भांगरभूंय | प्रतिनिधी
पणजी : जमीन बळकावपाच्या प्रकरणांत अंमलबजावणी संचालनालयान (ईडी) करंझाळेंतल्या मॉडेल्स कन्स्ट्रक्शन्साच्या धनयाच्या घरा सयत सांतिनेझांतल्या कार्यालयाचेर धाड घाल्ली. ह्या धाडी वेळार ईडीन 55 कोटी रुपयांच्या मालमत्तेची कागदपत्रां जप्त केल्लीं, तातूंत मॉडेल्स कंपनीन दुबयंत केल्ल्या गुंतवणुकी विशींची कागदपत्रां आनी ‘मॉडेल्स मिस्टीक’ प्रकल्पाचीं दुकानां आनी फ्लॅटांची विक्री कागदपत्रां हांचो आस्पाव आसा. मजगतीं, आर्चडायोसीज ऑफ गोवा तशेंच फा. आर्लिनो डी’मेलो आनी फा. व्हिक्टर रॉड्रिग्स आनी तेन्नाचे सर्वेक्षण संचालनालयाचे निरिक्षक प्रभाकर आर. हवालदार हांची खोलायेन चवकशी जातली अशी म्हायती मुखार आयलां.
ह्या प्रकरणांत दत्ताराम तनू गांवस उर्फ काणकोणकार हांणी 18 जानेवारी 2010 दिसा पणजी पुलीस स्टेशनांत कागाळ दाखल केल्ली. तातूंत ताणें सांगलां की पणजी शारांत सर्व्हे क्रमांक 44, पीटी शीट क्रमांक 162 खाला 2,475 चौखण मिटर जमनींत तांचे बापूय कूळ म्हूण नोंद आसा. मजगतीं, 18 नोव्हेंबर 2004 अनी 5 डिसेंबर 2006 मजगती फा. आर्लिनो डिमेल्टो आनी फा. व्हिक्टर रॉड्रिग्स हांणी पणजी शार सर्व्हेंत आर्चडायोसीज ऑफ गोवा नावाची नोंद करपा खातीर अर्ज सादर केला. ते प्रमाण सर्वेक्षण संचालनालयाचे तेन्नाचे निरिक्षक प्रभाकर आर. हवालदार हांणी 5 डिसेंबर 2006 दिसा निवाडो दिलो आनी ‘आर्चडायोसीज ऑफ गोवा’ हें नांव नोंद केलें. उपरांत 2 फेब्रुवारी 2007 दिसा मॉडेल्स कन्स्ट्रक्शन्साचो भागिदार पीटर वाझ हाणें वयली जमीन विकती घेतली आनी ‘मॉडेल्स मिस्टीक’ हो निवासी प्रकल्प हातांत घेतलो.
हे कागाळीची दखल घेवन पणजी पुलिसांनी 18 जानेवारी 2010 दिसा दुबावीत आर्लिनो डी’मेलो, व्हिक्टर रॉड्रिग्ज आनी प्रभाकर हवलदार हांचे आड गुन्यांव दाखल केलो. मजगतीं, ईडीन चवकशी सुरू केली. ईडीन मॉडेल्स कन्स्ट्रक्शनाचे सध्याचे धनी डायगो वाझ आनी नातालिना वाझ हांची चवकशी केली आनी 16 डिसेंबराक करंझाळे हांगा धनयाच्या घरां तशेंच सांतिनेझ हांगाच्या कार्यालयाचेर धाड घाली.
ह्या प्रकरणांत मॉडेल्साचो धनी पीटर वाझ संवसाराक अंतरिल्ल्यान ताचे सांगाती, आर्चडायोसीज ऑफ गोवा, तशेंच आर्लिनो डी’मेलो आनी व्हिक्टर रॉड्रिग्स हांचे वांगडा सर्वेक्षण संचालनालयाचो तेन्नाचो निरिक्षक प्रभाकर आर. हवलदार हांचे वांगडा चवकशी करची पडटली. फुडल्या कांय दिसांत तांकां ईडी समन्स धाडपाक शकता, अशीं म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
