भांगरभूंय | प्रतिनिधी
पणजीः गोंयांत उदकाचो उणाव तात्पुरतो आसा. फुडाराक उदकाचो उणाव जावचो न्हय हे खातीर सरकार सध्या वेगवेगळे उदकाचे प्रकल्प हातांत घेता. हाका लागून डिसेंबर 2025 ते मे 2026 मेरेन राज्याक दिसाक 24.86 दशलक्ष लिटर उदक मेळटलें अशें मुख्यमंत्री डॉ. प्रमोद सावंत हांणी सोमारा विधानसभेंत सांगलें. विरोधी फुडारी युरी आलेमांव आनी हेर पांच आमदारांनी संयुक्तपणान सादर केल्ल्या लक्षवेधी सुुचोवणेचेर ते उलयताले.
सध्या गोंयांत दिसाक 695 एमएलडी उदकाची मागणी आसा आनी 632 एमएलडी उदकाची पुरवण जाता अशें मुख्यमंत्र्यांनी सांगलें. म्हणल्यार, दिसाक सुमार 50 एमएलडी उदकाचो सादारणपणान उणाव आसा. उदकाची फावो ती पुरवण सुनिश्चीत करपा खातीर उदका संसाधन खात्यान 11 वेगवेगळे प्रकल्प हातांत घेतल्यात तातूंत उदक शुद्धीकरण प्रकल्प आनी दाब फिल्टर लावप हांचो आस्पाव जाता. हे प्रकल्प गांजें, तुयें, शिवोली, आस्नोडें, धारबांदोडें, मोर्ले, मेंणकुरे, पिळर्ण आनी गावडोंगरी हांगा येतले. हे प्रकल्प डिसेंबर 2025 ते मे 2026 मेरेन पुराय करपाचे आसात.
सध्या 11 प्रकल्पांतल्या 2 प्रकल्पांचे कंत्राट जारी जाल्या आनी एका प्रकल्पाचें कंत्राट निमाण्या पांवड्यार आसा अशें तांणी सांगलें. उरिल्ले प्रकल्पूय बेगीन सुरू जावपाचे आसात. उदका पुरवणेंतली गळटी उणी करपा खातीर खात्यान स्मार्ट मॉनिटरींग सुरू केलां. तशेंच पोरण्या उदकाचे पायप लायन काडून थंय नवे पायप बसोवपाचें काम सुरू आसा. भौशीक बांदकाम खातें आधुनीक तंत्रगिन्यानाचो वापर करून उदकाची बरी पुरवण सुनिश्चीत करता. उदकाची योग्य पुरवण सुनिश्चीत करपा खातीर पुरवण वेवस्थेंत सुदारणा करची. तेच बरोबर नागरिकांनी इंटरनॅटाचो योग्य वापर करप तितलेंच म्हत्वाचें.
हाचे आदीं युरी आलेमांव हांणी सांगलें, राज्यांतल्या उदका पुरवण वेवस्थेंत 45 ते 50 टक्के गळटी जाल्या. गळटी उणी केल्यार राज्यांत उदकाचो उणाव कांय प्रमाणांत उणो जातलो अशें तांणी सांगलें. मिटरांत त्रुटी आशिल्ल्यान आनी उदकाची चोरयेक लागून खात्याक लुकसाण जावपाक लागलां अशेंय तांणी सांगलें. खात्या कडेन मेळपी साधनसुविधांचो सारको वापर जायना अशें आमदार कार्लोस फेरेरा हांणी सांगलें. राज्यांतल्या मेगा प्रकल्पांनी उदका पुरवण सुटसुटीत आसा, पूण थळाव्या लोकांच्या घरांत उदक ना असो आरोप तांणी केला.
——————–
24 वरां उदकाची पुरवण शक्य ना
सध्या गोंयांत 24 वरां उदका पुरवण करप शक्य ना. अशें आसून लेगीत सरकार दिसाक चार वरां उदका पुरवण करपाचो यत्न करता. उदका प्रकल्पांत वा उदका पुरवण मार्गांत व्हडली दुरुस्ती जाल्यारूच राज्यांत उदका पुरवण कांय काळा खातीर खंडीत जाता. हाचे पयलीं महाराष्ट्रांत आशिल्लो तिळारी कानाल फुटिल्ल्यान पर्वरींत असो प्रस्न उप्रासलो. अशो व्हड घडणुको सोडल्यार सध्या राज्यांत खंयच सेगीत तीन-चार दीस उदकाचो उणाव ना अशें मुख्यमंत्र्यांनी सांगलें.
उदका स्रोता खातीर क्यूआर कोड
उदकास्रोत खात्यान उदकास्रोतांचें सर्वेक्षण करून ते अधिसुचीत केला, अशें मुख्यमंत्र्यांनी सांगलें. तशेंच तांकां क्यूआर कोड दिला. कोड स्कॅन करून त्या उदका स्त्रोतांचीं सुवाती आनी वाठार कळटात. हाचो अर्थ तातूंत भर घालून तीं भरूंक मेळनात. राज्यांत खाजगी बोरवेल, उदका पुरवण करपी टँकर, खाजगी पंपिंग स्टेशनां चलोवपी लोकां खातीर नोंदणी सक्ती केल्या. नेमाचें उल्लंघन केल्यार तांकां दंडात्मक ख्यास्तीची तजवीज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
