भांगरभूंय | प्रतिनिधी
इतलो पयसो देशांतले फुटबाॅल उदरगती खातीर गांवांतल्या क्लबांक दिल्लो जाल्यार कांय वर्सांनी वेगळें चित्र दिसपाचें.
गोट (ग्रेटेस्ट आॅफ आॅल टायम) इंडिया टुर्स 2025 खाला संवसारीक मळाचेर गाजपी फुटबाॅल खेळगडो लिओनेल मेस्सी सध्या भारतांत आसा. पयर कोलकाता आनी काल मुंबय ताची कार्यावळ जाली. हैदराबाद, दिल्लींतूय जातली. कोलकातांत मेस्सीचें सारकें दर्शन जावंक ना, म्हूण खेळांमोगींनी मस्ती केली. हिंसाचार केलो. आयोजक सतंद्रू दत्ता हे उद्देगपती. तांचे कंपनीची ही कार्यावळ. खंयच्याच सरकारान वा फुटबाॅल महासंघान (फिफा) ती आयोजीत करूंक ना. अर्थांत सरकारां तातूंत वांटेकार जाल्यांत. आपल्यो कार्यावळीय मेस्सीचे हस्तुकीं केल्यात. कोलकाता प्रकरणांत दत्ता हांकां अटक जाल्या. ह्या हिंसाचारांत कोणाक कांय जावंक ना, म्हूण माणसुकी.
खंयचोय लोकप्रीय खेळगडो कार्यावळीक येता तेन्ना सुरक्षा वेवस्था ही जायच, पूण तो नेमको येवन कितें करतलो हाचीय म्हायती प्रेक्षकांक दिवंक जाय. नाजाल्यार मागीर कोलकाता सारको गोंदळ जाता. कोलकाता (फाटोफाट गोंय) हें फुटबाॅल पिशें शार. थंयचे खेळांमोगी फुटबाॅला खातीर जीव पसून दिवपी. आपल्या देवाकूच पळोवपाक आयिल्ले भशेन आयिल्ले. 8 ते 12 हजार रुपया तिकेट दिवन. मेस्सीक खेळटलो काय ना, कितलो वेळ रावतलो हाची म्हायती प्रेक्षकांक नाशिल्ली जावये. तातूंतले थोडे मेस्सी मॅच खेळटलो, ही आस्त बाळगून आयिल्ले आसतलेच. तो पाऊण वरा बदला फक्त 20 मिनटां रावलो. फक्त हात हालयलो. सरभोंवतणी ताची स्वताची सुरक्षा वेवस्था, सरकाराचे पुलीस, व्हीआयपी आनी राजकी फुडारी हांचे गर्देंत मेस्सी थोड्यांक दिसूंकच ना. हाची तिडक कांय वेळान भायर सरली आनी प्रेक्षकांनी कदेलां मोडपाक, दिसता तें पिंजून उडोवपाक सुरवात केली. आयोजन सारकें जावंक नाशिल्ल्यान आतां हें प्रकरण न्यायालयांत पावलां. 150 कोटींचो ही पुराय भोंवडी. कोलकातांत अपेक्षे प्रमाण गर्दी जावंक ना, अशें म्हणटात.
बरेच फावट फक्त गर्दी आनी गल्लो जमोवपाक लोकप्रीय खेळगड्यांक हाडटात आनी कार्यावळी फाटल्यान प्रामाणिकपण नासल्यार सगलें गणित इबाडटा. कोलकाता कितें जालें, ताचो तपास आतां सरकार करता. कसलेंय आयोजन पद्दशीरपणान करपाक नाका? इतलो पयसो देशांतले फुटबाॅल उदरगती खातीर गांवांतल्या क्लबांक दिल्लो जाल्यार कांय वर्सांनी वेगळें चित्र दिसपाचें. सरकारां खेळां मळांचेर खेळगड्यांक उर्बा दितात, मात ताचेय परस चड उद्देगपती, कांय कंपनींनी साबार खेळांक हांगा पोसवण दिल्या. ताकाच लागून खेळ जिवे उरल्यात, अशें म्हणल्यार अतिताय थारचीना. मेस्सी हो अर्जेंटिनाचो खेळगडो. फुटबाॅलाच्या सगल्या आंगांनी तो फिशाल आसा. खास करून दाव्या पांयान ताणें मैदानार जादू करून दाखयल्या. पयलीं एफसी बार्सेलोना, पीएसजी आनी आतां इंटर मियामी क्लबाक तो खेळटा. 2022 त ताणें अर्जेटिनाक वर्ल्ड कप जिखून दिल्लो. मेस्सी आनी पुर्तुगालचो क्रिस्तीयानो रोनाल्डो हे तरणाट्यां खातीर आदर्श, प्रेरणास्थान आसात. काल मुंबय क्रिकेटर सचिन आनी मेस्सीन एकमेकांक 10 क्रमांकाची जर्सी दिली. महाराष्ट्र सरकाराच्या ‘प्राॅजेक्ट महादेव’चें उक्तावण मेस्सी हस्तुकीं जालें. तातूंत सरकार 13 वर्सां सकयल्या 60 फुटबाॅल खेळगड्यांक प्रशिक्षण दितलें.
उत्सवी कार्यावळीं वांगडाच, 16 वर्सां सकयल्या सगल्या खेळगड्यांक उर्बा मेळप चड म्हत्वाचें. तांकां अर्थीक मजत जाय. उत्सवी कार्यक्रमांचेर कोटी, अब्ज मोडप्यांनी हाचो विचार करूंक फावो. आंतरराष्ट्रीय मळार गाजिल्ले खेळगडे भारतांत येतात, पूण मैदानाचेर खेळपाक फाटीं फुडें कित्याक जातात? मैदानां दर्जेदार नात? हें कारण आसा जाल्यार आमकां खेळांच्या साधनसुविधां बाबतींत परत विचार करचो पडटलो. सगल्यांत पयलीं प्रत्येक शाळेक बरें मैदान दिवंया. जमता तितल्यो सुविधा दिवया. हांगाय एक दीस मेस्सी, रोनाल्डो निर्माण जातलेच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
