मैदानांतल्या संघर्शा परस मानसीक वर्चस्वाचो खेळ

भांगरभूंय | प्रतिनिधी

भारत आनी पाकिस्तान हांचे मदले मॅचींतलो दरेक पैलू स्वताच एक व्हड कथा सांगपी आसता. भारताचो मुखेली सूर्यकुमार यादवान आशिया करंड सर्तींत सेगीत जैतां जोडल्या उपरांत पाकिस्ताना आडची लडत फक्त एक प्रतिस्पर्धा मानपाक न्हयकार दिल्लो. कागदाचेर भारताचो पंगड पाकिस्ताना परस बळिश्ट दिसता आसलो तरी, कोलंबोंत हे हाय-व्हॉल्टेज मॅची खातीर क्रिकेट मोग्यांची व्हड गर्दी जावपाची शक्यताय आसा.

भारताचें दालें जड

​आशिया करंड सर्त: फाटले खेपे जाल्ले आशिया करंड सर्तींत भारतान पाकिस्ताना आडच्यो तिनूय मॅची जिखल्यात.

​टी-20 संवसारीक करंड सर्त: पाकिस्ताना आड भारताचो 7-1 असो उत्कृश्ट रॅकॉर्ड आसा.

रणनिती: आशिया करंड सर्तींत भारतान पयली मॅच बॉलरांच्या नेटार, दुसरी मॅच बॅट्समनांच्या नेटार आनी फायनल आपले फिशालकाय रणनितीन जिखिल्ली.

सध्या भारतीय पंगड टी-20तलो सगल्यांत आक्रमक पंगड आसा. भारताची मदली फळी घटमूट आसून स्पिन बॉलींग उत्कृश्ट दर्ज्याची आसा. तशेंच, फास्ट बॉलिंगेंत जसप्रीत बुमरा सारको बॉलर आसा.

पाकिस्ताना मुखार चुको सुदरावपाचें आव्हान

​2021चे संवसारीक सर्तींत भारताक हारयल्या उपरांत, 2022 (मॅलबॉर्न) आणनी 2024 (न्यू यॉर्क)त पाकिस्तानाच्या हातांतल्यान जैत गेल्लें. ताका लागून मेळिल्ले संदीचें भांगर करप पाकिस्ताना मुखार सगल्यांत व्हड आव्हान आसतलें.

हार्दिक पांड्या ‘गेम चेंजर’

​हार्दिक पांड्याक पाकिस्ताना आड खेळपाक कितलें आवडटा, हें ताचे आंकडेवारी वयल्यान स्पश्ट जाता. पाकिस्ताना आड ताचो स्ट्रायक रेट, सरासरी आनी बॉलिंगेची इकॉनमी हेर मॅचींचे तुळयेंत सरस आसा. 2017चे चॅम्पियन्स ट्रॉफींतले फायनलींत ताची 76 धांवड्यांची खेळी अजून क्रिकेट मोग्यांच्या उगडासांत आसा. फाटल्या तीन मॅचींनी ताणें बाबर आझम, सईम अयुब आनी फखर झमान हांच्यो म्हत्वाच्यो विकेटी घेतल्यात.

साहिबजादा फरहानाचेर पाकिस्तानाची भिस्त

​साहिबजादा फरहानान दोन सप्तकांत भितर भारता आड तीन मॅची खेळिल्लो. ताणें सेगीत दोन अर्द शेंकडे मारून पाकिस्तानाची आस्त जिवी दवरिल्ली. विशेश म्हणल्यार ताणें जसप्रीत बुमरा आड तीन सके मारिल्ले. टी-20त अजून मेरेन खंयच्याच बॅट्समनाक असो पराक्रम करपाक जमूंक नाशिल्लो. पाकिस्तानाक जैत मेळोवपाक जाय जाल्यार फरहानाक बुमरा आड परतून एकदा बरी कामगिरी करची पडटली.