भांगरभूंय | प्रतिनिधी
वसई, खबरां संस्था: मुंबयंतल्या भाईंदर रेल्वे स्टेशनाचेर रेलगाडये खाला वसईच्या बापूय-पुताचे आत्महत्त्ये फाटलें कुवाडें निमाणें उक्ताडार आयलें. जय मेहता हांणी मुस्लीम चलये कडेन लग्न केल्लें. हें प्रकरण समाजांत उक्तें जाल्यार नांव पिड्ड्यार जातलें ह्या भंयान त्या दोगांयनी आत्महत्त्या केल्ल्याचें स्पश्ट जालां. जयचो मोबायल फोन, कार्यालयांत सांपडिल्ली डायरी तशेंच ताची पयली बायल आनी दुसरे बायलेचे जबानींतल्यान हें प्रकरण उक्तडार आयलें.
हरिष मेहता (६०) हे पूत जय मेहता (३०) हांचे सयत वसईच्या वसंत नगरींत रश्मी दिव्य हावज संकुलांत रावताले. जयान कांय म्हयन्यां आदीं एके दाक्षिणात्य चलये कडेन मोगान लग्न केल्लें. सोमार ७ जुलयाक मेहता बापूय-पुतान आत्महत्त्या केल्ली. ते दोगूय स्टेशना वेल्यान चलत वतना आनी सहज रुळांचेर न्हिदिल्ल्याचें सीसीटीव्ही व्हिडियो व्हायरल जाल्लो. त्या दोगांयनी आत्महत्त्या कित्याक केली हे एक कुवाडेंच जावन पडिल्लें.
जय मेहता हाचें एके मुस्लीम चलये कडेन फाटल्या १० वर्सां सावन प्रेमसंबंद आशिल्ले. त्या दोगांयनी प्रतित्रापत्रा वरवीं लग्नूय केल्लें. मात आपचो समाज मुस्लीम चलयेक स्विकारचो ना म्हणून तांणी तिका काळखांत दवरून दाक्षिणात्य चलये कडेन लग्न केल्लें. जयाचे पयले बायलेक ही गजाल कळ्ळ्या उपरांत तिणें ताका हे विशीं प्रस्न विचारले आनी बायलेक सोडपाचें ताचेर चेंपण हाडलें.
मजगतीं, जशी दुसरे बायलेकय जय मेहताच्या मोगाची खबर कळ्ळी तसो तांचे मदींय वाद सुरू जाले. पयली बायल सेगीत जयाचेर चेंपण हाडटाली. मेहता बापूय आनी पुताक भंय दिसतालो की ही गजाल सगळ्यांक कळ्ळी जाल्यार बदनामी जातली म्हणून त्या दोगांयनी आत्महत्या केल्ल्याची म्हायती वसई रेल्वे पुलिसांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
