भांगरभूंय | प्रतिनिधी
भांगरभूंय । प्रतिनिधी
म्हापशेंः बोडगेश्वर मैदानार आयोजीत केल्ले एमआरएप मोटोग्रीप सुपरक्रॉस अॅक्शन चॅम्पियनशीप सर्तींत एका 20 वर्सां पिरायेच्या रायडराक आयिल्ल्या अपघाती मरणाक जापसालदार आशिल्ल्यांचेर कारवाय करपाची मागणी प्रदेश काँग्रेसाचो म्हणयारो संजय बर्डे हांणी केल्या. जे सुवातेर ही सर्त आयोजीत केल्ली ती सुवात ही सर्त घेवपाक योग्य आशिल्ली कांय कितें, शेत जमनींत मातयेचो भराव घालून ही सर्त घेवपाक कोणे परवानगीदिल्ली हाचीय चवकशी जावपाक जाय अशें तांणी म्हणलां.
शेत जमनींत भराव घातल्यार फ्लाईंग स्कोड व प्रशासकीय यंत्रणा कारवाय करता. कायद्याचें उल्लंघन करून शेत जमनीन सर्त घेतली आनी तातूंत एक तरणाट्याचो जीव गेलो. शेतांत अशे तरेच्यो धोक्याच्यो सर्ती आयोजीत करपाक परवानगी कशी मेळपाक शकता, असो प्रश्न बर्डे हांणी सोमाराक म्हापश्यांत पक्षाच्या कार्यालयांत घेतिल्ले पत्रकार परिशदेंत केलो. ह्या वेळार म्हापशें पालिका मंडळाचो नगरसेवक शशांक नार्वेकार आनी सितेश मोरे हाजीर आशिल्ले.
सर्ती खातीर जे रेस ट्रॅक तयार केल्ले ते सुरक्षेचे नदरेन सारके आसात काय ना हाची तपासणी कोणे केल्ली. सुरक्षेच्या सगळ्या निकशांक पाळो दिवंन अशे तरेच्यो सर्ती आयोजीत करपाक जाय. पुलिसांनी हे सगळें प्रकरण गंभीरतायेन घेवन चवकशी करपाक जाय अशें तांणी सांगलें.
शेत जमनींत माटोव घालून प्रदर्शना आयोजीत करपाक पालिका परवानगी दिला. पूण मोटोग्रीप सुपरक्रॉस सर्त म्हणल्यार प्रदर्शन नाशिल्लें. सर्ती खातीर उपजिल्होधिकारी कार्यालयान खऱ्यानीच परवानगी दिल्ली, म्हापशें पालिकेन सगळे ना हरकत दाखले तपासून परवानगी दिल्ली काय कितें हे तपासून पळोवपाक जाय अशें शशांक नार्वेकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
