भांगरभूंय | प्रतिनिधी
मडगांव: गांधी मार्केटांत उदक सांचिल्ल्यान आशिकुशीच्या घरांतल्या लोकांक भायर सरपाचे वाटेर घाणीचें उदक सांचलां. हो सगलो प्रकार पालिकेन मॉन्सुनपूर्व कामां वेळार करूंक नाशिल्ल्यान घडला. पालिकेन हाचे कडेन लक्ष दिवचें अशी मागणी आदले मंत्री मनोहर आजगांवकार हांणी केली.
मडगांवां बुधवारा पडिल्ल्या नेटाच्या पावसाक लागून गांधी मार्केटांत उदक सांचून उरपाचो प्रकार घडलो. तशेंच गांधी मार्केटाचे कुशीक आशिल्ल्या घरांनीय घाण उदक घुशिल्लें. त्या कुटुंबांनीय पालिका प्रशासना कडल्यान गटारांच्या नितळसाणीचें काम करूंक नाशिल्ल्यान हो सगलो प्रकार घडलो अशें सांगलें. पावसाचें उदक व्हांवून वचत नाशिल्ल्यान मार्केटांत सांचून उरिल्लें. राजेंद्र आजगांवकार हांणी घडणूक थळार धांव घेवन पळोवणी केली. तांणीय ह्या प्रकाराक पालिका जापसालदार आशिल्ल्याचें सांगलें.
मडगांव पालिकेन ह्या वेळार दीसवड्याच्या कामगारांची नेमणूक केली ना. ताका लागून कामगार मेळ्ळे नात. प्रभाग 14त पुलीस मुख्यालय, बस स्टॅण्ड, दोन शाळा, मार्केट आनी हेर वाठार येतात. आठ दीस कामगार दिवन ही कामां जावंक शकनात. न्यू मार्केट आनी गांधी मार्केटांतल्या गटारांचे नितळसाणे खातीर एप्रील म्हयन्यांत कामगार मेळ्ळे नात. ताका लागून गटारां अजूनय भरून आसात. हाका लागून लोकांच्या घरांनी घाण उदक गेलें. आमदार दिगंबर कामत आनी नगरपालिकेन हाचे कडेन लक्ष दिवपाची गरज आसा. नितळसाणघर फाटले तीन दीस बंद अवस्थेंत आशिल्ल्यान लोकांचे हाल जायत आसात. कराचे पयशे वाडयिल्ल्यान ते प्रमाण सेवा मेळपाी गरज आसा अशेंय राजेंद्र आजगांवकार हांणी म्हणलें.
मनोहर आजगांवकार हांणीय पालिकेक दोश दिवन सद्याचे नगराध्यक्ष कांयच काम करीत नाशिल्ल्यान हो उदक सांचून उरपाचो प्रकार घडिल्ल्याचें तांणी सांगलें. कामगारांची संख्या वाडोवची आनी हें काम करून घेवचें अशी मागणीय तांणी केली.
जिल्हो हॉस्पिटला मुखार तळें
दक्षीण गोंय जिल्हो हॉस्पिटलाच्या प्रवेश दारार व्हड प्रमाणांत पावसाचें उदक सांचून उरलां. पावसाची सुरवात जाल्यार प्रवेश दारा मुखार उदक सांचून उरता. ह्याच उदकांतल्यान दुयेंतीक आनी तांचे बरोबर आयिल्ल्या सोयऱ्यांकय यो-वच करचें पडटा. जिल्हो प्रशासना सयत जीसुडा कडल्यानूय ह्या प्रकारा कडेन लक्ष दिवन उपाययेवजण करपाची गरज नागरिकांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
