मेहनती बायलांक उर्बा दियात

भांगरभूंय | प्रतिनिधी

प्रवीण आर्लेकार : दिवाळी बाजाराचें उक्तावण

भांगरभूंय । प्रतिनिधी

पेडणें : बायलांक स्वावलंबी जावचे खातीर लोकांनी तेंको दिवपाची गरज आसा. जीं बायलां वेगवेगळे खाद्यपदार्थ तयार करून आपापले स्टॉल घालतात. तातूंतले खाद्यपदार्थ विकत घेवन लोकांनी तांकां आदार करचो, अशें पेडणेंचे आमदार प्रवीँण आर्लेकार हांणी सांगलें. चांदेल हसापूर पंचायत वाठारांतल्या महिला मंडळांनी दिवाळी खातीर खास खाद्यपदार्थ विक्री स्टॉल सुरू केलां, ताचें उक्तावण केले उपरांत आमदार प्रवीण आर्लेकार उलयताले.

ह्या वेळार चांदेल हसापूरचे सरपंच बाळा शेटकार, मोपा सरपंच सुबोध महाले, तोरशेचे आदले सरपंच तशेंच आदले जिल्हो पंचायत वांगडी सूर्यकांत तोरस्कार, आदले जिल्हो पंचायत वांगडी रमेश सावळ, भास्कर नारुलकार, उपसरपंच रुचिरा मळीक, आदले सरपंच संतोष मळीक, संजीवनी परब हाजीर आशिल्ली. हसापूर वाठारांतल्या वट्ट 11 महिला गटांनी खाद्यपदार्थ तयार करून दिवाळी खातीर खासा बाजार मांडला.

आमदार आर्लेकार हांणी सांगलें, भाजर सरकार बायलां खातीर वेगवेगळ्यो येवजण्यो चालीक लायता. त्या येवजण्यांचो लाव घेवन स्वावलंबी जावचें. जीं बायलां स्वता खाद्यपदार्थ तयार करतात, वस्तू तयार करतात, तांचे विक्री खातीर पेडणें शारांत बेगिनूच स्टॉल उपलब्ध करून दितले.

प्रेरणा महिला ग्राम सेवा आपमजत गटान ह्या बाजार स्टॉलाचें आयोजन केल्लें. प्रेरणा महिला ग्रुपान आयोजीत केल्ल्या हे कार्यावळी खाला बायलां स्वता वेगवेगळे खाद्यपदार्थ तयार करतात. तांकां सगल्यांनी तेंको दिवपाची गरज आसा. सकारात्मक उर्जा घेवन बायलांनी आपलो वावर फुडें व्हरचो, असो उलो ह्या वेळार सरपंच सुबोध महाले हांणी मारलो.