मेस्सीचे कार्यावळीक धुमशेणां

भांगरभूंय | प्रतिनिधी

ममता हांणी मागली माफी : आयोजकांक अटक

खबरां संस्था

कोलकाता : कोलकातांत सॉल्ट लेक स्टिडियमांत ‘मेस्सी मॅजीक’ पळोवपा खातीर आयिल्ले चाहते खुबूच बेजार जाले. खरें म्हणल्यार मेस्सीक लागींच्यान पळोवपाचें सपन घेवन स्टेडियमाचेर पाविल्ल्या ताच्या चाहत्यांक सामको उणो वेळ ताचें दर्शन जालें, हे खातीर चाहते बेजार जाले. मेस्सी फक्त 5 मिणटां खातीर स्टेडियमाचेर आयलो आनी परतून गेलो. हाका लागून सॉल्ट लेक स्टेडियमांत आयिल्ले चाहते आक्रमक जाले. तांणी बाटल्यो, बेल्ट, कदेलां स्टेडियमांत शेंवटून मारल्यो, तशेंच होर्डींग मोडून आपली तिडक उक्तायली.

अर्जेटीनाचे नामनेचे फुटबॉल खेळगडे लियोनेल मेस्सीच्या कोलकाता इव्हेंटाच्या आयोजकांक शेनवारा सॉल्ट लेक स्टेडियमांत जाल्ल्या बोवळा उपरांत अटक केली. अवेवस्थेक लागून वर्ल्ड कप जिखपी कॅप्टन लियोनेल मेस्सीक मैदाना वयल्यान बेगीन भायर सरचो पडलो.

हे घडणुके उपरांत अस्तंत बंगालची मुख्यमंत्री ममता बॅनर्जी हांणी त्या सगल्या चाहत्यांची आनी लियोनेल मेस्सी हांची माफी मागली.

ही कार्यावळ पळोवपा खातीर चाहत्यांनी 4,800 ते 25 हजारां मेरेनच्यो तिकेटी खरेदी केल्ल्यो.

मुख्यमंत्री बॅनर्जी हांणी सांगलें, स्टेडियमांत जाल्लो बोवाळ आनी पेड्डेर वेवस्थेचो तपास करचे खातीर राज्य सरकारान एक तपास समिती घडयल्या. ही समिती देशांतल्या सगल्यांत व्हड फुटबॉल स्टेडियमांत आस्पाव आशिल्ल्या सॉल्ट लेक स्टेडियमांतले पुराय घडणुकेचो तपास करतली.

कोलकातांत लियोनेल मेस्सीचे कार्यावळी वेळार जाल्ल्या बोवळाचेर अस्तंत बंगालचे डीजीपी राजीव कुमार हांणी म्हणलां, मोसा मैदानाचेर खेळचे नात, हाका लागून ताचे चाहते बेजार जाल्ले. मेस्सी येतले, चाहत्यांक हात दाखोवन अभिवादन करतले, कांय लोकांक मेळटले आनी उपरांत परतून वतले, इतलेंच कार्यावळींत आशिल्ले. राज्य सरकारान हे पुराय घडणुकेची चवकशी करचे खातीर आदींच एक समिती घडयल्या. ही समिती सगले वटेन तपास करतली. तातूंत आयोजका वतीन कसलीच घाळपणां जाल्यात काय कितें ताचो तपास करतली. ज्या लोकांनी तिकेटी खरेदी केल्ल्यो तांचे पयशे परतून दिता, अशें आयोजकांनी म्हणलां. सध्या स्थिती पुराय तरेन नियंत्रणांत आसा. मुख्य आयोजकांक ताब्यांत घेतला. हे घडणुकेक जापसालदार आशिल्ल्यांचेर कारवाय जावची हे खातीर पुलीस यत्न करतात, अशेंय राजीव कुमार हांणी म्हणलां.