भांगरभूंय | प्रतिनिधी
पणजी: महसूल सचीव आनी राज्य आपत्ती वेवस्थापन प्राधिकरणाचे अध्यक्ष संदीप जॅकीस हांणी आयज पर्वरे सचिवालयांत सरकारी अधिकार्यांची बसका घेवन मान्सूना पयलींच्या कामांचो आनी उपाय येवजणांचो नियाळ घेतलो. मॉन्सून हंगामांत साबार आव्हानांक तोंड दिवचें पडटा. अशीं आव्हानां कमी करपा खातीर संबंदीत यंत्रणांनी वेळार उपाय आनी तयारी करपाची गरज जॅकीस हांणी उक्तायली.
मॉन्सूनाच्या काळांत गोंयांत निर्माण जावपी कसलेय आपत्कालीन परिस्थितीक तोंड दिवपा खातीर संबंदीत यंत्रणांनी तयार रावपाची आनी कसल्याय आपत्तीच्या वेळार जीव तशेंच मालमत्ता वाचोवपा खातीर कर्मचार्यांक गरजेचें प्रशिक्षण दिवन तयार दवरपाची गरज आसा, अशेंय तांणी सांगलें.
सध्या गर्मीच्या त्रासा पसून वाटावपाक उपाय आनी खबरदारी घेवपा बाबातींत लोकांमदी जागृताय करप, हॉस्पिटलांनी वीज पुरवण सुरळीत दवरप, उदका पुरवण सुरळीत दवरप, रान वाठारांनी उज्याच्यो घडणूको टाळपा खातीर उपाय करप, पार्क, अभयारण्य आनी रान वाठारांनी जनावरां खातीर पिवपाच्या उदकाची उपलब्धताय पळोवप, शाळांनी पिवपाचें उदक उपलब्ध करप, सावळे खातीर शेड उबारप, मनरेगा आनी बांदकाम कामगारां खातीर कामाच्या थळार शेड उबारप, वृध्दाश्रमांनी गरजेचे उपाय करप अशा साबार विशयांचेर बसकेंत चर्चा जाली.
मॉन्सूनांत पूर येवप, झाडां पडप, पालसणां कोसळप अश्यो सैमीक आपत्तींच्यो घडणुको घडटात. तशेंच चिर्याच्या खणींनी बुडपाच्यो घडटात. थंय गरजेचे उपाय करपाची गरज आसा. मोडपाक आयिल्ल्या लायटीच्या खांब्यांचो सोद घेवन थंय नवीन खांबे घालपाची गरज आसा, अशो साबार आपत्तीच्यो घडणुको टाळपा खातीर आपत्ती वेवस्थापन यंत्रणांनी चौवीस वरां अशे तरेन सक्रीय रावपाक जाय, अशेंय जॅकीस हांणी सांगलें.
दोनूय जिल्ह्यांनी आपत्ती वेवस्थापन नियंत्रण कक्ष स्थापन केल्यात. जॅकीस हांणी मोबायल ऍप सुरू करपाचीय सुचोवणी केली.
बसकेंत नियंत्रण कक्षांचे कामकाज, पूर येवपाचे आनी पालसणां कोसळपाचे वाठार, आपत्तीच्या वेळार स्थलांतरण येवजण आनी स्मार्ट सिटीच्या कामांविशीं चर्चा जाली. सुरेंद्र नायक हांणी बसकेक हजर आशिल्ल्या अधिकार्यांक येवकार दिलो. संदीप गावडे हांणी आपत्तीच्या वेळार घेवपाच्या उपायांचेर सादरीकरण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
