मैदाना वयली मारामारी

भांगरभूंय | प्रतिनिधी

राष्ट्रीय पांवड्याचो विचार केल्यार आमचें सुपुल्लें गोंय खेळा मळाचेर तशें फाटींच. हाॅकींत गोंयकार खेळगडे एका काळार मुखार आशिल्ले. फुटबाॅलांत आमी हालीं- हालीं मेरेन फुडें आशिल्ले. एखादो आडवाद सोडल्यार गोंयकार खेळगडे दरेके राष्ट्रीय खेळां सर्तींत शंबरां वयर पदकां हाडटना दिसनात. पोरूं गोंयांत जाल्ले सर्तींत 92 पदकां मेळिल्लीं. आंतरराष्ट्रीय मळाचेरुय दोळे दिपकावपी कामगिरीय हालीं सातत्यान जावंक ना. हाका कितें कारणां, अडचणीं आसात, त्यो पयस करपाक कितें करपाक जाय, हाचेर जाणकारांनी भासाभास करून उपाय काडपाक जाय. ते चालीक लावपाक जाय. कांय उद्देगपती, उद्देग कंपनी क्लब चलयताल्यो, पूण आतांय तातूंतले कांय जाण फाटीं सरल्यात. गोंयकार खेळांत फाटीं उरपाचें एक कारण म्हणल्यार पाचवेचार मैदान. कालूच धारबांदोडेंच्या एका हायस्कुलाच्या मैदानार भुरग्यांक बडोवपाचो प्रकार घडलो, तो राज्यांतल्या मैदानाचो उणावाचेर उजवाड घालता.
गोंयांत काॅन्व्हेंट शाळा सोडल्यो जाल्यार चडश्या शाळांक स्वताचें मैदान ना. फाटल्या 15- 16 वर्सांनी मैदानां मेळपाक लागल्यांत. तरीय सपाट जमीन नाशिल्ल्यान बरेच कडेन तीं उबारप शक्य जावंक ना. थोड्या शाळांच्या मैदानाचेर शेंकरो, व्हडले गुंडे आसात. थंय खेळप धोक्याचें. तर कांय शाळांचे विद्यार्थी शेतांनी खेळटात. खरें म्हणल्यार शाळा उबारतनाच मैदानाची सुविधा दिवपाक मेळटली काय ना, ताचो विचार जावंक जाय आशिल्लो. थोड्याच काॅलेजींक इनडोअर मैदानां आसात. हें जालें विद्यार्थ्यांचें, पूण गांवांतल्या हेर भुरग्यांक खेळपाक तरी बरीं मैदानां आसात? एखादें व्हडलें मैदान आसलें जाल्यार थंय तरणाटे खेळटात. उरिल्ल्यांक मागीर खंयचो तरी कोनसो धरचो पडटा. कोणें खेळचें हो प्रस्न सोडोवपाक दादागिरी, मारामारी पसून जाल्यात. धारबांदोडेंची घडणूक नेमकी कित्याक लागून घडली तें कळूंक ना. शाळेच्या प्युनाक पुलिसांनी अटक केल्या. पालकां कडल्यान मेळिल्ले म्हायती प्रमाण, संबंदीत शाळेच्या प्युनाक वेवस्थापनान आयतारा वा सुटयेच्या दिसा त्या वाठाराची पळोवणी करपाक सांगिल्लें. काल ताका थंय भुरगे खेळटना दिसले. ताणें गुंडे मारून तांकां धांवडावपाचो यत्न केलो. मागीर खंय एकल्याच्या पोल्यार जोतें मारलें. आनीक दोगांक बडयले. ते पळून वतकच तांच्यो सायकलीय मोडून उडयल्यो. हे घडणुकेंत चार भुरगे जखमी जाले. दोगांक हाॅस्पिटलांत व्हरून उपचार करचे पडले. हे भुरगे चड करून ल्हान आसतले. तरणाटे आशिल्ले जाल्यार उरफाटें जावं येतालें. पूण कितेंय जालें तरी खेळपी भुरग्यांक मारप चुकीचें. तांकां समज दिवन वचपाक सांगपाचें. आयतारा भुरग्यांक खेळपाक मैदानां मेळनात, म्हणून ते खेळटाले जावये…. आनी हालींच्या दिसांनी मैदानाचेर खेळपी भुरगे दिसतात खंय? सगलेच मोबायल फोनाचेर गुल्ल आसतात. तांकां बळयां मैदानाचेर धाडचे पडटात.
धारबांदोडेचे भुरगे क्रिकेट खेळटाले आनी शाळेच्या जनेलांचेर बाॅल बसतालो, काय ते बोवाळ घालताले तें तपासा उपरांत स्पश्ट जातलेंच. पूण, बऱ्याच काॅलनींच्या मैदानांचेर पसून भुरग्यांक दनपारच्या वेळार बोवाळ करतात, बाॅल मारून आरशे फोडटात, म्हूण धांवडावपाचे प्रकार घडटात. हाचो अर्थ तांकां खेळूंक दिवपूच ना, असो न्हय. गांवच्या लोकांनी, पालक- शिक्षक समितीन, खुद्द ते शाळेच्या वेवस्थापनान चर्चा करून हो प्रस्न सोडोवंक जाय. त्या प्युनाची मनस्थिती कशी आशिल्ली, ताचोय विचार करचो पडटलो. सुटये दिसा पासय मारची पडटा म्हूण घडये तो बेजारला आसुं येता. आयतारा शाळा नासता तेन्ना सकाळ, सांजच्या वेळार शाळेच्या वा भायल्या भुरग्यांक मैदानाचेर खेळपाक दिवंक हरकत नासची. धारबांदोडेचेच न्हय, हेर शाळांनीय. कांय शाळां गेट घालून मैदान बंद करतात, हें चुकीचें. इमारतीचें, मैदानाचें लुकसाण जाता म्हूण थोडे तशें करतात. थोडे आपल्या वाठारांतले भुरगे सोडल्यार भायल्या भुरग्यांक खेळपाक मनाय करतात. तर कांय कडेन काॅलनींतले तरणाटे, भुरग्यां परस भायलेच चड येवन खेळटात. धारबांदोडे सारको प्रकार परत घडचो ना हाची खबरदारी सगल्यांकूच घेवची पडटली.
गांवांतले पंचायतीन, पालिकेन सरकाराचे मजतीन आसा तितल्या मैदानांचेर सगल्यांक खेळूंक मेळटले, हे खातीर मार्ग काडचो. खेळपा वयल्यान केस्तावां जातात, जाल्यार वेळ वांटून दिवचो. गांवांत नवें मैदान बांदपाक मेळटा जाल्यार ते खातीरुय पावल उबारचें. वेरेंच्या मैदानाचो एक प्रस्न हालींच सोशल मिडियाचेर गाजतालो. तें मैदान काय प्लाॅट करपाक दोंगर कापला, तेंच कळनाशिल्लें. शाळांनी विद्यार्थी नात, जाल्यार सुटयेच्या दिसा हेरांक खेळपाक दिवंक जाय. थंय खेळप्यांनीय कोणाक लुकसाण, त्रास, मनस्ताप जावचो ना, हे तरेन खेळचें. मैदान मागीर तें कोणाचेंय जावं, रिकामी उरपाक जायना. केन्नाच!!