भांगरभूंय | प्रतिनिधी
मुंबय, खबरां संस्था: अस्तंत रेल्वे मार्गावेल्या भाईंदर स्टेशनाचेर लोकल ट्रेनी सामकार न्हिदून आत्महत्या करपी हरिश मेहता आनी जय मेहता ह्या बापूय आनी पुताची सध्या बरीच चर्चा जाता. हरिश आनी जय हांचो आत्महत्त्येचो व्हायरल जाल्लो व्हिडिओ पळोवन सगळ्यांकूच तांचें चुरचुरे दिसता. दोगायनी एकामेकांचो हात धरून मरणाक वेंग मारली. ते दोगूय रेल्वे येता ती पळोवन रेल्वेच्या रुळार आडवे न्हिदले. रेलगाडी तांचे वयल्यान गेली. व्हिडिओ व्हायरल जाले उपरांत ह्या दोगांयनी इतलें भिरांकूळ पावल कित्याक उखल्लां आसतलें हे विशीं चर्चा सुरू आसा. ह्या दोगांयचे कुडीची वळख पटले उपरांत तपासाक सुरवात जाली.
हरिश आनी जय हे दोगूय वसयच्या वसंतनगरी वाठारांत रावताले. मंगळारा तांच्या सोयर्यांनी तांच्यो कुडी ताब्यांत घेतल्यो. उपरांत पुलिसांनी तांच्या घराची पळोवणी केली. तेन्ना पुलिसांक इंग्लिशींत बरयल्लें पत्र सांपडलें. ह्या पत्रांत, ‘‘ह्या प्रकरणाक आमीच जापसालदार आसात’ अशें बरयलां. ताका लागून त्या दोगांयनी आत्महत्त्या करपा फाटलो प्रकार वेगळोच आसा हे शक्यतायेन पुलीसांनी हे विशीं तपास करप चालूच दवरलां. पुलीस सध्या मेहता बापूय- पुताचे बँक खात्याचे तपशील, ईमेल आनी मोबाईल रेकॉर्ड तपासतात.
सुरुवातेला तांकां शेअर बाजारांत बरेंच अर्थीक लुकसाण जाल्ल्यान ते रिणांत बुडिल्ले अशें कांय जाण सांगताले. मात पुलिसांनी नव्यान केल्ल्या तपासांत तांणी कसलेच रीण घेवंक ना अशी म्हायती मुखार आयल्या. मागीर तांणी येदें व्हडलें पावल उबारलें तरी कित्याक असो प्रस्न आतां निर्माण जाला. ताका लागून ह्या प्रकरणाचें गूढ आनीक वाडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
