भांगरभूंय | प्रतिनिधी
म्हापशें मोंते गिरी हांगा राष्ट्रीय म्हामार्गार जाल्ल्या अपघातांत देवानंद साळगांवकार (50, रा. किटला सालय) हो गंभीर जखमी जालो. ताचेर गोमॅकाँत उपचार सुरू आसात.
हो अपघात शुक्रारा सकाळीं 10.30 वरां मजगतीं घडलो. जखमी साळगांवकार सालय पर्वरे सावन म्हापशें बाजारांत आयिल्लो. जीए 03 एजी 3266 क्रमांकाचे स्कुटरी वेल्यान तो परतून घरा वतना मोंते गिरी हांगा राष्ट्रीय म्हामार्गा वेलो भुंयारीमार्ग पूल हुपले उपरांत ताची दुचाकी रस्त्यार कोसळ्ळी आनी ताची तकली आपटून तो गंभीर जखमी जालो.
पर्वरीचे येरादारी पुलीस निरिक्षक संजीत कांदोळकार हे पोरणो बाजार सुकूर जंक्शनाचेर ड्युटेर आशिल्ले. तांकां अपघाताची म्हायती मेळटकच तांणी घडणूक थळार धांव घेतली तशेंच 108 एम्बुलन्सीक आपयली. रक्तान माखिल्ले अवस्थेंत पडिल्ले जखमीक वांगडी पुलिसां सयत मजत करून ताका म्हापशेंच्या जिल्हो हॉस्पिटलांत दाखल केलो.
अपघाताचो पंचनामो म्हापशेंचे पुलीस हवालदार अभिजीत माणगांवकार हांणी केलो. हो आप अपघात काय हीट अॅण्ड रन हें अजून स्पश्ट जाल्लें ना. जखमीचे जबानी उपरांत अपघाताचें कारण स्पश्ट जातलें. फुडलो तपास म्हापशेंचे पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
