मोदींची ‘हमी’ जिखली

भांगरभूंय | प्रतिनिधी

राजस्थान, मध्य प्रदेश, राजस्थानांत फुल्लें कमळ; तेलंगणान दिलो काँग्रेसीक हात

खबरां संस्था

नवी दिल्लीः चार राज्यांच्या विधानसभा वेंचणुकांचे निकाल काल स्पश्ट जाले. ही मोदीची हमी आनी मोदीची हमी म्हणल्यार पुर्ततेची हमी, अशें प्रधानमंत्री नरेंद्र मोदी हांणी दिल्ली मुख्यालयांत उलयतना सांगलें. राजस्थान, मध्य प्रदेश आनी छत्तीसगडाच्या निकाला उपरांत आतां 16 राज्यांनी भाजपाची सत्ता येतली. देशांतली सुमार 52 टक्के लोकसंख्या भाजपा शासीत प्रदेशांनी रावता. 12 राज्यांनी स्वबळार आनी 4 राज्यांनी आघाडेच्या भागिदारां वांगडा भाजपाची सत्ता आसा.  काँग्रेसीची फक्त 3 राज्यांनी आनी युतीक लागून 5 राज्यांनी सत्ता आसा.

राजस्थानांत पांच वर्सांनी सरकार बदलपाची परंपरा कायम

राजस्थानांत परतून एकदां दर पांच वर्सांनी सरकार बदलपाची परंपरा कायम उरली. हे विधानसभा वेंचणुकेंत भाजपाक भोवमत फावो जालें. हार स्विकारून मुख्यमंत्री अशोक गेहलोत हांणी राज्यपालां कडेन राजिनामो दिला.

आदली मुख्यमंत्री वसुंधरा राजे हांणी सांगलें, राजस्थानांत मेळिल्लें पर्जळीत जैत हें प्रधानमंत्री नरेंद्र मोदी हांणी दिल्ले गॅरेंटीचें जैत. हार मानून घेतना असोक गेहलोत हांणी सांगलें, काम करून लेगीत आमकां येस मेळूंक ना. हो एक अनपेक्षीत निकाल.

राजस्थानांत धपके दिवपी निकाल

हे वेंचणुकेंत धपके दिवपी खूबशें निकाल लागले. सभापती डॉ. सी. पी. जोशी हारले. परसादीलाल मीना, प्रताप सिंह, खाचरिया सयत काँग्रेसीच्या 25 तल्या 17 मंत्र्यांक खावची पडली हार. विरोधी पक्ष फुडारी राजेंद्र राठोड आनी विरोधी पक्ष उपफुडारी सतीश पुनिया हांचीय हार जाल्या.

छत्तीसगडांत काँग्रेसीक व्हड धपको

छत्तीसगडांत कांग्रेसीक व्हड धपको बसला. तांचे उपमुख्यमंत्री टीएस सिंहदेव, प्रदेशाध्यक्ष दीपक बैज हांचे सयत कांय मंत्री वेंचणुकेंत हारल्यात.

आदले मुख्यमंत्री रमण सिंह हांणी म्हणलें, छत्तीसगड महतारी की जय. छत्तीसगडांतल्या भाजपाच्या ह्या व्हड जैता फाटल्यान लोकांचो आशिर्वाद तशेंच नकेंद्रीय फुडाऱ्यांची खर मेहनत तशेंच कार्यक्षम फुडारपण आसा.

मध्य प्रदेशांत भाजपाक दोन तृतियांश भोवमत

मध्य प्रदेश विधानसभेंत भाजपाक दोन तृतियांशा परस चड भोवमत मेळ्ळें. हे वेंचणुकेंत विशेश म्हणल्यार सपा, बसपा, आप वा अपक्ष हांकां खातें उक्तें करपाक जालें ना. भाजप- काँग्रेसी उपरंत भारत आदिवासी पक्ष हो एकूच पक्ष आसा जाचो उमेदवार जैतिवंत जालो. फाटले खेपे मध्य प्रदेशांत 4 अपक्षां सयत 2 बसपा आनी 1 सपा उमेदवार जैतिवंत जाल्लो.

