भांगरभूंय | प्रतिनिधी
खबरां संस्था ः चलप ही एक बरी संवय. पूण काळीज आनी रगतांतली साकर नियंत्रीत करपाक चलप हें वखदां भशेनय काम करपाक शकता. उच्च रक्तदाब वा गोडेंमूत आशिल्ल्या लोकांक नेमान चलपाचो सल्लो दोतोर दितात. पूण चलपाक योग्य वेळ खंयचो असो प्रस्न जायत्या जाणांक पडटा. कांय जाणांक सकाळीं चलप सगळ्यांत बरें, जाल्यार कांय जाणांक सांजवेळार चलल्यार भलायकी सुदारूं येता अशें दिसता. दोनूय वेळार चलपाचे वेगवेगळे खाशेले परिणाम जातात अशें एका अभ्यासांतल्यान दिसून आयलां.
दरेक मनशाची कूड सैमीक घड्याळार चलता. ताका ‘सर्केडियन रिदम’ अशें म्हण्टात. कुडीची उर्जेची पातळी केन्ना चड आसता आनी ती केन्ना सुस्त आसता हें घड्याळ थारायता. रगतांतली साकर आनी रगतदाबूय ते प्रमाण वयर-सकयल जाता. कॉर्टिसॉल सारकिल्ले स्ट्रेबस हार्मोन्स पयलींच चड आसतात. ताका लागून रगतांतली साकर आनी रगतदाब वाडूंक शकतात. देखून सकाळीं उठले उपरांत रोखडेच चलल्यार ही वाड उणी करपाक मजत जावंक शकता.
सकाळीं चलप
सकाळीं नाश्तो करचे पयलीं चलप इन्सुलिनाची संवेदनशीलताय वाडोवपाक मजत करता अशें जायत्या अभ्यासांतल्यान दिसून आयलां. हाचो अर्थ कुडीक रगतांतली साकर चड कार्यक्षमतायेपणान वापरूं येता. सकाळीं चलप रगतदाबा खातीर फायदेशीर थारूंक शकता. लव्ह लव्ह चलप दीसभर रगतदाब नियंत्रणांत दवरूंक शकता.
सांजवेळार चलप
सकाळीं चलपाचो जसो फायदो आसा तसो जेवल्या उपरांत चलपाचोय फायदो आसा. दनपारां आनी रातीं जेवले उपरांत रगतांतली साकर वाडटा. सांजवेळार चलल्यार स्नायूंक चड साकर शोशून घेवपाक मजत जाता. हाका लागून पातळी उणी जाता. जेवले उपरांत 15 ते 20 मिनटां चलल्यार साकर वाडपाचेर नियंत्रण दवरपाकय बरें परिणाम जाल्ल्याचे जायत्या जाणांक दिसल्यात. तशेंच सांजवेळार रगतदाब सैमीक रितीन देंवता आनी त्या वेळार चलल्यार काळजाक चड आराम मेळटा.
रगतदाबाचेर जावपी परिणाम वेगवेगळे
हायपरटेन्शन ह्या नेमाळ्यांत उजवाडाक आयिल्ल्या एका अभ्यासांत सकाळीं चलपी लोकां मदीं दिसाचो रगतदाब उणो जाता. जाल्यार सांजवेळार चलपी लोकां मदीं रातच्या वेळार सुदारणा जाल्ल्याचे दिसून आयलां. हाचो अर्थ दोनूय वेळार चलपाचे परिणाम वेगवेगळे आसात. सकाळीं उठले उपरांत रगतदाब वाडपाचेर नियंत्रण दवरप बरे, जाल्यार सांजवेळार बरे जावपाक मजत जाता. देखून रगतदाबा खातीर सकाळीं चलप चड फायद्याचे आसता.
रगतांतल्या साकरेच्या प्रमाणाचेर परिणाम
सकाळीं चलल्यार रगतांतली साकर नियंत्रीत करपाक मजत जाता. पूण सांजवेळार चलप म्हणल्यार जेवणा उपरांत अचकीत वाडपी हालचालींचेर परिणाम जाता. हाका लागून रातचें जेवले उपरांत साकर वाडटा तांकां सांजवेळार चलप हो बरो पर्याय. संशोधनाच्या मतान सकाळीं चलपा परस जेवले उपरांत सांजवेळार चलप साकरेची पातळी उणी करपाक आनी नियंत्रणांत दवरपाक चड प्रभावी थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
