भांगरभूंय | प्रतिनिधी
नवी दिल्ली, खबरां संस्थाः भारतांत घरगुती शिवराक थाळीचें दर मे म्हयन्यांत (वर्सुकी आदाराचेर) 5.76 टक्क्यांनी देंवून 26.20 रुपया जालें. फाटल्या वर्सा मे 2024त शिवराक थाळीचें दर 27.80 रुपया आशिल्लें. ही म्हायती भांडवल बाजारपेठेंतल्या क्रिसिल कंपनीन आपल्या म्हयन्याळ्या फूड प्लेट दर निर्देशकांत दिल्या.
क्रिसिलान रायस रोटी रेट (RRR) अहवालांत म्हणलां, एप्रीलाच्या तुळेंत मे म्हयन्यांत शिवराक थाळीचें दर -0.38 टक्क्यांनी उणें जालां. एप्रीलांत शिवराक थाळीचें दर 26.30 रुपया आशिल्लें.
नुस्तेंची थाळी 6% सवाय जाली त्याच वेळार मे म्हयन्यांत नुस्तेंचें थाळीचें दर वर्सुकी आदाराचेर 6% उणें जावन 52.6 रुपया जालें. फाटल्या वर्सा मे 2024त नुस्तेंचें थाळीचें दर 55.9 रुपया आशिल्लें.
म्हयनाळ्या आदाराचेर एप्रीलाच्या तुळेंत मे म्हयन्यांत नुस्तेंचें थाळीचें दर 2.41 टक्क्यांनी उणें जालां. एप्रीलांत ते 53.9 रुपया आशिल्लें.
क्रिसिलच्या अहवाला प्रमाण, बटाट, कांदे आनी टोमॅटो हांचे दर देंविल्ल्यान शिवराक थाळीचें दर देंवले. शिवराक थाळीचें दरांत बटाट आनी टोमॅटोचो वांटो 24% आसा.
ब्रॉयलर चिकनाच्या दरांत वर्सुकी आदाराचेर 6 टक्क्यांनी उणाव जाल्ल्यान नॉनवेज थाळीचें दर देंवले. नॉनवेज थाळीचें दरांत ब्रॉयलर चिकनाचो वांटो 50% आसता.
त्याच वेळार आयात कर वाडिल्ल्यान वनस्पती तेलाचे दर 19% वाडल्यात आनी पेट्रोलियम गॅस सिलिंडरांचे दर वर्सुकी आदाराचेर 6% वाडल्यात. नाजाल्यार दोनूय थाळी आनीक सवाय जावंक शकतालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