लाडली बहन येवज गेम चेमजर थारली अशें केंद्रीय मंत्री ज्योतिरादित्य सिंधिया हांणी म्हणलां.

ग्वाल्हेर- चंबळ सयत राज्यांतल्या लोकांनी काँग्रेसीक ताची सुवात दाखोवन दिल्या. राजस्थान- छत्तिसगडांत लाडली बहना ना, पूण तरी लेगीत आमकां थंय जैत मेळ्ळां. हें प्रधानमंत्री नरेंद्र मोदीच्या करिश्म्याचें जैत आसा, अशें सिंधिया हांणी सांगलें.

दोशांचें विश्लेशण करतलेः कमलनाथ

हे सर्तींत आमकां मध्य प्रदेशच्या मतदारांचो निर्णय मान्य आसा. आयज विरोधी पक्ष म्हूण आमी आमचे लागणुकेक बांदील रावतले. जैता खातीर भाजपाक आपूण परबीं दितां. आमी दोशांचे विश्लेशण करतले. आमी आमचो मुद्दो मतदारांक कित्याक समजावपाक शकले ना, तेंवूय पळयतले, अशें कमलनाथ हांणी सांगलें.

तेलंगणांत काँग्रेसीक जैत

तेलंगणांत काँग्रेसीन भोवमत मेळयलां. विधानसभेच्या 119 सुवातांतल्यो 68 सुवातो काँग्रेसीन जिखल्यो.

काँग्रेसी खातीर तेलंगणांतल्यान गेम चेंजर थारले ते खासदार रेवंत रेड्डी. तांणी कोलगंडा मतदारसंघांतल्यान जैत मेळयलें. तेच मुख्यमंत्रीपदाचे दावेदार आसात, अशें म्हणटात.

मध्य प्रदेश, छत्तिसगड आनी राजस्थानांतले हारी उपरांत काँग्रेस खासदार राहूल गांधी हांणी आपली प्रतिक्रिया दिल्या. ह्या राज्यांतली हार आपूण स्विकार करतांस अशें तांणी एका ट्विट वरवीं म्हणलां.

विचारधारेचो लडो चालूच उरतलो. तेलंगणांतल्या लोकांचो आपूण खूब उपकारी. आमी निश्चीतपणान तेलंगणा लोकाभिमुख करपाचें आस्वासन पुराय करतले. मेहनती खातीर आनी तेंक्या खातीर सगळ्या कार्यकर्त्यांचे खूब खूब उपकार अशेंय राहूल गांधी हांणी म्हणलां.

चार जातींक सक्षम केल्यार देश सक्षमः मोदी

राजस्थान, छत्तिसगड आनी मध्य प्रदेशांत भाजपाक जैत मेळ्ळे उपरांत प्रधानमंत्री नरेंद्र मोदी दिल्लींतल्या पक्ष मुख्यालयांत पावले.

जातींक फोडपाचे खूब यत्न केले. आपूण सेगीत सांगतालो, आपले खातीर फक्त चार जाती सगळ्यांत व्हड आसात. स्त्री शक्ती, युवा शक्ती, शेतकार आनी गरीब आपलीं कुटुबां आसात. ह्या चार जातींक सक्षम करून देश सक्षम जातलो. आयजूय आपल्या मनांत तीच भावना आसास अशें मोदी हांणी ह्या वेळार सांगलें.

आयज दरेक गरीब मनीस सांगता, तो स्वता वेंचणूक जिखला. दरेक शेतकार, वंचीत आनी आदिवासी भाव- भयणां आपणें जाका मतदान केलें तांचें हें जैत म्हूण ते  खोशयेंत आसात. आपलें पयलें मत जैताचें कारण थारलां, अशें दरेकलो पयले खेपे मतदान केल्लो सांगता, अशें मोदी हांणी सांगलें. हे वेंचणुकेंत भाजपाच्या जैताची जापसालदारकी देशाच्या भयणांनी घेतिल्ली. आयज आपूण तांकां सांगतां, भाजपान तांकां दिल्लीं आस्वासनां 100 टक्के पुराय जातलीं.