मोंसेरात, पर्रीकार पॅनलां मदीं जातली लडत

भांगरभूंय | प्रतिनिधी

पणजी म्हापालिका वेंचणुकेची तारीख आयज जातली जाहीर

पणजी: पणजेचे उदरगतीक प्राधान्य दिवपी आनी पणजेकारांच्या पसंतीच्या उमेदवारांचें पॅनल म्हापालिका वेंचणुकेंत हांंव दवरतलों अशें उत्पल पर्रीकार हांंणी सांंगलें. सुरेंद्र फुर्तादो, दत्तप्रसाद नायक, मिनीन डिक्रुझ हांंचे सयत सगल्या पक्षांचो तेंका पॅनलाक आसतलो अशें तांंणी सांंगलें. हाका लागून पणजे म्हापालिके खातीर मंत्री बाबूश मोंसेरात आनी उत्पल पर्रीकार हांच्या पॅनलां मदीं थेट लडत जातली.

इतले मजगतीं, पणजे म्हापालिका वेंचणुकेची तारीख आयज जाहीर जातली. राज्य वेंचणूक आयोगान आयज सकाळीं पत्रकार परिशद आपयल्या. पणजी म्हापालिका वेंचणूक 14 मार्चाक जावन मतमेजणी 16 मार्चाक घेवपाचो निर्णय जाल्लो आसलो तरी अर्थसंकल्पी अधिवेशनाक लागून हातूंत बदल जावपाची शक्यताय आसा. वेंचणूक 11 वा 14 मार्च ह्या दोन तारखां पैकीं एके तारखेक जातली.

पणजी म्हापालिकेचे प्रभाग निश्चीत जाले उपरांत आरक्षणाची अधिसुचोवणी जारी जाल्या. आरक्षणाची अधिसुचोवणी जाहीर जाल्ल्यान इत्सुकां कडल्यान मोर्चेबांदणीक सुरवात जाल्या. म्हापौर रोहीत मोंसेरात, उदय मडकयकार, संतोष सुर्लीकार, निलेश मोरजकार हांचे प्रभाग आरक्षीत जाल्ल्यान तांकां दुसऱ्या प्रभागांतल्यान वेंचणूक लडोवची पडटली. म्हापालिका वेंचणुकेंत बाबूश मोंसेरात पॅनल आनी उत्पल पर्रीकार हांच्या पॅनला मदीं झूज जावपाचें निश्चीत आसा. आयज वेंचणुकेची तारीख जाहीर जाले उपरांंत रोखडेच हांंव पॅनल जाहीर करतलों. मतदारां कडेन संंपर्क सादपाक आमी सुरवात केल्या. भारतीय जनता पक्षाच्या कार्यकर्त्यांचो लेगीत तेंको आसा अशें उत्पल पर्रीकार हांंणी सांगलें.

पणजी म्हापालिकेचेर पयलीं सावन बाबूश मोंसेरात हांचेंच वर्चस्व आसा. आरक्षण जाहीर जातकच तांणी सगल्या 30 प्रभागांनी उमेदवार वेंचून येतले असो विस्वास उक्तायला. वेंचणूक जाहीर जातकच पॅनल जाहीर जातलें अशी म्हायती म्हापौर रोहित मोंसेरात हांंणी दिली.

पणजेचे उदरगती खातीर आनी बऱ्या फुडारा खातीर उत्पल पर्रीकार हांच्या पॅनलाक म्हजो तेंको आसतलो अशें सुरेंद्र फुर्तादो हांणी जाहीर केलें. म्हापालिकेचेर कार्यक्षम आनी नितळ नगरसेवक वेंचून हाडपा खातीर आमचे यत्न आसतले अशें सुरेंद्र फुर्तादो हांणी सांंगलें.