भांगरभूंय | प्रतिनिधी
गोॆयकार उमेदी, उत्साही वृत्तीचे. हांगा खंयची गजाल आमी उत्सवा प्रमाण मनयत तें सांगपाक येना. पिनेवालों को पिने का बहाना चाहीए, ते प्रमाण आमकां पार्टी, खोस मनोवपाक कसलेय निमित्त पुरो. त्यो कार्यावळी आदल्या तेंपार घरांनी जाताल्यो. मात आतां आमी सभाघरां लागीं केल्यात. ताकाच लागून बरींच मंडळां, क्लब, स्वराज्य संस्था येणावळीचें साधन म्हूण सुसज्ज सभाघरां बांदपाक लागल्यात. तांकां ताचो अर्थीक नदरेन फायदोय जाता. अशें एकूय सभाघर आसचें ना, जंय सप्तकांतल्यान एकूय कार्यावळ जायना. गोंय हें पर्यटन राज्य जाल्ल्यान शेंकड्यांनीं कंपनीं, आस्थापनां आपल्यो वर्सुकी बसका, प्रदर्शनां हांगा आयोजीत करतात. अर्थांत खाजगी हॉटेलांनी ह्यो कार्यावळी जाताल्यो. मात हालींच्या कांय वर्सांनी कांय सरकारी संस्थाय येणावळीचे नदरेन बसका, प्रदर्शनां, महोत्सव आयोजीत करपाक लागल्यात. ह्यो संस्था ज्या कारणां खातीर उबारल्यात, ज्या मळाचेर त्यो वावुरतात, ताचे संबंदीत कार्यावळ, प्रदर्शन, मेळावो बी आसल्यार कोण हरकत घेवचो ना, पूण संस्था विज्ञानाची आनी थंय जाता खाणांचो महोत्सव वा संस्था उद्देगा कडेन संबंदीत आनी थंय जाता संगिताची कार्यावळ….!! कांय खेपो ह्यो कार्यावळी इतल्यो वाडटात, की संस्था उद्देगाचे उदरगती खातीर उबारल्या, हेंच लोक विसरून वतात. मूळ हेतू, उद्देशा कडल्यान भरकटत भलते कडेन वचप म्हणटात तें हेंच.
गोंयांत कांय मैदानांचेर कोयराचे, सिवरेजीचे प्रकल्प जाल्यात. थोड्यांचेर प्रदर्शनां, मेळावे, महोत्सव भरतात. फुटबॉला खातीर बांदिल्ल्या मैदानाचेर क्रिकेटी सयत हेर सगल्याच खेळांच्यो सर्ती जातात. क्रिकेटीक पीच करतात. क्रिकेटी पयलीं फुटबॉल मॅच जाली जाल्यार ते पिचीची अर्थांत वाट लागता. आतां मैदानाचेर लग्नांय जावपाक लागल्यांत. नावेले पर्रीकार इनडोअर स्टेडियमाचेर लग्न (काय काजार, शादी?) चलता खंय. तीन दीस लग्न. म्हणटकच तें भायल्या कोणाचें तरी आसतलें. घडये नासतूय बी. कारण आतां गोंयकारूय संगीत, हळद, लग्न अशें उत्तर भारता सारकें तीन-तीन दीस लग्न सुवाळो करपाक लागल्यात. फाल्यां लग्नांतले विधीय पंजाबी, राजस्थानी पद्दतीन जाल्यार अजाप धरचें न्हय. नावेले स्टेडियमांत बास्केटबॉल, बॅडमिंटन खेळपाक सद्दां विद्यार्थी, खेळगडे येतात. खेळां सर्तीं खातीर, खेळगड्यांक सराव करपाक मेळचो म्हूण तो बांदला. मात खेळगडे सांगतात, तो खंय अदींमदीं प्रदर्शनां खातीर दितात. आतां तर सरळ लग्ना खातिरूच दिला. फाल्यां नाच, पार्टी खातिरूय तो व्यस्त उरूं येता. तशें जाल्यार खेळगड्यांनी खेळपाचें खंय? आमच्या देशाक भांगरा पदकां मेळनात, ताचे फाटलें हें एक कारण. भारत 1900 त पयलें ऑलिम्पीक खेळ्ळो. आमी 10 भांगरां पदकां सयत 41 पदकां जिखल्यांत. चीनान 1952 त पयले फावटी ऑलिम्पीकांत वांटो घेतलो. आतां मेरेन तांणी 303 भांगरा पदकां सयत 728 पदकां गळ्यांत घाल्यांत. दोगांयची लोकसंख्या लागीं लागीं तितलीच आसा. नावेलेच्या खेळगड्यांनी पर्रीकार स्टेडियम लग्न सुवाळ्या खातीर दिवचो न्हय, म्हूण खेळां खात्या कडेन विनवणी केल्ली. ती घडये मान्य जावंक नासतली. तांचीय म्हूण कितें तरी अडचण आसूं येता.
मैदान, इनडोअर स्टेडियम बांदतात तो ल्हान भुरग्यांक, तरणाट्यांक आपलो आवडटो खेळ विकसीत करपाक मेळचो म्हूण. खरें म्हणल्यार थंय फक्त आनी फक्त खेळ आनी ते संबंदीच्यो कार्यावळीच जांवक जाय. थंय खेळां साधनां आसतात. समजा, नाचाचे कार्यावळी वेळार तांकां लुकसाण जालें जाल्यार ताचो परिणाम खेळगड्यांचेर जावं येता. क्रिकेट पीच फुटबॉल खेळगड्यांच्या बुटांक लागून इबाडपाचे प्रकार हाचे पयलीं घडल्यात. तेन्ना ज्या उद्देशान करोडांनी रुपया मोडून जी वास्तू बांदल्या तिचो त्याच कामा खातीर वापर जावचो. भोवउद्देशीय, मल्टीटास्कींग असले प्रकार तांचे बाबतींत नाकात. मैदान हें मैदानूच आसुंदी, ताचे नाटकघर जावचें न्हय, नाटकघर आसल्यार थंय आयदनांचें प्रदर्शन भरचें न्हय! येणावळीची सामकीच गरज आसल्यार ते खातीर खाशेलीं सभाघरां बांदून तीं भाड्यान दिवचीं, लुकसाण जाता जाल्यार नश्टो खर्च उणो करचो, बचत करची. जे उमेदीन सभाघरां बांदप जाता, तो उत्साह मैदाना वेळार शेणटा. सरकारान खरें म्हणल्यार दरेके शाळे खातीर पाचवीचार मैदानां उबारपाक जाय. दरेका गांवांत इनडोअर स्टेडियम, जीम जाय. निदान आसात ते इनडोअर स्टेडियम, मैदानां लग्ना खातीर, प्रदर्शनां खातीर दिवचीं न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
