भांगरभूंय | प्रतिनिधी
पणजी: गुजरातांतल्या एका 20 वर्सां पिरायेच्या मॉडेलाक ड्रग्स पियेवपाक दिवन तिचेर लिंगीक अत्याचार केल्ल्या प्रकरणांत उत्तर गोंय जिल्हो आनी सत्र न्यायालयान दुबावीत अनंत छमनलाल तन्ना हाचे आड आरोप निश्चीत करपाचो आदेश दिल्लो. मजगतीं, मुंबय उच्च न्यायालयाच्या गोंय खंडपिठांतले याचिके वेल्या आदेशाची दखल घेवन सत्र न्यायालयान छमनलाल तन्ना हाची आरोपांतल्यान सुटका केल्या.
ह्या प्रकरणांत पणजेंतल्या मानवी तस्करी विभागान गुन्यांव दाखल केला. ते प्रमाण, पिडीत मॉडेलान मानवी तस्करी विभागांत कागाळ दाखल केल्ली. दुबावीत अनंत छमनलाल तन्ना हाणें गुजरातांत पिडिते कडेन इश्टागत केली. तिका वेवसायांत भागिदारी दिवपाच्या नांवाखाला नोव्हेंबर 2021 वर्सा गोंयांत आपयलें.
गोंयांत आयले उपरांत तिका गुंगीचे वखद पियेवपाक दिवन तिचेर लिंगीक अत्याचार केलो. तशेंच मोबायलाचेर व्हिडियो काडून तिका ब्लॅकमेल करून तिची मानवी तस्करी केली. तशेंच दुबाविताच्या चार इश्टांनीय तिचेर अत्याचार केल्ल्याचें कागाळेंत म्हणलां.
हाची दखल घेवन पणजेंतल्या मानवी तस्करी विभागाच्यो तेन्नाच्यो बायल पुलीस निरिक्षक संध्या गुप्ता हांणी 9 नोव्हेंबर 2022 दिसा अनंत तन्ना हाचे आड गुन्यांव दाखल केल्लो. उपरांत पुलिसांनी गुजरातांत वचून दुबाविताक 22 नोव्हेंबर 2022 दिसा अटक केल्ली.
उपरांत पणजेंतल्या उत्तर गोंय जिल्हो आनी सत्र न्यायालयान दुबाविताक एक लाख रुपया आनी हेर अटींचेर सशर्त जामीन मंजूर केलो. ह्या प्रकरणाचो तपास पुराय करून अनंत छमनलाल तन्ना हाचे आड न्यायालयांत आरोपपत्र दाखल केलें.
3 नोव्हेंबर 2022 दिसा पुलीस निरिक्षक रिमा नायक हांणी ह्या प्रकरणाची खोलायेन चवकशी करून पुराव्या सयत न्यायालयांत प्रकरण बंद अहवाल आनी पुरवणी आरोपपत्र दाखल केलें.
मजगतीं, न्यायालयान वयल्या बंद अहवालाची आनी आरोपपत्राची दखल न घेतां दुबावीत अनंत छमनलाल तन्ना हाचे आड प्रथमदर्शनी पुरावे आशिल्ल्याचें निरिक्षण नोंद करून 15 फेब्रुवारी 2024 दिसा आरोप निश्चीत करपाचो आदेश दिलो. हाका दुबावीत अनंत तन्ना हाणें उच्च न्यायालयांत आव्हान दिलें. ह्या प्रकरणांत उच्च न्यायालयांत सुनावणी जाली तेन्ना, तातूंत ताणें वयलो मुद्दो उपस्थीत केलो.
उपरांत उच्च न्यायालयान दुबावितान केल्ल्या दाव्यांत तथ्य आशिल्ल्यान ताचे आड आरोप निश्चीत करपाचो आदेश रद्द करून परतून सुनावणी घेवपाक सांगिल्लें. ते प्रमाण सत्र न्यायालयान परतून सुनावणी घेवन पुरावणी आरोपपत्रााची दखल घेतली. ते प्रमाण न्यायालयान दुबावीत तन्ना हाची आरोपांतल्यान सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
