भांगरभूंय | प्रतिनिधी
सदानंद शेट तानावडेः दक्षीण गोंयांत पल्लवी धेंपो हांची प्रचाराक सुरवात
भांगरभूंय । प्रतिनिधी
वास्कोः नरेंद्र मोदी हांचे बगर पर्याय नाशिल्ल्यान भाजपाचें जैत निश्चीत आसा. वास्कोच्यान प्रचाराक सुरवात जाल्या. दीसभरांत दाबोळी मतदारसंघांत लेगीत प्रचार करतले. बिरेस्तारा 29 मार्चाक शिरोड्यां आनी फोंड्यां प्रचार भोंवडी जातली. 5 एप्रीला मेरेन सगळ्या मतदारसंघांनी प्रचार भोंवडी जातली. ते उपरांत अर्ज भरचे आदीं परतून एकदां प्रचार भोंवडी जातली, अशें खासदार सदानंद शेट तानावडे हांणी सांगलें.
भाजपाची दक्षिण गोंय उमेदवार पल्लवी धेंपे हांणी बुधवारा 27 मार्चाक सकाळीं ग्रामदैवत श्री दामोदर देवाचें दर्शन घेवन प्रचाराक सुरवात केली. उमेदवार पल्लवी धेंपे येताच ढोलताशांच्या गजरांत तशेंच महिला कार्यकर्त्यांनी उवाळून येवकार दिलो. ह्या वेळार तांणी खासदार सदानंद शेट तानावडे, वास्कोचे आमदार कृष्णा साळकार, मुरगांवचे नगराध्यक्ष गिरीष बोरकार, नगरसेविका शमी साळकार, दक्षीण गोंय जिल्हो पंचायत अध्यक्ष सुवर्णा तेंडुलकार, जिल्हो पंचायत वांगडा अनिता थोरात, भाजप वास्को मंडळ अध्यक्ष दीपक नायक, जयंत जाधव, दिलीप काजळे, संदीप नार्वेंकार, किरण नायक, रुपेश पालयेंकार, प्रशांत नार्वेंकार तशेंच हेर कार्याकर्त्यां सयत देव दामोदराचें दर्शन घेतलें. ह्या वेळार पुजारी भुषण जोशी हांणी देवाक गाराणें घातलें. ते उपरांत तानावडे उलयताले.
दक्षीण गोंयांत भाजप आमदारांची संख्या अदीक आशिल्ल्यान तशेंच संबंदीत आमदारांनी आनी सरकाराक तेंको दिवपी आमदारांनी भाजपा उमेदवाराक वेंचून हाडपाचें आस्वासन बसकेंत दिलां. आमचे कडेन 33 आमदार तसेंच जिल्हो पंचायती आसात. ताका लागून दोनूय उमेदवार जिखतले, हातूंत मातूय दुबाव ना, अशें तानावडे हांणी सांगलें.
आमदार साळकार हांणी सांगलें, कार्यकर्त्यांची उमेद पळयल्यार वास्को मतदारसंघांतल्यान भाजप उमेदवाराक 16 हजारां परस अदीक मतां पडटली हातूंत दुबान ना. भाजपाचे कार्यकर्ते प्रचाराच्या वावराक लागल्यात. भाजप उमेदवाराक सगळ्या धर्मांतल्या लोकांचो तेंको आसा. उमेदवार पल्लवी धेंपे हांणी वास्कोचे भोंवडेंत कांय मानेस्तां वांगडा चर्चा केली. सांजेच्या 4 वरांच्या सुमाराक तांणी भाजप कार्यकर्त्यांचे बसकेंत हाजेरी लायली. तांचे भोंवडेक लागून ह्या मतदारसंघांत वेंचणुकेचें वातावरण निर्मिती जाल्ल्याचें दिसून आयलें. तांचे वांगडा तानवडे हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
