भांगरभूंय | प्रतिनिधी
23 वर्सां पयसुल्ल्या प्रवासाक बसीन भोंवप जालें, लागसारचो प्रवास चलत. बस वचना थंय वचप म्हळ्यार कोणाकूय “बाबा, मात्सो येता रे गाडी घेवन वांगडा” अशें म्हणून दोन-तीन कडेन तरी म्हणचें पडटालें. आवय म्हणपाक लागली, “थोडी रक्कम आयल्याच हातांत, चड चिंतू नाका, नवी गाडी घेवयाच आतां” मुखार आनिकूय शिकपाच्या सपनार दोन रोदां वतात अशें दिसपाक लागलें म्हूण हांव तिचे नवे गाडी घेवपाच्या यत्नाक तेंको दिवंक फाटीं फुडें जातालें. “इतलीं वर्सां गाडी नासतना काडल्याच, आनी एक वर्स काड, मागीर हांव पळयतां.” अशेंय म्हाका दिसतालें. मे म्हयन्यांत फाटीक लगिल्ली आवय, हांव पिएचडी अॅडमिशनाची वाट पळयता पळयता गाडी घेवप जुलय मेरेन धुकल्लें. आवय इतलो तेंप बरे भशेन सांगताली, दर दिसा तिचें पाशियेंस एक एक इंचान उणें जायत वतालें. निमाणे थोमण्यांचो भडिमार सोसूं नजो जाताना हांव फक्त कॉटेशन घेवन घरा आयलें. हिरो प्लेजर आनी होंडा एक्टिवाचें.
प्लेजर घेवपाचें सपन आशिल्लें. ती एन्टीक दिसता म्हूण चड मनांत भरिल्ली. पूण जेन्ना हांवें एक्टिवा चलोवंक हातांत घेतली तेन्ना म्हाका खंयची गाडी घेवपाची आसा हें चितूंक एक सेकंद लेगीत लागलो ना. आवडिल्ली 125cc ची, पूण अर्थीक प्रस्नाचाे विचार करून 110cc एक्टिवा पसंत केली. मुखा वेलो प्रस्न व्हडलो. “कलर खंयचो?” सगल्या लागसारच्या आमिगांची सुचाेवणी आयकून निमाणें हांवें म्हाका जाय ताेच कलर निवडलो. ‘मेट ग्रे’. जाचेर खूब जाणांनी टिका केली खरी, पूण सगल्या कलरां परस म्हज्या मनाक तोच चड आवडिल्लो. करण तो चकचकतालो. पूण म्हाका कोण कितें म्हणटांत ताचें पडून वचूंक नाशिल्लें. तो म्हजो निर्णय आनी कोणाची सुचोवणी आयकुची आनी कोणाची काना पड्ड्याक आपटून लेगीत ती परतून धाडची हे खातीर म्हजो मेंदू बेस बरो जाणां.
मेट ग्रे फायनल जालो. अर्दे पयशे भरून, उरिल्ले दोन वर्साच्या इन्स्टॉलमेंटाचेर उडयले. पिएचडीचें सपन पयस वता अशें दिसूंक लागलें. दुसऱ्या दिसा गाडयेची आरटीओ नोंदणी करपाक हांवूच गेलें. हरशीं म्हूण घराच आसतालें. सरकारी ऑफिसांतले कटकटींतल्यान आवयक पयस दवरपाक लागून, गाडी हांवें म्हाज्याच नांवार करून घेतली. निमाण्या पांवड्यार गाडयेचो नंबर कळपा वेळार जिवाक जी धाक धूक जाल्ली ती अजून ताजी आसा. 24 जुलयक गाडी घरा हाडपाचें थारलें. म्हजे कडेन लायसन नाशिल्ल्यान भाईक वांगाडा घेवन गेलें. सकाळीं णवाचे बसीर दोगांय होंडा शोरुमांत गेलीं. धा पंदरांक पावलीं. साडे धा म्हणसर गाडी भायार काडली. तिका पळोवन म्हाजें काळीज जे भरिल्लें तें अजून तशेंच भरून रकता.
“हरशीं नवी गाडी घेवप म्हळ्यार खोशयेची गजाल. पूण तुजें मुखामळ हळवें अशें जालां?” म्हजो गाडी घेतना काडिल्ल्या फोटवाक पळोवन खूब जाणांनी प्रस्न केलो. आतां तांकां कशें सांगचें? रिते जिणेंत आपलो हक्काचो कोणूय येतना, कशें जावचे हाल काळजाचे? तिका घट्ट धरून रडूं इतकें मन भरून आयिल्लें. पयलीं सावन एकलें भोंवपाची संवय आशिल्ली, पूण अतां म्हजे जिणेंत एक सांगातीन आयिल्ली. तिच्या येण्यान हांव सुखान चिप्प भिजलें. एक निर्जीव गजाल जिणेंत इतली खोस हाडूंक शकता हें पयलेच फावटी अणभवतालें. तिका आपली म्हूण स्पर्श करतना काळजांत जें कितें जालें तें उतरांनी मांडप शक्य ना.
म्हजी ‘मोगाची राणी’ मनशा परस कमी न्हय. तिचेर विस्वास दवरून हांव कितलेय पयस एकलेंच वता. लायसन मेळसर हांव तिका तिळामळार (केपें) दवरून फुडलो प्रवास बसीन करतालें. लायसन मेळून लेगीत म्हाका आवय गाडये वांगडा सैल सोडिनाशिल्ली. पूण तिचे वांगडा हांवें भोंवपाचें सोडलें ना. मेळटा ती वाट धरून वर्सभरांत कितें कितें पळयलें म्हूण नेम ना. कसलोच भंय नासतना हांव नेतुर्लेच्यान पणजें कितलेशेच फावटी एकलेंच वता आनी येता. केन्नाच एकलें भोंवता अशें दिसलेंच ना. तिच्या येण्यान म्हज्या जिवितांत लख्ख उजवाड पडला. पावानाशिल्ल्या त्या सोयऱ्यांगेर पावलें, तिकाच लागून. हांव बदल्लां, तिच्या सांगातान. म्हजे काळीज आतां दोन टायरांचेर चलता. आतां तिचे बगर खंयूय वता आसतना कोणेय हडकिल्यार हांव तांकां हात दखोवपाचो सोडून दाव्या हाताचो अांगठो दामतां. हॉर्न मारूंक. खंयूय चलत वतना फाटल्यान कोण येता असो दिसल्यार, फाटीं वळून पळोवपाचे सोडून हांव हारशे सोदतां.
उपमा गांवकार
9421591502
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
