भांगरभूंय | प्रतिनिधी
कोणाच्याय मोगान पडप हो एक सामको मनीस स्वभावांतलो सैमीक गूण. तातूंत भावनीक गुंतवणूक, आकर्शण, संवाद आनी समजूत हांचो आस्पाव जाता. हे अणभव जिणेक समृध्द करतात. दर खेपे हो संबंद मोगांत रुपांतरीत जाताच अशें ना, पूण आवडट्या मनशा वांगडा आशिल्ल्यान कितें तरी शिकप, समजून घेवप आनी तीच ह्या अणभवाची खरी सोबीतकाय.
दर दिसा तरेकवार लोक आमच्या जिवितांत येता आनी वता. पूण अचकीत एक मनीस येता ताका पळोवन मन खोशी जाता. तागेलो सभाव आपले सारको दिसता आनी त्या एका खिणाक तुमचे खातीर ती व्यक्ती प्रिय जाता. संवसारांतल्या विरुद्ध लिंगिक मनीस जातीक जेन्ना एखाद्रो दुसरो मनीस आवडटा तेन्ना ताचो नेमको अर्थ कितें आसता? तशें वयल्यान विचार केल्यार हो प्रस्न सादो कसो दिसता, पूण ताचे फाटल्यान भावना, अणभव, आकर्शण, संवंय, संवाद आनी संबंद हांचे खोलायेन समन्वय लिपिल्लो आसता. जेन्ना आमकां कोणूय आवडटा तेन्ना ताचो अर्थ फकत ताचें रूप, उलोवप वा वागणूक असो न्हय, तर त्या मनशा कडेन आमचो मानसीक, भावनीक आनी केन्ना केन्नाय आत्मीक संबंदान नाळ जुळटा. आकर्शणाची चड करून नदरेंतल्यान सुरूवात जाता. हांसप, उलोवणें वा वागणूक आमकां आवडपाक लागता. पळोवंक सोबीत आसूं वा एक वेगळीच शैली आसूं, ताचे भितर आमकां कितें तरी वेगळें दिसता आनी लक्ष आकर्शीत करता हीच आकर्शणाची सुरवात. हें फकत पयलें पावल. हाचे उपरांत आकर्शण तिगून उरलें जाल्यार ताचे फाटल्यान कांय खोल भावना रिगतात.
कोणा कडेन आमचो संवाद उक्तो, सोंपेंपणान आनी आनंददायक घडटा तेन्ना त्या मनशा विशीं आमचो मोग वाडटा. त्या मनशा कडेन उलयतना कितलो वेळ पासार जाता हाची जाणविकाय उरना, विचारांचीं सहजपणान देवाण घेवाण करतात, हें एक लक्षण तुमकां त्या मनशा विशीं खाशेलें दिसता. संवाद म्हणल्यार फकत उतरां न्हय, तर समजून घेवप, समजूत, फट उलय नासतना आपलें विचार व्यक्त करप व्यक्त आनी आयकुपाची घेवपाची तयारी हांचो मेळ. केन्ना केन्नाय मनीस तुमचे लागीं भावनीक पांवड्यार जोडटा. तांची समजूत, आदार, विचारांची खोलाय आनी आमचें भावनांची संवेदनशीलताय त्या मनशा कडेन आमचें नातें घट करता. हें आकर्शण फकत क्षणीक न्हय, तर खोल आनी चड पुराय स्वरूपी आसता.
त्या मनशाच्या सांगातांत सुरक्षीतताय जाणवता आनी तांच्या सांगातांत रावपाची आमकां प्रामाणीक इत्सा तयार जाता. जेन्ना आमी मनशा भितर आमच्या सारकेच कांय खाशेलेंपण पळयतात जशें मुल्यां, पसंती, विचार करपाची पद्दत तेन्ना तो मनीस आमकां लागींचो कसो जाणवता. पूण फकत सारकेंपण न्हय, तर थोडो फरकय आकर्शक थारपाक शकता. तिचो वा तेगोलो खंयचीय गजाली कडेन पळोवपाची वेगळी नदर, गजाली करपाची पद्दत आमचे मनांत नवें चैतन्य भरता. ताका लागून त्या मनशा विशीं आमचे भितर आस्था निर्माण जाता आनी आमकां पुराय वेळ लागीं रावपाची इत्सा तयार जाता.
केन्ना केन्नाय चड वेळ एका मनशा वांगडा पासार जाता. मागीर तो मनीस ल्हवू ल्हवू तुमच्या जिविताचो एक भाग जाता. सुरवेक फकत तोंड वळखीचो मनीस संवकळीचो जाता फुडें तिचे/ ताचे बगर दीस पुराय जावचो ना अशें दिसता तेन्ना भावनीक न्हय, मानसीक आदार जोडटा. ल्हवू ल्हवू दोगांलेय सुख- दुख्ख आनी खोस जाणवपाक लागता आनी अचळय नात्यांत घुस्पतात. फुडें हें नातें इतलें वाडटा की तें ताचें रुपांतर मोगांत जाता. त्या मनशा बगर जिणेची कल्पना करप ना ताणें केल्ल्या सगल्या गजालींनी स्वताक गुंतवप, तांच्या मुखामळार हांसो घालपाचो यत्न करप हीच मोगांत पडपाची सुरवात. आवडप आनी मोग करप हांचे मदीं एक ल्हान अंतर आसता – पूण एकदां तें हुपल्या उपरांत भावनेची खोलाय आनी चड जापसालदार जाता. आवडपाक लागतकूच ती/ तो तुमचे कडेन संवाद सादतली, तुमकां वेळ दितली आनी समजतली असल्यो अपेक्षा निर्माण जातात. पूण ह्यो अपेक्षा दर खेपे पुराय जायनात. देखून त्या मनशा कडेन आमी आकर्शीत जाले तरी आमकां वास्तव मान्य करचें पडटा.
केन्ना केन्ना हो “मोग” एके वटेनचो आसूं येता, ल्हवू ल्हवू वेदना, निराशा वा गैरसमजाचें रूप घेवंक शकता. दरेका मोडणार समृध्द जावपी मोग हो अज्ञात मार्गाचेर चलपा सारको आसूंक जाय, म्हजे मतान मोग मोगाळ घरा सारको आसूंक जाय जो तुमकां येवकार दिवपाक आनी तुमकां मायेची उबद दिवपाक सदांच तयार आसता.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
