भांगरभूंय | प्रतिनिधी
प्रेमांत, झुजांत (आनी राजकारणांत) कितेंय चलता, हो गैरसमज. पूण, ताका तरणाटे सदांच बळी पडिल्ले दिसतात. मोगांत मार पसून खाल्यार ‘आमचे आमी पळोवन घेवं’, ही भूमिका दोनूय वटेन आसता. प्रेमभंग जाल्यार मात खून करपा मेरेन हेच मोगी पावलां उबारतात. हालींच दिवचल वाठारांत एक घडणूक घडली. मेळिल्ले म्हायती प्रमाण, एका 19 वर्सांच्या चल्यान नेण्टे मोगिकेक आडवाटेच्या देवळांत व्हेली. थंय विनयभंग केलो, मागीर ताका बरेंच बडयलें. तें चली देवळाच्या सोंपणाचेर पडलां, तो व्हिडियो व्हायरल जाला. तोय त्या चल्यानूच काडला खंय. पुलिसांनी त्या मोग्याक स्कुटरी सयत ताब्यांत घेतला. चलयेच्या भावान कागळ केल्या, पूण कुटुंब हें प्रकरण मिटोवपाक सोदता खंय. मुखार कांय जावचें ना, तो चलो त्रास दिवपाक शकता, अशी घडये तांकां भिरांत आसतली. पूण आतां चवकशीचीं चक्रां घुंवपाक लागल्यांत. राजकी फुडारी मदीं पडले नात, जाल्यार चल्याक पोक्सो कायद्या खाला अटक जावं येता.
दिवचलचे ते शिक्षणीक संस्थेंत हाचे आदींय मोगा वयल्यान, मस्ती करपाच्या उद्देशान विद्यार्थ्यां मदीं मारामारी जाल्या. पूण हीं प्रकरणां कॅम्पसा भायर जाल्ल्यान ताची कागाळ जावंक ना. आनिकूय बऱ्योच घडणुको घडल्यात. अर्थांत मोगा सारक्या प्रकरणांत शिक्षक फक्त शिटकावणी दिवन सोडटात. कारण भुरग्यांक तापोवपाक, मारपाक बंदी आसा. शिक्षक, पालक, समाजाचें लक्ष जाय, ही गजाल खरी, पूण सगल्यांत व्हडली जापसालदारकी खुद्द चलो, चलयेचेर आसता. तीं नेण्टीं आसलीं तरी. आपूण शाळेंत शिकपाक वता, मोग करपाक न्हय, हें तांणी मतींत धरूंक जाय. येवपा- वचपाक स्कुटर मेळटा, खावपाक मेळटा, म्हूण मोग करपीय आसात. मोग हो कुड्डो, अशें म्हणलें, तरी डोळसपणान मोग्याक, मोगिकेक पारखूनच पावल मुखार घालूंक नाका? नाजाल्यार मागीर चली असो मार खाता वा रेल्वे पोंदां आत्महत्या करपा सारकें चुकीचें पावल चलो उबारता. फाटल्यान आवय- बापायक कितें भोगचें पडटलें, हाचो पसून हीं चार दिसांचीं जोडपीं विचार करिनात.
मोगांत दोन काळजां जिखतात, अहंकार हारता. न्हय हारपाकूच जाय. तरणाटेपणांत हार्मोन्स वाडटात, भावना तीव्र जाता. निर्णय घेवपाची तांक नासता. आकर्शण आनी मोग हातूंतलो फरक कळना. तातूंत सिनेमा, टिव्ही माळो, ओटीटी, सोशल मिडियाचेर जें कितें दिसता, तें स्वता करीन दिसता. रील आनी रियल लायफांत फरक आसता. काॅलेजींनी भुरग्यांक चड मेकळीक आसता. सगल्यांचो मोगी आसा, तुजोच ना, हें उणेपण अशें इश्टांचो गट सांगीत आसता. सोशल मिडिया खातीर 24 वरां संपर्क, तातूंत कसल्याय कारणान केस्तांव करतकच मोग आनीक वाडटा हो गैरसमज, चॅटींग हें सगलें मोगाक सारें- उदक घालता. पालक आनी भुरग्यां मदलो संवाद उणो जाला. घरांनी खर वातावरण आसा थंय लिपून मोग चलता, मेकळीक आसा थंय मनाक येता तें करप जाता.
दिवचलचें तें फक्त प्रेमप्रकरण न्हय, तर हिंसा, मालकी हक्काची मानसीकताय. समाजाच्या वा चलयेच्या फुडाराच्या हुस्क्यान पालक मुखार सरपाक पयलीं फाटीं फुडें जाताले. पुलिसांनी जें कितें केलें, तें योग्यूच. ‘मोगान अशें घडटाच’ असो चुकीचो संदेश कोणे दिवचो न्हय. ‘आपल्या मना आड जालें काय तिडकीन घोव बडयता, तें म्हाका खूब आवडटा, मर्दपणाचें लक्षण तें,’ अशें 20- 22 वर्सां पयलीं एका सर्वेक्षणांत बायलांनी सांगिल्लें. आतां हायस्कुलांनी बरे नातेसंबंद, नितळ इश्टागत ह्या विशयाचें शिक्षण वा कार्यशाळा घेतल्यार बऱ्यो. पालकांनीय भुरग्यांच्या फोनाचेर, वागणुकेचेर नदर दवरची. मोग करप चुकीचें न्हय, पूण चुकीचें नातें धोक्याचें, हें सगल्यांनीच मतींत दवरचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
