भांगरभूंय | प्रतिनिधी
संकल्प आमोणकारः मुरगांवच्या 19 शाळांचें एकठांय स्नेहसंमेलन
भांगरभूंय । प्रतिनिधी
मुरगांवः जे मेरेन आपली मोख मेळना ते मेरेन जिद्द सोडूं नाकात, असो सल्लो मुरगांवचे आमदार संकल्प आमोणकार हांणी विद्यार्थ्यांक दिलो.
मुरगांव म्हालांतल्या 19 सरकारी मुळाव्यो आनी पूर्व माध्यमीक विद्यालयांनी बायणाच्या रवीन्द्र भवनांत एकठांय वर्सुकी स्नेहसंमेलन मनयले. अशे तरेचो हो पयलोच प्रयोग आशिल्लो, तो खुबूच येसस्वी जालो. सरकारी मुळाव्यो आनी पूर्व माध्यमीक विद्यालयां एकाद्या स्नेहसंमेलनाचो खर्च उखलपाक शकना. ताका लागून ह्या सगळ्या शाळांनी एकटांय येवन स्नेहसंमेलन मनोवचें हे खातीर मुरगांव म्हाल उपविभागीय शिक्षणाधिकारी संजना केरकार हांणी संकल्पना मांडली. हाका लागून सगळ्या विद्यालयांतल्या विद्यार्थ्यांक आपली कला दाखोवपाची संद मेळ्ळी. भारत हे संकल्पनेचेर विवीध राज्यांतल्या लोकगितांचेर विद्यार्थ्यांनी नाच सादर केले. ह्या नाचांनी चडांत चड विद्यार्थ्यांक आस्पावन घेतिल्ल्यान पालकांनी खोस उक्तायली.
हे कार्यावळीक मुखेल सोयरे म्हूण आमदार आमोणकार, मानाचे सोयरे म्हूण शिक्षण खात्याचे उपसंचालक डॉ. उदय गांवकार, खाशेले सोयरे म्हूण चिखलीचे उपसरपंच कमलाप्रसाद यादव, रमेश विश्राम राणे ट्रस्टाचे अध्यक्ष भुपेश राणे तशेंच संजना केरकार हाजीर आशिल्ली.
जंय बरे विचार आसतात थंय काम बरें जाता. पालकांनी भुरग्यांक बरे गजाली खातीर उर्बा दिवची. भुरगीं देशाचो फुडार आसा. ते जर शिक्षणांत फाटीं पडले जाल्यार देशाचे उदरगतीचेर परिणाम जातलो, अशें कमलाप्रसाद यादव हांणी सांगलें.
डॉ. गांवकार हांणी नव्या शिक्षण धोरणाची थोडे भितर म्हायती दिली. ह्या नव्या शिक्षण धोरणाक लागून भुरग्यांक आपले आवडीचो विशय घेवपाक मेळटलो. तातूंत करिअर करपाक मेळटलें, अशें तांणी सांगलें.
ह्या वेळार मुरगांव म्हालांत उत्कृश्ट सरकारी मुळावें, पूर्व माध्यमीक विद्यालया खातीर रमेश विश्राम राणे ट्रस्टान दवरिल्लो घोळटो करंडक दाबोलीच्या सरकारी मुळाव्या पूर्व माध्यमीक विद्यालयान मेळयली. आमदार आमोणकार हांचे हस्तुकीं घोळटो करंडक आनी करंडक दिले. ह्या वेळार विद्यालयांतल्या दरेका गुणेस्त विद्यार्थ्याक तशेंच विशेश विद्यार्थ्यांक यादस्तीक चिन्न दिवन भोवमान केलो. हीं यादस्तीक चिन्नां बगळी कुटुंबान पुरस्कृत केल्ली. संजना केरकार हांणी येवकार दिलो. शिक्षिका अंकिता बगली हांणी वर्सुकी नियाळ सादर केलो. शिक्षिका नीता तळवणेकार आनी अलका लांबोर हांणी सुत्रसंचालन केलें जाल्यार शिक्षिका सुचिता गाड हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
