुनूच आयज भारत संवसारांत नं. 1 जावपाचे वाटेर आसा, अशें तांणी सांगलें. शेतकार हो कृशीप्रधान भारताचो म्हत्वाचो घटक आसा. तांचें गोंयकारान लेगीत सदांच हीत पळयलां. संपर्क से समर्थन मोहिमे खाला केंद्रांतल्या मोदी सरकाराच्या वेगवेगळ्या मळा वयले कामगिरीची म्हायती लोकां मेरेन पावयतात, अशेंय मंत्री खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
